.......... فاكره ياعمه ..........
.........................................
فاكره ياعمه ،
زمان اللمه على الطبليه
فاكره الدار ،
والجار الواهب عمره هديه
طب فاكره ياعمه ، اللقمه الحاف
ولحاف متقطع ميت حته
فاكره الناس وقلوبها أمان ، وحنان بيدفي الجته
طب فاكره المصطبه ف العصريه
، واللمه كتار
نعمل غديوه بلقمه هنيه
، والنيه خضار
وعيشتي زمان الغمه ياعمه
، وطرحه مرار
والزرعه المرويه أغاني التوكتوك
هاتطرح إيه غير خيبه وعار
والله ياعمه معادش وقار
واهي طرحت عود لبلاب
بيحضن لبلابه ف حرم الجامعه
وكل الناس ملمومه وسامعه
والخيبه ياعمه إن العامه
والناس في بلدنا
، اتقسموا لنصين
نص موافق
ويقولك عادي دا حضن
والنص التاني بيلعن في التانيين
وطريق ألغى ياعمه ،
بيبدأ بالتهوين
( نظره ، فابتسامه ، فموعد ، فلقاء )
وإيييييييييه بعدييييييين ... ؟
الحضن ... ؟
الحضن دسيسه من الخاينين
وبقالنا سنين وسنين تايهين
ونسينا نشوف لمرضنا علاج
والصفوه اللي المفروض يبقوا الناصحين
عقولهم محشيه بكوسه
سابونا في حوسه
المرض استفحل في حواري بلدنا
عبى الشارع وبيغوي ولادنا
ومناهج بتهد حصون
ومدارس من غير مضمون
وعقولنا صحون شوربه على خضار
ونسينا ان القيم المتهانه في ناسها ، ناسها صغار
ونسينا ان القيم المتهانه في ناسها ، ناسها صغار
.........................................
بقلمي الفلاح الفصيح
معوض حلمي
منشأة بطاش
تمي الأمديد
دقهلية
