هى كدا الدنيا .. بقلمي .. معوض حلمي

( هى كدا الدنيا )

___________

وحبيبتي
لابسه منديلها
وغازله ضفايرها
كما الصفصافه
ع  الترعه
نازله جدايلها
تبوس نيلها
يهل الصبح
ويجيلها
يغنيلها
على الأرغول
مع القمره
غناوي
البيضه والسمره
وقلبين
على الشجره
وشعرها المغزول
جدايل نور
تملي يقول
كلام معسول
دوا عنينا
وحرفين أسامينا
ع الساقيه والتوته
ونسمة حب
تتمايل
على اللحن
اللي ف النوته
ونسهر
ف الهيام ليلنا
طايرين
ومعانا أوهامنا
تاخذنا لفوق
حدا النجمه
نسايم شوق
تمرجحنا
بخفه وذوق
تفرحنا
وتيجي الشمس
تسرقنا
ف توجعنا
أشواقنا
وتجرحنا
لاجل نفوق
من شوق
ليالينا
ونركب مراكبنا
نحلم تعدينا
لبحور أمانينا
تضحك على
دموعنا
لو قلنا حبينا
وف بحر أحلامنا
تقسى وترمينا
هى كدا الدنيا
قاسيه على قلوبنا

هى كدا الدنيا
قاسيه على قلوبنا
________________
بقلمي ........
معوض حلمي
منشأة بطاش
تمي الأمديد
دقهلية