بيوتنا القديمة .. بقلمي الفلاح الفصيح .. معوض حلمي

...............   بيتنا  القديم   ...............

..................................................

بيتنا   القديم  رغم  أنه  كان  طوب  ني
لو  قلت  فيه  المدد   ينده   يقولك  حي
قلبه الكانون والفرن والجرن واسع براح
وناروزه  ع الفتاح مفتوحه جايبه الضي

مكانش ليه  مفتاح  ولا قفل  ولا  ترباس
كات ستي حمده جناح وقلب زي  الماس
وجدي ابراهيم وبناته وياكي  يام هديوه
بنغني  غنيوه  على  صوت عزيق  الفاس

نسرح ننقي العفش يجي الحصاد قناطير
وان  شق ريقنا العطش ع المشربيه نطير
ياسلام لو إيجى الغدا وف ضل صفصافه
ناكل   ونتصافى  ،  نلعب  كما  العصافير

ورص   ع  الطبليه   فطير    وعيش  غله
وقعب  رايب  هديه  والقشطه  ميت فله
وخضره  ومخلل  وكمان دي جبنه قديمه
دا  غموس  عليه  القيمه   وميه   م القله

والشاي  على  الشاليه  غليان  على  مهله
شاورت   للغاليه   ،   والغالي   بانده   له
عبى   ياخال   للزينه  ولعمي  ابو  جنينه
وشايي  في الخمسينه مزاجي بيرتاح له

بالليل ياخال في البلد  هانقيم هنا ماحيا
وندعي  أهل  البلد   يونس   على  يحيى
بالذكر   ويا   المدد   والندر   فول   نابت
نلقى  القلوب  تابت ،  نلقى  القلوب تحيا

نلقى  القلوب  تابت ، نلقى  القلوب  تحيا
..................................................
بقلمي الفلاح الفصيح
معوض حلمي
منشأة بطاش
تمي الأمديد
دقهلية

.....