ناس في الصورة .. بقلمي .. معوض حلمي

(  ناس في الصوره  )
______________

نفسي ف ماتش زي زمان
نفسي ف لمة أهل زمان
ناس في الصوره وكنا حبايب
واحد غاب كان قلبه طبيبي
عم  السيد طلبه  الغالي
ألفين رحمه عليك ياحبيبي
ألفين رحمه وطيفك جالي
وعبد المنعم زي ماهو
لسه خفيف وظريف وبيلعب
لسه هواه موجود في الملعب
لسه بعافر عمره مابتعب
وأجمد جامد بان في الصوره
أحسن حارس في المعموره
ناجح مصطفي وبإحساسه
قبل ماننزل أرض الملعب
كان بيخلي إيدينا على راسه
ونقرا الفاتحه لاجل مانغلب
والقشاش ابو مقبل فينا
عم وحيد ابو راس موزونه
كان في مكانه ظبط وربط
واللي يفوت بيموت ع الخط
واد يانزيه ياأمير الوسط
لما تباصي الكوره تملي
خلي الكوره دوام ع الأرض
مانت عارفني ماليش في الهد
واياك ترمي عليا ملامه
عندك عم الكل أسامه
كانت راسه عارفه الجول
هداف جامد قد القول
عمره ماقال في الصعب انا مالي
وكمان فخري شويه أناني
لكن كان في الأزمه بيسد
كان حريف وف وقت الجد
كان بيغزل طوب الأرض
وملك الملعب طوله وعرض
ناجح حلمي وعدى الحد
كان بيهاجم زي مهاجم
وكان بيدافع زي الورد
وانا كان نفسي أعيد الود
نفسي ف ماتش زي زمان
نفسي ف لمة أهل زمان
ناس في الصوره وكنا حبايب

ناس في الصوره وكنا حبايب
______________
بقلمي .......
معوض حلمي
منشأة بطاش
تمي الأمديد
دقهلية