راضية ومرضية .. بقلمي الفلاح الفصيح .. معوض حلمي

(  راضية ومرضية )

~~~~~~~~~~~
زي  أهل  زمان
أبويا كان طمعان
يجيب م الولاد دسته
وستي بالواسطه
قالت كفاية  كده
وصل العدد سته
تلاته ولاد وتلاته بنته
وستي كات شاطره
كان فيها شيئ لله
ربتنا ع  الفطره
وابويا على نهجها
ماشي بأمر  الله
وانا منه  باتعلم
تتبع خطايا خطاه
ولما الزمن  سلم
على وشها وعلم
عدى وساب ذكراه
وابويا يحضنها
علشان يطمنها
تفرح تقول الله  
ولما اجي أحضنها
وابص ف عيونها
تفارقني  قولت  آه
ويلاقي قلبي دواه
وتضمني  ضمه
وابويا  كان يسمع
يقول لها  يامه
الواد  بيدلع  
تقول ياواد مالك
غيران  وهتولع
تضحك وتتبسم
وتقول ياواد قسم
إلبس كدا وارسم
ياروحي  وعنيا
دا اللمسة من إيدك
بتزيدني  حنيه  
والنظرة من عينك
لجرحي  مداويه
ومرت عليها سنين
من  العدد  ميه
حست طلوع الروح
والأصل مش بالكلام
الرك  ع  النيه
ندهت عليا ف يوم
تلزمني  بوصية
قالتلي لما أموت
مش عايزة أسمع صوت
ولا عايزة أسمع زيطه
خليني أدخل قبري
وروحي  مبسوطة  ...
أنا عشت بينكم عمري
راضيه  ومرضيه
وقف الكلام ف الزور
محشور رفض يطلع
والقلب كان يدمع
ومشينا ف المشهد
وربنا   يشهد  
سمعنا زغروطه
مظبوطة ع النيه
كأنها   زفه
وعروسة متحنيه
وهيى  بتودعني
بنظره من قبرها
نسيت   ترجعلي
أمانة كات عندها
كات روحي ف عيونها
وخدتها  حنيه
كات روحي ف عيونها
وخدتها  حنيه
~~~~~~~~~~~~
بقلمي الفلاح الفصيح
معوض حلمي
منشأة بطاش
تمي الأمديد
دقهلية