كحل عينيها يتعاجب

(  كحل عينيها يتعاجب  )
~~~~~~~~~~~~~

أنا  التايه   دليلي  إحتار
لما  قالتلي  ياواد  اختار
مابين قلبي وبين  روحك
لقيت  قلبي   وقايد  نار  ...
وانا قلبي مدار لأحلامها
وسكنها   وضل    أيامها
والروح تفديها  لو تعرف
واضحي بعمري علشانها  ...
وحبيبتي ف كل  أحوالها
 مابين   الغيرة  وظنونها
 ظلماني  ليه   ودبحاني
وقايدة   النار  بأوهامها  ...
وانا  العاشق  لأوصافها
وقلبي  يحن لو   شافها
ويرفع    رايته   ويسلم
عشان  تيجي  بأشواقها  ...
ويروق   الحال  ونتهنى
واحني   إيديها   بالحنة
وكحل  عينيها   يتعاجب
واشوفها حورية م الجنة  ...
وأتمنى تلاغيني ملاغية
واشوفها  حمامة  الغية
واكون  طيرها واغنيلها
واصونها  بروحي  عنيا  ...
ويهدى  البال  ونتعاهد
على  الإخلاص ونتواعد
وربنا  شاهد على النية
نكون   واحد    مانتباعد  ...
~~~~~~~~~~~~~~~~~~~
بقلمي  ..
معوض حلمي
منشأة بطاش
تمي الأمديد
دقهلية