العالم محتاج لضمير .. بقلمي .. معوض حلمي

( العالم محتاج لضمير )
______________

العالم   محتاج    فنان
يرسم  فارس   بحصان
ف إيديه السيف مسلول
مايخافش من المسئول
ينده   ويصحي   عقول
لبست  م الخوف عبيان
مغزوله   من  الأحزان

العالم   محتاج    لفتوه
نبوته    الناشف   قوه
يحمي الناس الحرافيش
ويكون  لجناحهم  ريش
ويروح الخوف مايجيش
ويحوش ب إيديه النوه
عاشق  للخير   ومروه

العالم  محتاج   أسطى
يدبح شياطين الواسطه
والعدل  يعلى  الصوت
يبدر بإيديه ..... القوت
ف يطرح  شجر  التوت
ناكل من خيره ونتغطى
العالم   محتاج

أسطى

العالم  دايس  ع الروح
سهانا   وعبانا   جروح
بيغمي   عنينا   وبيعتم
مش عايز يرحم ويسلم
وشايفنا  واحنا   بنتألم
والقلب  الطيب مجروح
ولا يقدر  يتكلم  ويبوح

العالم   محتاج   لضمير
محتاج    حبة      تغيير
ويرسم   للعدل   ثوابت
هايلاقى قلوب الناس تابت
والضحكة تعم وشوش شابت
ونطير  ف السما  زي الطير
العالم    محتاج   لضمير
______________
بقلمي .......
معوض حلمي
منشأة بطاش
تمي الأمديد
دقهلية