الموناساره .. بقلمي الفلاح الفصيح .. معوض حلمي

لوحتي  ..

......................

::  الموناساره  ::

...........................

إوعى تقولي
إن  أنا  مش فاهمك  
أو  مش  حافض
تقاطيع  وشك
لما زمان  ف اللفه
شالوكي
قوام  وجابوكي
وقالولي  دي  بنتك
وشوفت  عينيك  
واتخيلتك أجمل ورده
في  البستان
وجيبت  الفرشة  والألوان
وبسرعة رسمتك
أصل أنا  فنان  
والرسم  هوايتي  
وبافهم  لغة  الألوان  
مثلا يعني
أقدر اقولك
على لون  فرحك  
وكمان  لون حزنك  
ولونك  وانتي  عيونك
سارحه  ف كونك  
حتى  الحلم
الغافي  ف حضنك  
عارف  لونه
حتى  جنونك
همسك  شجنك  
واجمل لون
بيليق  على وشك
وبيرسم  ضي النور
في ملامحك
حتى القمر العالي
لو شاف ألواني
في  ضيك  
هايغير منك
وينزل  طوالي
ويقول  وانا  مالي
هات ألوانك
يالا   ارسمني
شوفتي  عيوني
ازاي  شايفاكي
وبألواني
رسمت  هواكي
وقدري  معاكي  
إنك  سحراني
وساكنه  كياني
زي  الوشم
وانا  من  صغري
باحب  الرسم
وحب  الألوان
ف حياتي  غريزه
آه لو  شوفتي
بعينك  لوحتك
هتحبيها
دانتي  وبس
ف عيني  عزيزه
حتى  دافنشي
لو شاف
تفاصيلك  فيها  
هايقول
ياخسارة  الموناليزا

هايقول
ياخسارة  الموناليزا
...........................
بقلمي الفلاح الفصيح
معوض حلمي
منشأة بطاش
تمي الأمديد
دقهلية