وإيه يعني .. بقلمي الفلاح الفصيح .. معوض حلمي

..... (  وإيه  يعني  ) .....

.............................

مشيت  السكه
بس سكوت
سابت لي  الغربه
حبة  موت
ومش  ناسي
اللي  كان  منها
مابين طيب ، وبين هلفوت
وبين طعم  المرار  فيها
وطعم  التوت
بنتعلم أصول الدرس بالنبوت
وطبع  الحياه  ماشيه
لابد  تفوت
 بنتبدل ، ونتغير
فمش  ممكن
بياض  الشيب يعود لشباب
ولا  الثيب
حتبقى  بنت  بنوت

فإيه  يعني
لو شافوا
الجرح يوجعني
ماأنا  المقصود
وأنا  المحقوق
وانا  المعني
وإيه  يعني

وإيه  يعني
لو نزلت دمعتي مني
تشق الخد  للنني
وبين الضحكه  والآهه
تجمعني .. وتقسمني
وإيه  يعني

وانا  الشاعر
برص  حروفي بمشاعري
وكل الخلق  تسمعني
وباعجب ناس وبتساعني
وناس  تانيه  تمنعني
وإيه  يعني

باكون طيب مع الطيب
لاعمر لساني يوم عيب
وعاب   عايب
مهما عاب
وقال  عني
وإيه  يعني

باسامح في اللي يجرحني
وباعدل في اللي وقعني
واكمل طوبه في البنيان
واهجر سكة  البهتان
عشان سيرتي
بعد غيابي تشفع لي
تنوب  عني
وإيه  يعني

وباسمع كلمه بطاله
واقول طيب، ماانا الطيب
باداوي العله وباطيب
عقول  عاله
واكتب كلمتي  حاله
فتمشي الفكره تتحالى
بين المخاليق  وتتعالي
تكون  نبراس
وتبني  أساس
من الإحساس
وترفعني
وإيه  يعني

مراكب صبري ولاده
واعدي الصعب كالعاده
واخطي الموجه ورا موجه
ماليش في التوهه والهوجه
ولا امشي ف سكه معوجه
وباكتب حرفي متحني
وإيه  يعني

وإيه  يعني
يميل  الشين
على  ابو وشين
على  الملاعين
وانا  مالي
مادام الحق سلسالي
وراس  مالي
وعزة نفسي رسمالي
طريق للخير يوصلني
وإيه  يعني
وإيه  يعني
..........................
بقلمي الفلاح الفصيح
معوض حلمي
منشأة بطاش
تمي الأمديد
دقهلية