رغم المشيب .. بقلمي الفلاح الفصيح .. معوض حلمي

................  نوة  حنان  ................

...............................................

عايزه  تسمع 
     كلمه  مني  باللسان
       وهى  نايمه  جوا  نني
                           في الأمان
والمشاعر  كلها 
     من  نور  عينيها
        وف قلبي ليها لو اتفتح
                             نوة حنان

وانا أصلي
   عاشق بالوما
          وغنايا حب
           حافظ عهودك إنما
                       باغطس واقب
تايه وبحرك ياحبيبتي
          مالوش مراسي
              حكمك دا قاسي
                لما قولتي الحب ذنب

والنظره أشرس موقعه
           ف غزو المشاعر
            وعنيكي فكره مقنعه
                      وانا قلبي شاعر
ماليش في زيف الأقنعه
           وسهامها شارده
           أتاريكي ورده ياحبيبتي 
                            بقلب  واعر

وليه دروس الحب 
       قاسيه ومؤلمه
           بتسيب أثارها
           جوا روحنا معلمه
من بين ركام الذكريات
             والروح شتات
                   تكبر  آهات 
                وانتي الحبيبه الملهمه


جابوا الأطبا 
   لما زاد جرح الجفا
              قالوا الأحبه 
                بالوداد هما الشفا
فجريت على بيتهم 
          أنادي  بلهفتي
             البرد ساكن جتتي
                         وانتوا  الدوا

وانا عمري عدي
    في التمني ياحبيبتي
        وانتي لسه بعيده عني
                         زي   مانتي
لسه سايقه
    في القساوه والصدود
          لسه بانيه في الحدود
                       وزايده حيرتي

وبرغم  جرحي 
     غويط  وغاير
       انا برضه شاري ياحبيبتي
                           ولسه صابر
لسه راسمه سوسنه 
            رغم  المشيب
                   رغم العنا
                      إنتي الطبيب
                        وانتي البشاير

رغم العنا
     إنتي الطبيب
        وانتي  البشاير
...............................................
بقلمي الفلاح الفصيح
معوض حلمي
منشأة بطاش
تمي الأمديد
دقهلية