( نفسي وياريت ) بقلمي .. معوض حلمي

{  مربعاتي  ..  حياتي  }
__________________
{  نفسي  وياريت  }
__________________
نفسي وياريت ضاعت فاشوش
والعيون  متلونه  ويا  الرموش
فاياك  تعايب  أو تعاتب   ناس
غاب   حياها    عن    الوشوش

نفسي  وياريت  ننسى  الأروش
واشوف   ولد   يضحك   باشوش
وتطيب  جراح  الروح نلعب  سوا
ولما يجمعنا الهوا نسكن عشوش

نفسي وياريت أصنع نعوش
تلم    ناس      مابيشبعوش
كروش    وعباها     الطمع
وتاكلها   نار   ومايرجعوش

نفسي   وياريت   انا    ماعرفوش
زمان     وفيه     الناس     وحوش
متفرقين  برا  العدد والروح شتات
مشتاق زمان الطيبين مابيجرحوش

نفسي  وياريت  يارب  حوش
وشوش ملايكه  قلوب وحوش
مكر   التعالب  والطبع  غالب
تنهي    ماتنهي   مابينتهوش

نفسي  وياريت  حبه رتوش
عدى  الزمان وماعشناهوش
جروحنا ناحت ريحتها  فاحت
والضحكة  ماتت ع الوشوش
_______________
بقلمي ..........
معوض حلمي
منشأة بطاش
تمي الأمديد
دقهلية