مربعاتي .. حياتي

( مربعاتي  ..  حياتي )

~~~~~~~~~~~~~

مسا طاير لناس غاليين على قلبي
مسا  غالي  بعطر  الورد  متعبي
على جناح الهوى ناوي يروح ليهم
يهنيهم ويرسم ضحكة ف عنيهم تفرحني
~~~~~~~~~~~~~

سنين عمري بأمر امي واقفة مابتعدش
وبقالي عمر  بعيد ميلادي  ماحتفلتش
من يوم ماخدتيني ف حنانك .. كل أما
 بارجع  م السفر  وتقولي  ماكبرتش
~~~~~~~~~~~~~

سنين  عمري  فايته  وسايبه  جروح
حاسس بغصة وجع واصله لحد الروح
سألت  عنه  الودع  قال الودع سيبك
البخت مال ياجدع قلب الجدع مجروح
~~~~~~~~~~~~~

سنين عمري ومنقوشة
وباحلم  قاعدة  الكوشة
وجانبي عروسة م الجنة
وسكه  بورد   مفروشة
~~~~~~~~~~~~~

سنين عمري ومعدودة
وفيها أحزاني مفرودة
ممدودة  بحبل  وطوق
على وسطي ومشدودة
~~~~~~~~~~~~~

سنين  عمري  وبتعدي
كما الرهوان ولا تهدي
واقول يمكن تحن ف يوم
وترسم ضحكة على خدي
~~~~~~~~~~~~~

سنين عمري ومحبوكة
بتقطع  فيا  بالشوكة
ونهر عذابي  متواصل
مفيش فاصل ومشبوكة
~~~~~~~~~~~~~

سنين عمري وجراية
وحكاية  ورا  حكاية
يعدي العمر وف ثانية
وتهرب مني ضحكاية
~~~~~~~~~~~~~

سنين عمري وطايرة لفوق
وسيباني  ماليني  الشوق
أنام  واصحى  وأتمنى
أزور البيت  وبالي  يروق
~~~~~~~~~~~~~

سنين عمري مابين ومابين
وانا  التايه  مابين  لتنين
بتسعدني وتزعل ليه وتوجعني
وتحضني وترزعني قوام قلمين
~~~~~~~~~~~~~

صاحبي  ناداني تعالى
سندت ضهره بمخلابي
ولما  ناديته   تعالى
وقت ضيقتي خلا بي
~~~~~~~~~~~~~

سنين عمري ودايب دوب
وراضي  يامه  بالمكتوب
مجروح وجرحى يوجعني
وإيه يعني أبات مغلوب
~~~~~~~~~~~~~

سنين عمري بطاطي لها
تغيب  عني  واحن  لها
 تشوف ف عنيا أحزاني
 تغيب  تاني  تشعللها
~~~~~~~~~~~~~

سنين  وبتعمل  اللالي
سألت  الودع  قال لي
هات لي حته من  توبه
 ومكتوبه  يظهر  لي
~~~~~~~~~~~~~

سنين  ومالت  ميل
سقياني كاس الويل
م الهم اتحنى ضهري
وعمري ماكنت عويل
~~~~~~~~~~~~~

سنين وعدت سكوت
وبانده بعلو الصوت
ياخلق حظي  اتخنق
حاسس بغصة موت
~~~~~~~~~~~~~

سنين عدت على الفاضي
وحبيبي  بيا مش  راضي
وسوء  حظي  بيساهم
وانا  فاهم  ومتغاضي
~~~~~~~~~~~~~

سنين  عمري  ودبحاني
وانا الغرقان ف أحزاني
ولما حلمت أحط ف شط
 لقيت  أحلامي  بيعاني
~~~~~~~~~~~~~
بقلمي  ..
معوض حلمي
منشأة بطاش
تمي الأمديد
دقهلية