وحشاني وانا معاكي .. بقلمي .. معوض حلمي

:: وحشاني وانا معاكي  ::

الأولة  ..
رحال ودفتي عنيكي
واغني بالموال واطير حواليكي
وحالي لو مال شراعي ف إيديكي
إمتى يروق الحال وارسى ف موانيكي  ..

والتانية ..
أنا المجنون وعاشق غناويكي
ياوردة ف البستان بدمي أرويكي
وافرد جناحي أمان م الريح واغطيكي
والبحر لو غضبان هاعوم واعديكي  ..

والتالتة ..
أحلف يمين الله وحشاني وانا معاكي
ولاعنكي قلبي تاه وعيوني عشقاكي
ياخدني القمر ف حماه على بالو أنساكي
أسهر أنا وياه وروحي وياكي ..

الرابعة  ..
أنا غاوي وصالك وناوي
أركب جناح الريح واكتب غناوي
ومطلع أغنيتي عشق وتباريح
واعمل عشانك طبيب مداوي ..
                              ~~~~~~~~~~~~~
بقلمي ........
معوض حلمي
منشأة بطاش
تمي الأمديد
دقهلية