رباعياتي .. حياتي .. دي العيشه غليت .. بقلمي .. معوض حلمي

(  رباعياتي .. حياتي  )
________________

(  دي العيشه غليت   )

________________

دي العيشة غليت،يافايزه
وانتي .. البعيده بلا  دم
جيوبي فضيت .. وعايزه
سقياني كاس ..... الهم

دي  العيشه غليت مراحل
والإيد    يافايزه   قصيره
والهم   عشش  ما  راحل
نايم   معاي  ع  الحصيره

دي العيشه غليت مسافات
ومعادشي   صحه  تجاريها
ياما شالت كام مسا.. فات
هموم وتقلت  ...... عليها

دي  العيشه غليت خلاص
والناس  ما لاقيه  غداها
خايفه  ودعاها   الخلاص
يكفيها   يومها   وغداها

دي  العيشه  غليت ياعم
عايشين يادوب ع الكفاف
نشف   الوريد    م  الدم
والهم    زاد   ع  الكتاف

دي العيشه غليت ياخال
والرحمه    راحت   فين
ومنين    نجيب    المال
ومنين    نسد     الدين

دي العيشه غليت ياعين
وقلوبنا  عاصيه  ماتابت
والجوع  دا  كافر  لعين
والجته   م  الهم   دابت
_______________
بقلمي ........
معوض حلمي
منشأة بطاش
تمي الأمديد
دقهلية