الدوري اتهان .. بقلمي الفلاح الفصيح .. معوض حلمي

............ الشيخ مرجان ............

..........................................

خليكوا  شاهدين
شايفين بعنيكوا
الدوري  اتهان
م الشيخ  مرجان

شوفتوا  عنيد  العالم
صار عربيد ، وكلامه بغيض
بيهبهب لاجل فلوس مرجان
من بعد النخوه وشد الحيل
أهو هز الديل
لعويل سايق في قطيع غربان

خليكوا  شاهدين
شايفين بعنيكوا
الدوري اتهان
م الشيخ مرجان

ريحة  السحتوت
بتخلي عزيز الناس هلفوت
بينام طمعان ، ويقوم متهان
شايفين صفافير
بتبيع في ضمير
وحقوق  بتطير
بتروح  للغير
وبأمر تيوس الشيخ مرجان

خليكوا  شاهدين
شايفين  بعنيكوا
الدوري اتهان
م الشيخ مرجان

خير السرحه ياعم البدري
شوف الصاحي الفجر بيجري
عمر الحق  ماكان  بهتان
والكسلان  ع الغير متواكل
والهباش  دينه  الطغيان
طالع واكل ، نازل واكل
دايما  هادم  في  البنيان

حتى الطيب هادي ونادي
كات أخلاقه بتملي بلادي
باع العفه في سرب حدادي
لما شاور له  الشيخ  مرجان

خليكوا  شاهدين
شايفين بعنيكوا
الدوري اتهان
م الشيخ مرجان

إسمع مني يابو تغريده
وافهم عني حكمه مفيده
إنت المعني بلعبه وطيده
قبل   الجاهل  مايدمرها
هياخد خيرها يسيبها حديده

شوف بعنيك الحق ومقق
إفتح  دفتر  سجل  حقق
حاسب  يالا  الكل  ودقق
واكسر  ناب  الشيخ  مرجان

خليكوا  شاهدين
شايفين بعنيكوا
الدوري اتهان
م الشيخ مرجان

..........................................
بقلمي الفلاح الفصيح
معوض حلمي
منشأة بطاش
تمي الأمديد
دقهلية