قوليلي مين قد توبك .. بقلمي الفلاح الفصيح .. معوض حلمي

قوليلي مين قد توبك

________________

سرحت  شايل ..... ذنوبك
والقلب  زايد ....... نحيبه
قوليلي   مين   قد   توبك
لو  كان  مخاوي   هاجيبه

سرحت  قاصد ...... عتابك
بس  الحرس ..... ضللوني
شافوني  واقف .... ببابك
مدوا  الإيدين ... بهدلوني

سرحت  فيكي   اسمحيلي
ياحضن  واسع ....... براح
مدي  الإيدين شدي حيلي
عزمك  يداوي ..... الجراح

سرحت  أنصح ...... عيالك
ياقلب  غافر ........ ذنوبنا
طمعوا  الاعادي ف جمالك
دخلوا  الحدود  من  عيوبنا

سرحت    شايل  شادوفي
أروي  القلوب  من  حنانك
ع الترعه  واعزف  دفوفي
تطرح  سنابل ..... غيطانك

سرحت    شايل   حمولي
ملهوفه   روحي   عليكي
كل  العوازل  ... لاموني
فضحني  شوقي   إليكي

وسرحت  فيكي  بدموعي
ماهونت    مره     عليكي
صلاتي   ليكي  وخشوعي
ولا اشوفش دمعة عينيكي
________________
بقلمي الفلاح الفصيح
معوض حلمي
منشأة بطاش
تمي الأمديد
دقهلية