خنقنا الضي .. بقلمي الفلاح الفصيح .. معوض حلمي

............ خنقنا  الضي  ...........

........................................

عمري  الفايت  عدى  فتايت  راح  متكسر
عمري  الجاي  ناقص  ضي  ومش متفسر
واللي  يحسر  ليلنا  القاسي مخاصم  حلمه
سارح  جوا  جروح  الروح  وبيكبر  ظلمه
واترجيت  الفجر  يلمه  لاجل  يغور
يبعت  بس  شعاع  النور
لاجل  اتوضي  أمان  الدور  وأثور
وابدر  فكره  بقلب  جريئ  واسيبها  في  علم  الله
يمكن  بكره  تنجي  غريق
وتداوي  الآآآه
نصيحة  أبويا  على  كتافي
لو  تمشي  مابين  الناس  حافي
إفتح  لطريق  الحق  مداه
واوعى  تكون  من  بعدي  إله
ويساعدك  في  ألغى  هامان
دا  الحكمه  اللي  بتبني  حياه
بتيجي  تملي  من  الأحزان
ومفيش  شبعان  بيحس  الجوع
ولافيه  موجوع  هايغالط  في  الممنوع
العفه  إذا  راحت 
مالهاش  في  زماننا  رجوع
الدوا  مصنوع  من  أفعالنا
المليانه  اماني  وزيف
والشاطر  يدخل  أفكارنا
يتعرف  على  قلب  نضيف
ألوان  الطيف  السبعه  عدت  ألفين
شياطين  وشالونا  مرابعه 
واخدنا  لفين
معادتش  اللقمه  تكفي  اتنين
ولا عادش  حمام
ولا عاد  العش  يساع  ولفين
ولا عادش  سلام
زرع  إيدينا  آثام  في  آثام
غاب  الوعي  وضاع  الفهم
تجار  ألغى  يبيعوا  الوهم
نصبوا  علينا  السيرك
أكلوا  الصدر  وغلوا  اللحم
وسابولنا  عضام  الورك
وسنان  الجوع  التالمه
بتمصمص  لحم  العالمه
وبتلعن  صنم  الغي
فتحنا  الباب  للضلمه
وخنقنا  الضي

وخنقنا  الضي
................................
بقلمي الفلاح الفصيح
معوض حلمي
منشأة بطاش
تمي الأمديد
دقهلية