ألفين رحمه عليكي ياستي .. بقلمي الفلاح الفصيح .. معوض حلمي

........ ألفين  رحمه  عليكي  ياستي ........

.......................................................

جوا البيت وسط العيله ووسط اللمه وقلبي سعيد
إتوضيت لاجل صلاة الجمعه الجامعه الناس للعيد
وقبل ماخطي الخطوه لبره قامت ستي وسر سعادتي
تحضن   قلبي   وتعدل   ياقتي   كأني   وليد

ولد الولد في عين الجده زي الصقر ف وسط الطير
كانت فارده قلوعها وماده كات شيفاني كأني أمير
شافها   ابويا  وقال   لها   يامه  الواد  بيتدلع
قالت مالك إيه هاتولع شكلك لسه ياواد بتغير

بكره  هايكبر  يبقى  عريس  ويفرح   ناسي
ولما  يجيب  لك  واد  هاتجرب نوع إحساسي
ولد  الولد  ياولد  حشايا ...... زي  الروح
نظرة عينه تداوي جروح ولمسة إيده دهبي وماسي

وعدي العمر وجيبت لابويا الواد والبت ياريتك شوفتي
نظرة   عينه   ولهفة   قلبه ....... كنتي  ضحكتي
لما يشيل على ضهره ولادي وانادي يابويا الواد بيدلع
وارجع لحنانك وادمع ، ألفين رحمه عليكي ياستي

ألفين  رحمه عليكي ياستي
..........................................................
بقلمي الفلاح الفصيح
معوض حلمي
منشأة بطاش
تمي الأمديد
دقهلية