( ضمير الفاس ) .. بقلمي .. معوض حلمي

(  ضمير  الفاس  )

_____________

أنا  فلاح  وبالبلدي
هنا  بلدي
في  حضن  الريف
بحور الشعر عشقاني
وفاكراني واد حريف
وانا واحد على قدي
بادوس على جرحي وباعدي
وارص حروفي من كدي
ماليش في الغش والتجريح
ولا في البحر ليا شراع
انا  راكب  بساط  الريح
لأني صريح مانيش خداع
باوصف  وطأة  الايام
واجيب الكلمه م الأحلام
أوضيها ...... واصليها
واصفيها من  الاوهام
عشان تمشي بين الناس
تنوب عني في غيابي
تكون  نبراس
وابويا علمني أكون حساس
وانا ثابت على عهده
ومش ناسي عرق خده
ولا  كده
ولا ناسي ضمير الفاس
أنا فلاح
وريحة الأرض عشقاني
وعرفاني أنا الطيب
باداوي الجرح وباطيب
آهات  الناس
وانا الباني
بتحناني
في ناسي أساس
أنا فلاح ونبراسي
ضمير الفاس

أنا فلاح ونبراسي
ضمير الفاس
______________
بقلمي ..........
الفلاح الفصيح
معوض حلمي
منشأة بطاش
تمي الأمديد
دقهلية