سيجال مشترك .. بين .. نجاة حليم ومعوض حلمي

سيجال مشترك بين
الأستاذة  Nagat Halim
والشاعر.. معوض حلمي شاعر عامية
حول بوست الأستاذة نجاة حليم
~~~~~~~~~~~~~
 ما حدش بيموت م الحب
لكن فيه ناس بتموت م الجوع
و ماحدش حاسس بيها
نجاة عبد الحليم
~~~~~~~~~~~~~
M

ياحلمنا  الممنوع  ياطريق مالوش أخر
ياسمنا  المنقوع  ف اللقمه ليه  زاخر
سألنا ع الفرحه في كل شيئ مشروع
قالوا  السؤال  ممنوع  والفرح متاخر

N

القلب مليان  ......... مواجع
و العين بتذرف ........ دموع
و اللي احنا فيه... أمر واقع
واللي   راح  مالوش  رجوع  !!

M
اللي  راح   مالوش   رجوع
واللي جاي نفس الموضوع
جاي  رايح   مفيش   جديد
طب ليه  نعيش العمر جوع

N

طب ليه  نعيش  العمر جوع
وليه نطول .. في الموضوع
م  الورد  دبلان  في الربوع
والدمع ..  بيطفي  الشموع

M
والدمع  بيطفي  الشموع
والقلب     بات    موجوع
مشتاق  ترسم لي  دقاته
فرح       ولو     مصنوع

N

فرح       و لو      مصنوع
محتاجو  .. أكتر م الدموع
الدنيا  ...... أكبر مسرحية
تشوفها تشبع عطش وجوع !

M
والدنيا  أكبر   مسرحيه
فيها  الهنا  وفيها الأذيه
دموع حبيسه ف العيون
وعيون  بتضحك ع البليه
N

عيون    بتضحك   ع  البلية
و عيون  جميلة  و مستحية
و الدنيا  فيها  من  دا و دا
و عيون دموعها تكون عصية
M
وعيون  دموعها  تكون  عصيه
شايله  الألم  صابره ومستنيه
يجي  الأمل  من  بعد  خوف
وقلوب تطوف بالفرح متحنيه
N
و قلوب تطوف بالفرح متحنية
وانا قلبي فرحه يا دوب شوية
يا مين يبيع الفرح ،  و الحنية
وانا اشتريهم ولو غاليين عليّ
M
أنا   بياع  الفرح   والحنيه
وعمري  فدا  عمرك هديه
يازهره وسط غيط ياسمين
مين  يشبهك ياحمامه بنيه
~~~~~~~~~~~~~