نقطة نظام .. بقلمي الفلاح الفصيح .. معوض حلمي

..............   نقطة  نظام   ..............

................................................

نقطة    نظام    راح   نفصل   التشابيك
الشعر   إلهام   ماهوش   كلام   تحابيك
خاصمتوا   ليه  معانيه   وخدتوا  أدرانه
سيبتوا   بيبانه  ،  ودخلتوا   م الشبابيك

ياكلمه  قومي  اسرجي  لمعي المعني
" إقرأ "  وكات  منهجي  ونبينا  جمعنا
مدى الإيدين وافرجي  وبيني الكرامات
دا   الخطوه   بالنيات   والعزم  بيدفعنا

تلاتين   تلاف  لفلفوا  عبوا القصايد هم
نشروا  الخلاف  خلفوا  مداد  بلون الدم
وبالحبال  كتفوا  نبض  الحروف  سجنوه
وجرجروه سحلوه ، دفنوه في قعر اليم

قولنا مره  نثور  ورفعنا  في  الشعارات
سيبوا  الحروف  للنور وافتحوا الحوارات
النقد    لو   دستور    هاينضف   الساحه
والكلمه    لماحه   ،   بتكشف   العورات

بنرمي  أغلى  حروف في سلة النسيان
ويعلي  ألف  خروف في قصايد البهتان
بقينا   زي   خليه   سكانها   م  الدبابير
وكبرت الصراصير شوفناها  زي  حيتان

وكبرت الصراصير شوفناها  زي  حيتان
....................................................
بقلمي الفلاح الفصيح
معوض حلمي
منشأة بطاش
تمي الأمديد
دقهلية