ديوان أخر نبض .. بقلمي الفلاح الفصيح .. معوض حلمي

الديوان

قبل  الكلمه  المعيوبه


وصحيت  من  نومي
على  هيصه  وزيطه
في  يوم  مش  فاكر
كان  يوم  كام ..
ولقيت  الناس
في  الشعر  حويطه
بيقولوا  الشعرا  أضلوا  عوام ..
ففتحت  الفيس
ولقيت  تدليس  وكلام  هدام  ..
وماشوفتش  للشعر  قوافي
وشوفت  الشاعر  متعافي
وبيكتب  بدراع  فان  دام ..
والفكره  اللي  مخاصمه  المشهد
خلتني  اشهد  ان  احنا  ركام  ..
فقلت  الحق  واكتب  لي  قصيده
قبل  الشعر  مايبقى  حرام ..
واخطف  لي  كام  نسمه  رطيبه
قبل  الكلمه  المعيوبه
ماتيجي  كنوة  طوبه
وتجيب  لي  زكام  ..


.........  رافضه  الإنهزام  .........

كنت  سارح  بين  غيطان  الأمنيات
كنت  طاير ، زي  العصافير  ع الشجر
فجأة  حسيت  بالسكات
كنت  باحلم  بالفجر  يطلع  شقشقه
والليل  معاند  رافض  شعاع  الشمس
سرسب  الإحساس  شقى
واتخطف  ضي  العيون
كل  الوشوش  رغم  إختلاف  اللون
باشوفها  باهته  معتمه
ساعة  الوجع  كل  الملامح  قاتمه
شكل  الفرح  بقى  ضيف  عزيز
والجلد  كرمش  من  مرار  الإنتظار
والدم فار  م الاورده  بلغ  فرار
مالناش  نصيب  في  الإختيار
والقلب  مش  عارف  يعيش
رمينا  زهر  الآمنيات  طالبين  جوهار
وجالنا  شيش
وإزاي  أعيش  وأمد  ريش
والريح  معانداني
وبذرة  الأحزان  عفيه
ونبتها  شيطاني
ومين  اللي  وداني  لشلة  المحاسيب
وانا  الغريب  اللي  خوفي  غطاني
ضاق  المدى  والدمع  أصبح  مستباح
وإزاي  نطير  من  غير  جناح
حتى  الصباح  اترسم  وهم  وخداع
مين  اللي  باع ..؟
وإزاي  يساع  الكون  قلب  اترعش  م الخوف
صوت  الدفوف  اتوشم  في  وداننا  موت
فتح  التابوت ، مستني آخر نبض
والجته  رافضه  الإنهزام
رافضه  طلوع  الروح
طلعت  تدور  ع اللي  باقي
ف مخلة  الدراويش
ملقتش  غير  تناتيش  وجع
وحبة  امل  للبيع
فرت  الكراريس  يمكن  وقع
بين  السطور  لبن  الرضيع
مات  الربيع  قلب  الخضار  لبوار
دار  ع  المدار  الساقي
صوت  السواقي  لم  البواقي  نفير
والأرض  شقت  م الشراقي
نشفت  دموع  البير



..........   فاكره  ياعمه  ..........

.........................................

فاكره  ياعمه ،
زمان  اللمه  على  الطبليه
فاكره  الدار ،
والجار  الواهب  عمره  هديه
طب  فاكره  ياعمه ، اللقمه  الحاف
ولحاف  متقطع  ميت  حته
فاكره  الناس  وقلوبها  أمان ، وحنان  بيدفي  الجته
فاكره  ياعمه  براح  الجرن
وخبيز  الفرن  وعيشه  الصابح
والضحك  السارح  جوا  القلب
يطرح  حب  ف يملي  مطارح
طب  فاكره  حكاوي  العصريه
،ع المصطبه  واللمه  كتار
نعمل  غديوه  بلقمه  هنيه
، والنيه خضار
وجيتي  زمان  الغمه  ياعمه
، وطرحه  مرار
والزرعه  المرويه  أغاني  التوكتوك
 هاتطرح  إيه  غير  خيبه  وعار
والله  ياعمه  معادش  وقار
واهي  طرحت  عود  لبلاب
بيحضن  لبلابه  ف  حرم  الجامعه
وكل  الناس  اهي  شايفه  وسامعه
والخيبه  ياعمه  إن  العامه
والناس  في  بلدنا
، اتقسموا  لنصين
نص  موافق
ويقولك  عادي  دا  حضن
والنص  التاني  بيلعن  في  التانيين
وطريق  ألغى  ياعمه ،
بيبدأ  بالتهوين
( نظره ، فابتسامه ، فموعد ، فلقاء  )
 وإيييييييييه  بعدييييييين  ... ؟
الحضن  ... ؟
الحضن  دسيسه  من  الخاينين
وبقالنا   سنين  وسنين  تايهين
ونسينا  نشوف  لمرضنا  علاج
والصفوه  اللي  المفروض  يبقوا  الناصحين
عقولهم  محشيه  بكوسه
سابونا  في  حوسه
المرض  استفحل  في  حواري  بلدنا
عبى  شوارع  وبيغوي  ولادنا
ومناهج  بتهد  حصون
ومدارس  من  غير  مضمون
وعقولنا  صحون  شوربه  على  خضار
ونسينا  ان  القيم  المتهانه  في  ناسها ، ناسها  صغار


            عرش بلقيس 


في  إجتماع  الأوليا  من  كل  عام
أو  حسب  مستجدات  المآسي
للبت  في  أمور  ...... العوام
والبحث  في  شئون  الكراسي
والمصايف  واللطايف  والشماسي
والأماسي  والنغم  ويا الدفوف
وتعالى  شوف  لحم  الخروف
عبوا  البطون  والناس  جياع
وابتدينا  ............ الإجتماع
والإنصياع ........ والإستماع
هم  واحد  من  سادات  المتخامين
وإعتلي  صدر  المنصه
بس  كان  الشوف  معتم  حبتين
بص  بصه  في  السما
كأنه  بيعد  النجوم
ساد  الوجوم  والهمهمه
مسك  المايك
(  مالي  لاأرى  الهدهد  )
شق  السكات  صوت  إنما
من  بين  جموع  الغلبانين
جئتك  ياسيدي  بالخبر  اليقين
واحلف  بجاهك  ميت  يمين
شوفت  الطيور  قالت  خلاص
هربت  وعدت  للخلاص
لما  لاص  العدل  بإيدينا  إنهزم
بيعنا  المبادئ  والقيم
عرش   بلقيس  إتهدم
عبت  ولادها  في  الملاجئ
والخيام  أو  في  الكفن
كل  العروش  في بلادنا
قد  صابها  العفن
عودنا  لزمان  التيه
عايشين  شتات  من  غير  تمن
ورجعنا   لعبادة   ........ الوثن
ولا  عاد   سبأ   ولا   عاد   نبأ
ولا  فجر  شقشق  في  اليمن


  الخمسميه

يآآآآه  فاكر .........  زمان
والبيوت  فاتحه  ... البيبان
للضيوف   قبل ... الجيران
والمصاطب  لمه  ....  ميه
قبل  هم ....... الخمسميه

كنا  واحد  في .... الهموم
والفرح  كان  ... ع العموم
ياريت   زمنها   كان  يدوم
ولاعشنا   ايام  ... الآسيه
لما  شوفنا   .. الخمسميه

ليه    بقى   نعرق  ونتعب
والحيتان   لعرقنا ... تنهب
والغلابه  حالتها ... تصعب
والفاتوره   عشان .. رزيه
عايزه   حسبة    خمسميه

حداد  وشايل ....... عدتي
لفيت  حواري ....... حتتي
شاطر    وغاوى   صنعتي
زي  الحمام   والعش  غيه
بس     فينها    الخمسميه

فلاح   لكني   واد   أراري
ازرع  اخضر  في  البراري
معرفش  الاوع  أو  اداري
والإيدين  مش  طايله  ميه
ولاطايله  حتى  الخمسميه

خياط    وراسم     غرزتي
لاضم    كرامتي    بفتلتي
ومكنتي   جاهي   وعزتي
والحاله   صعبه   ع الرعيه
منعاني    الم   الخمسميه

والرحمه  راحت  فين  ياخال
والحب  أصبح  شيئ  محال
عايشين  شتات  وحالنا  حال
تايهين  ورا  الخطوه  الغبيه
عشان   عبدنا  الخمسميه

.....  ضي  الصباح  .....

..........................

يابلدنا  ........... ياعفيه
إطرحي  ضي .. الصباح
لمى   في  ولادك  وفيا
اندهي  نشيل   السلاح

ع  اللي  غادر  بالوراثه
واللي   فاجر  بالدناسه
واللي   تاجر  بالنخاسه
واللي  خان عهد الملاح

يابلدنا  ........... ياعفيه
إطرحي  ضي .. الصباح
لمى   في  ولادك  وفيا
اندهي  نشيل   السلاح

ع  اللي   فرق  موكبك
جاي   وناوي    يهزمك
واللي    غرق   مركبك
وسع  ............ جراح

يابلدنا  ........... ياعفيه
إطرحي  ضي .. الصباح
لمى   في  ولادك  وفيا
اندهي  نشيل   السلاح

راح نعادي اللي يعادينا
واللي خان  العهد  فينا
واللي  ناوي  يقل  بينا
يبقى   موته    مستباح

يابلدنا  ........... ياعفيه
إطرحي  ضي .. الصباح
لمى   في  ولادك  وفيا
اندهي  نشيل   السلاح

لاجل  نبني  .... للعمار
مجد   لولادنا    الصغار
يحكوا  عنا  ..... بإنبهار
والأمل  يوسع  .. براح

يابلدنا  ........... ياعفيه
إطرحي  ضي .. الصباح
لمى   في  ولادك  وفيا
اندهي  نشيل   السلاح

ينتهي  عصر  ... البوار
والأراضي  تعود  خضار
نستعيد  ...... الإزدهار
بالعرق  .... ويا الكفاح

يابلدنا  .........  ياعفيه
إطرحي  ضي .. الصباح
لمي  في  ولادك  وفيا
اندهي   نشيل  السلاح

 أنا  أيوب

أتوب  إزاي  وانا  أيوب
موجوع  لكن  باداوي  قلوب
ماشي  الخطوه  بالإحساس
وسلاحي  القلم  والفاس
وانا  المعنى  بهموم  الناس
باداويهم  وابات  مغلوب
أتوب  إزاي  ..

أتوب  إزاي  وانا  أيوب
على  كل  السكك  مصلوب
برغم  الفقر  سيف  جلاد
لا انا  بايع  ولا عواد
أنا  زارع  لناسي  الزاد
لا انا  باير  ولا  معطوب
أتوب  إزاي  ..

أتوب  إزاي  وانا  أيوب
وانا  عايش  في  كون  معيوب
مابين  لقمه  وغموسها  الحاف
والعيشه  اللي  بالإسفاف
والناس  اللي  عايشه  كفاف
والجهل  اللي  عبى  قلوب
أتوب  إزاي  ..


فلاحه 

دي  ست  الحسن  فلاحه
وشاطره  في  شغل  الغيط
نظرة  عينها ....... دباحه
واستاذه   في  الإيتيكيت
لا كانت  بالعلوم  سامعه
ولا راحت  في  يوم  جامعه
ولا  قالت  ياناس  كليت
ولو  تسألني  ليه  حبيت
هاقول  شدتني  فطرتها
لا  انا  مسحور  بمشيتها
ولا عاشق  حلاوتها
لكن  عفتها  تاج  البيت
واقول  طبيت
وانا  دلتاوي  م المنصوره
جميل  الصوره  والتقاليد
وهيه  غزاله  مسحوره
في  عيوني  جمالها  يزيد
وأقيد  أشواقي  حواليها
واقول  بسم  الله  تحميها
واشوف  في  عينيها  طاقة  نور
ماهيش  طمعانه  تبني  قصور
ولا بتدور  على  كيفها
بتسحر  كل  من  شافها
على  كفوفها  ينام  الورد
ولو  نامت ..؟
على  صوت  ألآدان  تصحى
تصلي  الفرض
بسر  الحمد  تتوضي
وتتعطر  بريحة  الأرض
وعرق  الجبين  من  فوق
سايل  على  خدودها
زايد  شوق
ولما  تروق  وتتهني
تشوفها  حوريه  م الجنه
بتربي  ع الأصول  والذوق
ولو  سمعت  على  التلفاز
كلام  هايف  وخلق  نشاز
بتتحاور  في  أمر  عجيب
بأن  الست  تتساوى  مع  الراجل
تداري  كسوفها  وتعاجل
تقولك  عيب
وماتخبيش
ولو  هاتجوع  وتلبس  خيش
تقول  مستوره  وتخبي
تفيض  من  روحها  وتعبي
حياه  للعيله  لاجل  تعيش
وتنفش ريش  وتحمي  البيت
وانا  لفيت  بلاد  الناس
باكتب  عنها  بالإحساس
وماوفيت
وافتح  قلبي  وازرعها
سجر  فاكهه
واشيل  م الورده  اشواكها
واجيبها  لها  قمر  وناس
وماكفيت


..  إشرب  ياحزين  ..

إحنا  اتنين
ماحناش  واحد
وكمان  ضدين
في  الفكر  وفي  المنظر
وهوانا  شمال  ويمين
والنسمه  الطايره  لفين
مقسومه  مابيني  وبينك
مرسومه  بخط  احمر
ممنوع  اللمس ،
وانا   أمري  بإيدي
وإيدك  في  كلبش
والعزه  وريدي
ووريدك  نبته  محلبش
وأبويا  النخوه
اللي  بتجري  ف دمي
لما  نصحني  خدها  فقيره
تعيش  مستور
وانا  عايش  وبقلب  جسور
ولأنك  عيره  بطبع  كسول
وطيت  ومضيت  على  شيك
هاتعيش  مأمور
والفرق  مابيني  وبينك
حد  مابين  الضلمه  وبين  النور
وانا  بالنور  فايض  إحساسي
وأساسي  متين
وأساسك  انا  عارفه  منين
والزمن  أهو  عدي  مابين  عمرين
لو  تحسب  عمري  قبال  عمرك
انا  عمري  اتعاش
وانا  عالي  الراس
وعمرك  عدي  بلاش
ومداس  للناس
واشرب  ياحزين

..  أم  ترتر   ..

أم  ترتر  أحلى  أوردر
للي  غاوي  يروح  ويسكر
ليها  نهج ، وليها  حانه
واللي  يقبل  شرطها
يبقى  يشرب  نخبها
ويركع  مهانه

أم  ترتر  بالمناسبه
شاطره  جداً  في  المحاسبه
شايله  دايماً  أله  حاسبه
في  المفارق  ع الطرق
حتى  الطوارئ
ومهما  كان  الأمر  طارئ
إسمع  كلامي  واتزبط
ولو  هاتعمل  يوم  لبط
هاتشق  جيبك  بالعبط
وهاتفحصك ، وتمحصك
وتشخصك ..
وتقطعك  حسب  الطلب
جلدك  مناسب  للشنط
والكلاوي  والقوانص  والكبد
مالهومش  لازمه  في  الجسد
وإن  قالوا  قلبك  قد  فسد
إياك  تجادل  بالغلط
راح  تقنعك  لو  بالبلط

أم  ترتر  لما  تلمع
إوعي  وشك
قول  لها  نعمين  وحاضر
واوعي  تعمل  فيها  شاطر
تزرعك  وتقوم  تحشك
وابنها  المدعو  بترتر
واد  مذاكر
فهلوي  والمهنه  تاجر
ولو  تتاجر  في  الفلاتر
يسخطك  دبور  يهشك
ف احمي  نفسك  م المخاطر
دا  ام  ترتر  لما  تلمع
إوعى  وشك
قول لها نعمين وحاضر

 ام  ترتر  لما  تفقس
فقسها  يطلع  حيتان
واحنا  برضه  من  حسبها
ومن  نسبها
ف ضل  بابها  ديدبان
فا ليه  نجيبها  في  كل  أزمه
وهي  لينا  نور  ونعمه
واللي  ينكر  خيرها  يعمى
ويبقى  جزمه  وابن  جزمه
تنكره  ويصبح  مهان
دا  ام  ترتر  لما  تفقس
فقسها  يطلع  حيتان

أم  ترتر  عينها  حمرا
ام  ترتر  إيه   يافالح
أم  ترتر  عينها  حمرا
شايله  إيدها  م المصالح
قاعده  فايقه  في  المحطه
شايله  شنطه  سيورها  سمرا
وحط  تحت  الشنطه  شرطه
واوعي  تسأل  ع اللي  فيها
راح  تضيع  وتروح  أونطه
وإن  لقيت  الصبر
طالع  عن  قضيبه ، إياك  تعيبه
قول  دي  عين  وسهامها  جمره
دا  ام  ترتر  عينها  حمرا
وبرضه  هى  أحلى  أوردر
للي  غاوي  يروح  ويسكر
ليها  نهج ، وليها  حانه
واللي  يقبل  شرطها
يبقى  يشرب  نخبها
يركع مهانه ، وهو خايف
ساعتها  هاينول  المنى
وتيجي  ليه  متزينه
حاطه  روج ، واحمر  شفايف

..  قلبك  يطل  ..

دي  معجزه
قلبك  يطل
وقلبي  ينسى  النرفزه
وضحكي  يملى  الدنيا  فل
واقول  تملى  هكذا
قربك  يدوم  تبقالي  ضل
وتنادي  نهرب  م الهموم
نطير  سوا  فوق  الغيوم
يرد  قلبي  بسرعه  جاي
مانا  أصل  قلبي  لسه  حي
ولسه  طارح  نور  وضي
شرط  نهرب  للسعاده
وتبقى  عاده  كل  يوم
وندعي  للأفراح  تدوم
ونعوم  في  بحر  من  الهوي
وندوب  في  إحساسنا  سوا
ونلقى  الدوا
وشموع  تقيد  وفرحنا  زفه
إيد  في  إيد  وقلوبنا  دفه
وتبفي  عادي  المعجزه
قلبك  يطل
وقلبي  ينسى  النرفزه

.. عاشق  للضيا  ..

أنا  إنسان
ولسه  قلبي  طاقة  نور ،
وعاشق  للضيا
موجود  وشاهد  ع العصور
قبل  الرسل  والأنبيا
عيسى  النبي
أخو  الحبيب  المصطفى
مسلم  مسيحي
إحنا  اتعاهدنا  ع الصفا
والناس  في  طيبه  الطيبه
زارعه  الوفا
داسوا  عليها  الأغبيا
وخربت  ذمم
وليه  يافكر  سفيه  ،
دنست  العمم
واخدنا  لزمان  التيه ،
صنم  يعبد  صنم
الفتوه  مش  تلبيخ ،
ولااحنا  قطيع  غنم
انا  اللي  صليت  عشانك
ركعتين  قبل  الوجود
والدنيا   لسه   مضلمه 
وطارحه  دود
لاجلك  دعيت  قبل  الآدان
قبل  الفروض
يبعد  شيطانك  عننا
وتبقي  بلدي  آمنه ،
عاليه  الهمم

..... سوبيا .. سوبيا .....

سوبيا  ..   سوبيا
انا  واحد  بياع  سوبيا
وعندي  الطعم  الاصلي
مين  يشتري  مني  ..؟
المشروب  حصري
بدم  معتق  من  سوريا  وليبيا
سوبيا  ..  سوبيا
انا  واحد  بياع  سوبيا


وطلعت  أصور  في  الواقع
شوفت  مواقع  في  الصوره
بقت  محظوره
ومحذوفه  بشرطه
وسوريا  بقت  أطلنطا
وجابوا  لنا  خريطه  وبالعربي
للوطن  العربي  على  الحيطه
مرسومه  أونطه
جواها  الناس  أشباه  ناس
وعقولهم  محشيه  بلوبيا
سوبيا  .. سوبيا
انا  واحد  بياع  سوبيا

ومعايا  السنه  على  الشيعه
لتنين  شربوها  خديعه
والفكره  شنيعه
والحرب  الدايره  فظيعه
في  اليمن  المقطوع  شريانها
لحد  ودانها
غرقانه  ف حوسه
يابت  يادوسه
بقينا  بطاطس  مهروسه
 في  قعر  الخلاط
ورمونا  ككسر  بلاط
ورجعنا  لعصر  الوطواط
والضلمه   لواط
ومشانق  منصوبه  على  السيبيا
سوبيا  ..  سوبيا
انا  واحد  بياع  سوبيا

ومعايا  مكايد  مرصوصه
م الدار  البيضا  لسوسه
من  مسقط  للمحروسه
والوطن  العربي  الهايم
هربان  من  حلمه  ونايم
بتزن  على  ودانه  ناموسه
وربيعه  مكانش  مفاجأه
كات  خطه  ومدروسه
وجواسيسهم  مدسوسه
نشروا  مابينا  الفوبيا
سوبيا  ..  سوبيا
أنا  واحد  بياع  سوبيا

عبوا  لنا  الأوهام  في  قزازه
وشربنا  بكل  لذاذه
دمنا  سايل  نازل  طازه
ودواعش  مننا  فينا
مفاتيحهم  في  إيدين  أعادينا
ماتقوم  يامراكبي  وعدينا
ملينا  أنين  وأكلنا  الطين
وسنين  كوبيا
سوبيا  ..   سوبيا
انا  واحد  بياع  سوبيا

ومعايا  نصيحه  بذمه
الأقصى بنادي  الأمه
القدس  ياأهل  الهمه
إيجى  المحتل  ودنسها
هدم  معالمها  وداسها
والناس  اهو  مات  إحساسها
كالسمك  المحبوس  في  الجوبيا
سوبيا .. سوبيا
انا  واحد  بياع  سوبيا

يامتاهه  وتواهه  وهوجه
وحدودنا  بيرسمها  الخوجه
سهانا  واكلنا  النوجا
عبي  لنا  الخيبه  ف قرطاس
نيمنا  على  وداننا  وهاص
والوطن  العربي  أهو  لاص
مات  الإخلاص  يازنوبيا
سوبيا  ..  سوبيا
انا  واحد  بياع  سوبيا

..  شبكتي الفضه  ..

انا  جايلك  ومش  عارف
وقلبي  م الصدود  خايف
ومش  شايف  لزوم  للعند
ولا ناوي  كمان  ع البعد
وليه   الظن   يهزمنا
وساق  في  دلاله  ع الآخر
مابين  عندك  وبين  عندي
ويمشي  مابينا  يتفاخر
فياريت  ياحبيبتي  نتفاهم
عشان  غيرتك  بتوجعني
وتوهت  ف حيرتي  مش  فاهم
وليه  الفرح  غاب  عني
وسابني  أعوم  في  بحر  هيام
ومين  عباكي  بالأوهام
ومين  قال  لك  عليا  كلام
فزاد  الشك  وظنونك
وزرعتي  الطريق  ألغام
لا انا  عارف  أخطيلك
ولا قادره  خطايا  تمد
وانا  مادد  حبال  الود
ومش  ناسي  اللي  كان  بينا
سنين  عشناها  في  الجنه
فتطرح  ضحكتك  حنه
فتتحنى  خدود  الورد
وليه  زاد  البعاد  والصد
وكلمة  شر  تصبح  سد
ماتيجي  نسد  باب  الريح
ونداوي  القلوب  مجاريح
وانا  عندي  مراكب  ذوق
مخبيها  في  بحر  الشوق
عشان  تهدي  ولا تخافي
واعديكي  بمجدافي
مع  النسمه  اللي  طايره  لفوق
لا انا  عاشق  للرموش  السود
ولا  الخد  اللي  مروي  ورود
أنا  موعود  بإحساسك
وطمعان  من  الآخر
واقول  يمكن  حبيبتي  تروق
وتقبل  شبكتي  الفضه
واميل  لعيونك  اتوضي
ومين  يرضى  يقول  لحنانك  اتاخر
وليه  الظن  يهزمنا
وساق  في  دلاله  ع لآخر
مابين  عندك  وبين  عندي
ويمشي  مابينا  يتفاخر


..  عند  أرض  العوده ..

عند  أرض  العوده
عدوا  الحلوات
قلت  يالا  بعوده
هانشوف  قمرات

الخطوه  متنشيه
من  رن  خلخالهم
جايين  من  المنشيه
كن  الغفير  خالهم
فطلعت  أشوف  احوالهم
واسأل  على  النيات

عند  أرض  العوده
عدوا   الحلوات
قلت  يالا  بعوده
هانشوف   قمرات

ناديت  لعمي  قناوي
ونزل  لي  م الجرار
لقيته  جاي  وناوي
يقلبها  احلى  هزار
قال  لي  المدام  في  الدار
والحظ  يابني  ساعات

عند  أرض  العوده
عدوا  الحلوات
قلت  يالا  بعوده
هانشوف  قمرات

لابسين  ياناس  الأرطه
طايرين  كما  الغزلان
الكحل  مرسوم  شرطه
والحسن  منهم  بان
ناديت  وانا  الغلبان
قالوا  الهوى  مقامات

عند  أرض  العوده
عدوا   الحلوات
قلت  يالا  بعوده
هانشوف  قمرات

ماشين  بكل  لطافه
وغنوا   ع  النوته
راحوا  حدا  الصفصافه
وعدوا  ع التوته
وانا  قلت  دول  حدوته
بس  في  الحكايات

عند  أرض  العوده
عدوا   الحلوات
قلت  يالا  بعوده
هانشوف  قمرات

غمزوا  بطرف  عنيهم
وقادوا  فيا  النار
شاور  لي  قلبي  عليهم
وقال  ماليش  أعذار
واهو  فجأه  سابني  وطار
ولا  قال  يابوي  سلامات

عند  أرض  العوده
عدوا   الحلوات
قلت  يالا  بعوده
هانشوف   قمرات


          الأغاني  اللولبيه

ياحياتنا  ..........  ياغبيه
         فيكي حاجه ... متوهاني
الحمام  هايص  في  غيه
         والبشر  بقى  ليه  أناني
يعشقوا  كلمة ...... أذيه
          يدبحوا  نبض .. المعاني
رجعوا  عبد ..... الوسيه
          والثقافه .... الأمريكاني
والمبادئ ... كوفتوسيه
          والشرف  بقى للغواني
والأغاني ....... اللولبيه
           يابهيه ......... مجنناني
ضيعت  أجيال .... عفيه
           وسط   غابه  م الأماني
والعيال الطالعه ... ديه
           م التوابع   راح   تعاني
المشاعر مش .... عفيه
            نايمه  فيا .... مدفياني
خايفه   تطلع  م الأسيه
            مستحيه تشوف زماني


.. آمين  ياسي  السيد  ..

طلعت  الصوره  م الألبوم
وقلت  اتخيل  المنظر
أمينه  وراضيه  بالمقسوم
وسي  السيد  بيتمنظر
وشوفت  أمينه  تتودد
وتتنهد
في  قاعدة  ود  كات  بينهم
وباينه  عنيها  مكسوره
ونازله  الطرحه  ع القوره
فقال  لها  قولي  ياأمينه
وطلعي  كلمه  محشوره
وناويه  لإيه  .. ؟
قالت  له  أمانه  تسمع  لي
وان عقلي  شط  تشفع  لي
وتسمح  لي
أزور  قبر  امي
واطل  عليه
فطار  عقله
وبان  الشرار  في  عينيه
 وعلى  الصوت وقال  بعديييين
أمينه  : ....
وحشكي  الضرب  ع الخدين
يابنت  الإيه
وجينا  لزمان  التيه
معادش  زمانه  سي  السيد
ولا عاد  بعاداته  متقيد
ولا متعود  يعلى  الصوت
ولا بيقيد  حضور  مظبوط
إحم  ..  إحم  ..  إحم
فتجري  أمينه  تفتح له
وتفرش  له  هواها  سكوت
وتشيل  قفطانه  والطربوش
ويقعد  هو   متسيد
كديك  منفوش
وهى  سنانها  بتكتك
وتقلع  جزمته  الأستك
وتغسل  له  كمان  رجليه
وتنادي  عليه  وبتسيد
وان  قال  ضاااالييين
تقول  له  آمييييين
ياسي  السيد


ولد  الولد

جوا   البيت   وسط  العيله
ووسط  اللمه  وقلبي  سعيد
إتوضيت  لاجل  صلاة  الجمعه الجامعه  الناس ...... للعيد
قبل  ماخطي  الخطوه  لبره
قامت  ستي  وسر  سعادتي
تحضن  قلبي  وتعدل  ياقتي 
كأني  صغير  لسه ... وليد

ولد  الولد  في  عين  الجده
زي  الصقر  ف  وسط  الطير
كانت  فارده  قلوعها  وماده
كات  شيفاني  كأني  أمير
شافها  ابويا  وقال  لها  يامه
حسبي  شويه  الواد  بيتدلع
قالت   مالك  ليه   هاتولع
شكلك  لسه   ياواد  بتغير

بكره     تشوفه     عريس
وهايسعد   أهلي   ناسي
ولما   يجيب   لك ..... واد
هاتجرب  نوع    إحساسي
ولد  الولد   ياولد   حشايا
ساكن  جوا  خبايا   الروح
لمسة  إيده  تداوي  جروح
ونظرة  عينه  بتروي  يباسي

واتجوزت   وجيبت   لابويا
الواد  والبت  ياريتك  شوفتي
نهر  حنانه  ،  ونظرة  عينه ،
ولهفة  قلبه ، كنتي  ضحكتي
لما  يشيل  على  ضهره  ولادي
وانادي  يابويا   الواد  بيدلع
ياخدني  الشوق  لحنانك  وادمع ، ألفين  رحمه  عليكي  ياستي


  دنيا حويطه 

دنيا  حويطه ... بحورها  غويطه
بانيه  حواصل .......... للشطار
واحد  يزرع  فيها ....... ويقلع
واحد  قاعد  بس ......  بيجمع
وواحد  عامل  سيما  .... وزار
واحد  طاف ....... لف  وشاف
مره  يجازف  مره ....... يخاف
ومره   يدوس   ويشيل  أوزار
وانت  عشان  تفضل ... إنسان
مش  هاتقول  إنك .....  تعبان
ولاهتبان  تشكي ...... الأعذار
واحذر  من  غربان ..... الغيط
لو  هاتعاند  تبقى ...... عبيط
طيطه  ياطيطه  بحورنا  غويطه
دنيا  حويطه  وقايده ..... النار

.. فلاش  باك  ..

ماحناش  في  الحب  ياناس  اتنين
ولا  كنا  عينين   بتبص  لبعض
دوبنا   حنين   ودموع   وأنين
إحساس  القرب   بيشدنا  شد
واهو  عدى  الحد
وقلبي  الطيب  سهاني
راح  يسأل  على  نصه  التاني
علشان  يرضيه
مشتاق  لعينيه
وانا  ليك  أشواقي  بتغلبني
وتنام  في  عيوني  وف النني
وأنام  في  عينيك  يامجنني
وإزاي  قادرين  شياطين  الجان
 ياخدوك  مني
دول  زعارفيني  بحبك  موت
وأموت  لو  غيرك  يشغلني
واستني  تفوت  والنور  حواليك
وأنادي  عليك ، فترد  آمين
وافرش  لك  كل  سنيني  حنين
يناديني  هواك  مطرح  ماتكون
وأطير   وياك   لحدود   الكون
ونكون  حبيبين  وهوانا  هيام
وإن  مال  الهوا  في  عيونك  نام
انا  هابقى  حمام
وابني  لك  عشي
بقشه  محبه ، وقشه  غرام
وافتح  لك  قلبي  الأخضر
لاجل  ماتمشي  وتتمختر
على  عيني  ورمشي
وتجيني  هناك
وارجع  بالذكرى  فلاش  باك
لهنايا  معاك
والآقيك  طاير  بتقرب
بجناح  من  ريش
بتطمن  قلبي  وبتطبطب
تداوي  لي  الآآآآآه
ويمد  شعاع  الحب  مداااااااه
يااااااااااه
يحلالي  الحلم  واكون  وياك
واسرح  في  عينيك  لمشاء  الله


 (  طبع  الهوى )


قالوا   الربيع  ع الباب
            جاي   بالرضا   والنور
وانا   والربيع   أحباب
            من  عهد   مينا  وحور
والحب  ليه .... أسباب
            فارد  نداه ... ع الدور
طبع  الهوى .... غلاب
            وبيكشف .... المستور
والبنت  دي ... شارده
            عديت   عشانها   بحور
ومشاعري  نار  قايده
            خلاص   بقيت  مسحور
طلت  كما ..... الورده
            زي  القمر ...... بتدور
قلبها  ............. جنه
            وانا  قلبي  طاقة   نور
لما  اكتفى ....... غنى
             حنى    الصبايا   الحور


المشاعر  مؤمنه


أنا  لما  أقابلك
مش  هاقابلك  إلا  ومشاعري  مؤمنه
أنا  جاي  أقابلك
والمحبه .. جوا  روحي  كامنه
إمتى  اللقا .. طمن  لي  قلبي  اللي  انكوى
دا  الهوى .. مالهوش  كبير
عاشق ..  باغير
فابني  عشك  بالأمان  خليني   طيرك
هافرد  جناحي  بالحنان  وافرح  واجيلك
وعيدك .. يملى  كل  الكون  غنا
ويبقى  عيدي
وأمد  إيدي  .. واعزف  حروفك  دندنه
واجي  اقابلك  والمشاعر  مؤمنه

مشتاق  أقابلك
مشتاقه  روحي  لطلتك  لحظة  لقاك
واطلع  أدور  في  الوشوش
على  وش  فيه  من  نور  سناك
لكن  فاشوش  كل  الوشوش
لبست  رتوش  قناع  هلاك
أو  ضحكه  تشبه  ضحكتك
ضحكة  ملاك
ولا وش  فيه  من  رقتك
ولانسمتك  مرت  هناك
وانا  نفسى  اشوفك
واحضنك .. واسهر  معاك  شهر  وسنه
واقول  قابلتك  والمشاعر  مؤمنه

أنا  مش  هاقابلك
والكلمه  عاشقه  بحرها
لاجل  تتعايق  قصايد .. والشاري يدفع  مهرها
أو  تاخد  نيشان
ولا  هارسمك  بين  القوافي  صولجان
انا  جاي  اقابلك
لما  احسك .. طاير  في  روحي  بالوما
واسمع  لهمسك  همهمه
وأطير  في  السما
بين  النجوم .. وانسى  العنا  والعكننه
لما  صوتك  يجي  بالكلمه  الحنونه
ارجع  سعيد .. والمحك  جاي  من  بعيد
طيفك  ..  جديد
يجري  في  وريدي .. واشد  عودي .. واشوف  وعودي .. بضحكه منك .. تنام  في  حضنك
آمنه
واسرح .. إزاي  ملكت  الروح .. والروح  للقلب  جاه
وازاي  جسد  يقدر  يعيش .. ويمد  ريش .. من  غير  حياه
طيفك  دليل  ..  همسك  سبيل .. وانا  ماشي  ليك  ناسي  الأنا
وجاي  اقابلك  والمشاعر  مؤمنه

أنا  جاي  أقابلك
تايه  في  بحرك  شريد .. مرسايا  شطك
فإياك  تسيبني  هناك  غريق  .. يقتلني  صدك
وانا  قلبي  م  الأشواق  ضعيف .. قابلني  بالخجل  العفيف
حبي  الشريف .. زي  الندى .. رسم  المدى .. أحلام  كتير
عشان  اطير  مستني  رعدك
يهل  بالمطر  الوفير
تحضني  نسمه  حنينه
واجي  أقابلك  والمشاعر  مؤمنه


شيخ  البلد

مدد   مدد   مدد    مدد
عم  ابراهيم  شيخ  البلد
العزه  فينا ......... للممات
وازاي  يقولوا  المصري  مات
والمصري  أصل  المكرمات
لو  مات  يموت  بعده  المدد
مدد   مدد   مدد    مدد
عم  ابراهيم  شيخ  البلد

عم  ابراهيم  شق  السكات
وحروفه  تحكي  لنا  حكايات
علمنا  نرفعها .... الهامات
نبني   ونزرع   في   البلد
مدد   مدد   مدد    مدد
عم  ابراهيم  شيخ  البلد

بيشد  خيمه   ويبني   دار
ويعلي  دايما  في  الجدار
ويمد  إيده  لكل ...... جار
والعزم  منه ........ بيتولد
مدد   مدد   مدد    مدد
عم  ابراهيم  شيخ  البلد

فلاح  وجايلك  نفسه   فيك
طمعان  يشوف  نظرة  عينيك
وينول  كمان  لمسة  إيديك
عارفك  ياخال  ضهر  وسند
مدد   مدد   مدد    مدد
عم  ابراهيم  شيخ  البلد

قلبك  ياخال  أبيض  حليب
ساكن   قلوبنا   لم  تغيب
إنت  الوحيد  للروح  حبيب
وإنت  المتين   زي   الوتد
مدد   مدد   مدد    مدد
عم  ابراهيم  شيخ  البلد

نضرب  له  ميت  تعظيم  سلام
شاعر  ومهموم ... بالعوام
زي   الولي  صاحب   مقام
حواليه  ندور  زايدين   عدد
مدد   مدد   مدد    مدد
عم  ابراهيم  شيخ  البلد

في  الحق   عزمه   لايلين
زي  الأسد  حامي  العرين
نسمع  زائيره  نقول  آمين
نفديه  بروحنا  ....  وللأبد
مدد   مدد   مدد    مدد
عم  ابراهيم  شيخ  البلد


......... عاشق  همستك ........

من  غير  هدف
على  سكتك  قلبي  اتحدف
كل  اللي  عدي  قبل  منك
ياحياتي  يتحذف
كتبت  إعلان  في  الصحف
انا  لو  هاموت  على  سكتك
ميت  شهيد ، ميت  تمني
تبقي  فرحة  دنيتي
وتبقي  مني
أنا  أصلي  عاشق  همستك
من  صغر  سني
وإن  قالوا  مسحور  واتنده
وركبني  جني  يكفيني  إني
مهما  غيبتي  وروحتي  عني
ماشي  الطريق  مليان  هيام
رافض  شعور  الإنهزام
قاصد  مقامك  ياحبيبتي
وسيبت  رزقي  للصدف
ياتيجي  نظره  من  عينيكي
تقول  لي  حبك  قد  ازف
ياتغيبي  عني  وارتجف
وامشي  الطريق
من  غير  هدف

من  غير  هدف
على  سكتك  قلبي  اتحدف
وكل  اللي  عدي  قبل  منك
ياحياتي  يتحذف

وكل  اللي  عدي  قبل  منك
ياحياتي  يتحذف


 قتل  براءة  ولاده

باعترف
إن  انا  خالي  م الإحساس
وإن  الشعر  لو  مايل
شيطان  خناس
شربت  منه  مش  بحساب
وكتبت  كتير  عن  العشاق
وقلوب  دابت  من  الأشواق
صورت  الجنه  بحروفي
كلام  كداب
ونسيت  إن  الشيطان  سارح
وله  أحباب
غضيت  الطرف  عن  أسبابه
ومين  جابه
ومين  فتح  بابه
ومين  عمله  حجاب
وعشنا  الزمان  مغلوط
شربنا  كاس  المر
ونسينا  طعم  التوت
وأب  الجهل  كان  زاده
قتل  براءة  ولاده
بقلب  طاغووووووت
وانا  بانده  بعلو  الصوت
ملعون  ابو  حروفي
وإحساسي  وأشعاري
وتاري  اللي واقف
بيني  وبين  روحي
وجروحي  اللي  مفتوحه
بتنزف  موووووووووت

.. أنا  عنتره ..

رغم  الظروف  والنوم  قرف
وسبع  قد  أصبح .....  مره
وملعونين   باعوا   الشرف
والدنيا  أضحت  ..... مقبره
        .. أنا  عنتره  ..
أنا  ................   عنتره
حارس  قبيلة  ..... سيدي
والنار  تشعل  ... موقدي
وسيفي  يصرخ  في  يدي
والنخوه  باقيه ... مخضره
       .. أنا  عنتره  ..
أنا  ................   عنتره
عبدن   يساوي   ألف  حر
أسد     إذا    قالوا    كر
أحمي    الحرائر   لا  أفر
فارس   بقلب    القسوره
      ..  أنا  عنتره ..
أنا ..................  عنتره
أجيد    الحلب  .... والضر
وعبيل   عيني  .. والنضر
وشعري  فيها  .... يغتفر
يروي  الأراضي  المقفره
       ..  أنا  عنتره ..
انا   ................  عنتره
هاعدي   ربعن  .... خراب
بين  الضواري  .. والدياب
واطوي  الصحاري  الصعاب
واجيب  لك  نياقن  نادره
      .. أنا  عنتره  ..
انا  ...............  عنتره
سيفي  قد  شق  الغمام
ومفرج   ابن  ....  همام
وعماره  الزيادي ... ينام
لو   قالوا  جايلك  عنتره
     .. أنا  عنتره   ..
أنا  ................. عنتره
وقت  الضعان  انا  الهمام
ويرمي   شيبوب  السهام
يحميني  من   مكر  اللئام
لنرد  كيد ........  الغادره
       .. أنا  عنتره  ..
انا   ................  عنتره
فارس  لكل ...... الأزمنه
شاعر  مشاعري   مؤمنه
صيتي  مالي .... الأمكنه
وسيرتي  غاليه   معطره
       ..  انا عنتره  ..

         .. ( عيد  سعيد ) ..

عيد  سعيد  هايعدي  حتما
           كان  مخالف   أو  مطاوع
والمظاهر    غايبه   طبعا
           م الحواري  ... والشوارع
والبيوت    مليانه    فقرا
           والفقير  في  الصبر بارع
بس  لازم   ثم  .... لازما
           العيال  تاكل .....  كوارع
والظروف   مانعانا  منعا
           والجيوب  تشكو  المواجع
لو  رضيت   بالحق  طوعا
           روح  لرب  الخلق  سارع
واقضي حق  الخلق  شرعا
           في  الأضاحي  سر  باتع
يطفي  نار  الحقد  قطعا
           والآدان  يعلى   الجوامع

          ..  إنت  الوتر  ..

إنت  الوتر ....... للعود
            يابو  حرف  زي  الماس
نبع  الوفا..... ..والجود
            في  الحق 100 نبراس
إعزف  هنا .... الألحان
            وابني   المحبه  أساس
علمني   أكون   إنسان
            واكون  وفي  وحساس
وأعلى  في ... البنيان
            واكون   دليل   للناس
أزرع  محبه .... واجود
            واكون  سراج ... وناس

      ... أنا  كل  الفصول ...

البذره  بنت  الارض
والفرحه  قلب  العيد
وانا  كل  الفصول  متجمعين
فصل  بمسمى  جديد
زمهرير  على  برد
حبة  مطر  على  شرد
راسمين  ملامح  وشي
ولا مره  نسمه  تلين
وتهل  بالمواعيد
ولا تيجي  شايله  عبير
وتنام  على  رمشي
وكأني  ساقط  قيد
وانا  ميييييين
من  بعد  ابويا  اللي  راح
 الموت  دفع  مهري
سرح  معايا  وراح
كسر  عمود  ضهري
وسابني  شرييييييد
وقلب  امي  اللي  جمعنا
وساعنا  ف عز  أحزانه
داب  من  كتر  أوجاعنا
وباع  العيييييييد
ورقصت  روحنا  مدبوحه
وقصت  توبنا  مكتوبنا
ونايمه  جروحنا  مفتوحه
ونارنا  تقييييييد
والبذره  بنت  الأرض
والخضره  قلب  العيد
وانا  كل  الفصول  متجمعين
فصل  بمسمى  جدييييييد


      .... أهلي ف عمان ....

من  أرض   مصر  المؤمنه  طول  الزمان
لقلوب  صحابي  الطيبين  أهلي ف عمان
عشت   بينكم   عمر   عدى  زي   نسمه
لسه  راسمه  ف قلبي  جنه  من  الحنان

رحال  ومادد  خطوتي  في  كل ...... البلاد
ماشوفتش  اجمل  من  عمان  أرض   ووهاد
فيها الشباب زي الورد والأمهات ويا الشيوخ
فيها  الشموخ  والنخوه  عنوان ....... الولاد

فيها  قابوس  المفدى عطره  ندى ع الجموع
لما هل بنوره هدى قال هانبني مفيش رجوع
نهضة   شامله    في   المدارس   والمصانع
نبني مدنه ونبني جامع في المداين والنجوع

ونبقى أمه  مؤثرة  ف كل ........... الأمم
ونبقى  نبراس   للعزيمه  ،  ونعلى  للقمم
ونبني    العقول   المؤمنه   بكلمة    وطن
ونعدي  فوق  كل  المحن   ،  زايدين  همم



(  الرمش   سناره  )

____________

إرمي    الشبك    أيوا
انا   حبي    جاي   نوا
إرمي  الشبك  شوفي
عيوني ..... ووصوفي
داب  م الهوى  خوفي
لفيت    200    حاره
أسأل   عليكي  الناس
والرمش ....... سناره
شبكني ... بالإحساس
حبك  هنا  ....  راشق
في قلبي  نام  عاشق
وانا  وانتي   نتعاشق
وليه  نعيش .... اتنين
والهوى  ......... غيه
وقلوبنا   دايبه   حنين
والرك  ........ ع النيه
إرمي    الشبك   أيوا
واصطادي ...... حنيه

....... فلاح  فصيح  ........

وكان  ناوي  يداوي
الجرح  بالفرحه
ويفتح  قلبه  للضحكه
وينسى  الآآآه
فامقدرشي
عشان  طبع  الحياه  جارحه
ودمعة  عينه  كات  فضحاه
لف  البلاد  بالطول
وداس عرضها
لم  البنات  م الغول
وصان  عرضها
ولأنه  واحد  منها
وفلاح  فصيح
طينته  أغلى  من  الدهب
وماهوش  صفيح
زي  الوتد  ضهر  وسند
بلسان  صريح
حفر  القناه  بصبر  وجلد
وف  دنشواي  ضهره  انجلد
مصري  بصحيح
ولا مره  باع
ولا قام  وشارك  في  الصراع
ولا عمره  قال  إنه  جريح
عايش  يادوب  سطر  ف روايه
بره   مضمون   الحكايه
مالهوش  في  أدوار  الغوايه
ولا  على  صوته  بالشكايه
ولا حتى  همهم  همهمات
رفع  الرايات
ومابين  ركام  الذكريات
قاعد  ومستنى  بحنين
تايه  بيسأل  ع  اللي  فات
على  عمر  عدي  من  سنين
مسكون  بعفريت  الآآهات
وساعات  ينسيه  الأنين
ولأنه  معجون  بالسكات
وبيصاحب  الليل  الحزين
ونجومه  تحكي  له  حكايات
عن  فرح  ناس ،
وناس  مجروحين
وناس  بتسهر  بالساعات
تستعجل  الصبح  بحنين
يطلع  يطبطب  ع  الجراح
يمسح  آهات  السهرانين
مليان  ضنين  من  كام  سنه
ماشي  الطريق  ناسي  الأنا
وسط  الهموم  والعكننه
حلمه  البسيط  يوصل  لغيط
فيه  الأماني  ممكنه
والصبح  يطرح  سوسنه
وينسى  العنا  بنسمة  حنان
كان  حضنه  أكبر  من  ميدان
لأنه  كان  فدادين  وفا
كان  غله  ماليه  الغيط  عيدان
طارحه  السنابل  والدفا
وبرغم  قلبه  المبتلي
ووشه  البريئ
كان  واد  جريئ
شق  الطريق  زي  الولي


  هنادي  أم  ابراهيم  :

..........................

من  هنادي  ام  ابراهيم
لابراهيم  الجندي  الأمين
وانا  قاعد  ساعة  عصاري
حدا  وابور  الطحين
سمعت  صوت  بينادي
كانه  صوت  امآي  هنادي
ولا مين  بينادي ..؟
طبعا  ياواد  هنادي
هنادي  ام  ابراهيم
خير  ياماي  تعالي
أخوك  في  منامي  جالي
غايب  يانن  عيني
من  شهر  وجمعتين
واقف  ع الحدود
حالف  ميت  يمين
يحمي  أرض  الجدود
م  الخونة  وم  اللئام
شدلي  مكتوب  ياولدي
شدلي  مكتوب  قوام
قوله  بعد  السلام
أمك  هنادي  ياواد  تمام
واسمع  ياولدي
خليك  متين  زي  ابوك
مات  شهيد  علشان  نعيش
ماهمهوش  الفقر  أبدا
ورغم  كان  الحال  مفيش
عاش  ياولدي  بألف  راجل
واحنا  نارنا  في  المراجل
قايدة  جمر  متنطفيش
العدو  قدام  عنينا
كان  خسيس  ومايستحيش
عرفينه  طبعا
كان  حنانيا  وكان  كوهين
وانت  بختك  شين  ياولدي
جيت  زمان  الخوانين
الإسم  طبعا  مسلمين
لكن  وشوشهم  كدابين
مالعنونا  وكفرونا
حزبونا  وفرقونا
عاشوا  بينا  خوانين
خانوا  فينا
كل  عهد  وكل  دين
وقبل  الختام
باقي  عندي  كلمتين
خليك  ياولدي  بألف  راجل
وإن  مت  هيقولوا  طبعا
إبن  ابوه
ماهمهوش  الفقر  أبدا
ورغم  كان  الحال  مفيش
عاش  حياته  بألف  راجل
زي  ابوه  ومات  شهيد
وروحة  بقيت  في  المراجل
قايدة  جمر  ماينطفيش  ..
روحه  بقيت  في  المراجل
قايدة  جمر  ماينطفيش  ..

 : مصيرنا رباط وبيجمعنا  :

مش  هاكتب  أحلام  ورديه
وبلادي  تموت  من  غير  ديه
أنا   بلدي   قويه   وعفيه
بلد  امي   وابويا   وعمي
وترابها  المعجون  من  دمي
تلاعبني  ويمكن  تلاوعني
وتزعل  لو  شيئ  يوجعني
انا  شعبي  وباكتب  عامي
وهاعبر  عن  ناسي  وأهلي
بصراحه   والراحه   ضمير
مش  هافتح ....... ودني
للقال .............. والقيل
أنا  هافتح  عيني  وهاشوف
وهاصور  ع  المكشوف
أصل  الفايدة  في  التصوير
مش  هاوصف  أي  فقير
ولا هاشتم  حتى  وزير
أنا  هاكتب  عن   شعب
كل  الشعب  محتاج  لضمير
محتاج  للنخوه  لاجل  يغير
ويطير  ع  المصنع
ومكن  واقف  نفسه  يدور
علشان  يصنع
والعجلة  تدور
وندور  في  رحاب  الساقيه
نزرع  نقلع  نروي  الأرض
والبنت  عروسه  بتتوضى
فارده  الأحلام  بالطول  والعرض
ماده  إيديها  وتتمنى
بخضار  الأرض  وتتحنى
لاجل خدودها  ماتنطق  عفه
وتطرح  شهد
ويجي  عريسها  ويطلب  إيدها
والأم  تزغرد  م الفرحه
وترش  الملح
وتحميها  من  عين  حسادها
وتغزل  توبها  خيوط  من  ورد
لاجل  ماتصنع  بإيديها  الطارحة
وآدان  ع المدنه  بينده  خير
بينادي  في  خلق  الله  والطير
لاجل  نصلي  الفجر  ونسعى
ورزق  الفجر  في  علمه  وفير
نصبر  على  بعض  ونهدى
ونقرب  من  بعض  كتير
بالحب  ونرجع  إيد  واحده
نتحدى  النوة  ف بحر  خطير
ليه  نبعد  وتزيد  أوجاعنا
ليه  نقسى  ومن  غير  تفكير
وخلافنا  يغرق   مراكبنا
وانا  وانت  بيجمعنا  مصير
ومصيرنا  رباط  وبيجمعنا
أنا  وانت  وليوم  الدين  ..

ومصيرنا  رباط  وبيجمعنا
أنا  وانت  وليوم  الدين  ..


...  البذره في الارحام ...

إلى  المدعوه
   غباء  الغاشم
" صفاء  الهاشم "
الصفاء
أصبح  غباء
والكويت
مش  هاشميه
دول  عرب
نخوة   وإباء
وكبرياء
معجون  بعزه
ياشاربه
الخمر  والمزه
وغاويه
العري  واللذه
فلابد
العقول  تختل
وانا  اللي
صديت  عنك
أذى  المحتل
من  أول
حدود  حطين
لعام  تسعين
 وحررت
الكويت  بالدم
وشيلت  الهم
عنك  تل
زاد  عندي
ولو  هاعتل
هاتحايل
على  نفسي
عشان  تتهني
بالمندي
وتتحالي  وتتندي
وتتعالي
على  حسي
وانا  المصري
سليل  النخوه
والإحسان
صحيح  غلبان
وشايل
على  كتافي
جبال  أحزان
وبين  الآآآهه
والآآآهه
200  فدان
لكن  فارق
مابين  الحق
والبهتان
وليا  كيان
وصيت  جارف
مانيش  خايف
ولا عايش
على  التخوين
ولا  عارف
أخاطب  مين
بما  إنك  مولوده
في  فلسطين
وسيبتي
القدس  والأقصى
وروحتي
المغرب  الأقصى
ومين  يتقصي
عن  أصلك
وعن فصلك
وعن  غنجك
وعن  رقصك
وليه  النخوه
منزوعه
من   دمك
وبان  غشك
على  لسانك
رسم  غلك
على  وشك
سواد  حالك
رميتي  العفه
من   شالك
وحالك  مال
وسمك  سال
كما  السلسال
عشان   حبل
الخشى  سايب
ولا فرق
مابين  عايب
ولا ابن  حلال

عشان   حبل
الخشى  سايب
ولا  فرق
مابين  عايب
ولا  ابن  حلال


ياام  حلمي

كل  اما  يجي  الشتا
باشتاق  لحضنك  ياام  حلمي
بعدك  مشاعري  مكلفته
والبرد  نايم  في  حلمي
ياام  المشاعر  دفيانين
كان  نفسي  اكتب  قصيده
ترسم  عينيكي  الطيبيين
عايش  أنين  وسنين  عصيبه
مليان  ............... حنين
تاهت  الأحلام  سنين
جوا  دهاليز  الشنط
لما  موتى  وغيبتي  عني
وسيبتي  حيرتي  جوا  مني
وخدتي  روحي  بالغلط
على  حد  علمي
آآآآآه  ياام  حلمي


نفسي أتحرر

ليه  زمانا ..... الملتوي
عايب  ............. قوي
حط  الأصيل  ابن  الأصول
رفع  الفلاتي  الفهلوي
ساب  الغلابه  مطحونين
دايرين  في  دايره
جوا  دايره  ومهمومين
نصب  الكمين  في  الاورده
صرخ  البطين  ويا  الأذين
الروح  شتات  في  الأفئده
والدم  مش  عارف  يمر
خيط  الوفا  بيكر
كل  الوشوش
لبست  رتوش  الأقنعه
اللسان  بقى  طعمه  مر
حتى  الأغاني  المفزعه
الغلب  منها  بيشر
والشر  متكرر
نفسي  أتحرر
من  عادات  الزور
ويعود  أمان  الدور
وابويا  اللي  كان  داير
في  الساقيه  بدل  التور
ماكانش  يعرف  في  الحياه
غير  أرضه .. وفرضه ..
وهدمته  الكستور
وامي  اللي  كات
تشبه  شعاع  النور
من  همها   شابت
نادت  ياكل  الأنبيا
كنست  عتاب  والأوليا
ماتعيش  زمان  الأغبيا
والندر  فول  نابت
كات  تصحى  م الفجريه
شاطره  كما  الددبان
عجينها   ع  الطبليه
قبل   الآدان   بآدان
أصل  المحبه  زمان
في  العيله  واللمه
والقلب  كان  دفيان
بالخاله  .... والعمه
والحب  كان  عنوان
لاهل   البلد   عامه
وبرغم  كان  الحال  مفيش
ومفيش  مجال  للأمنيات
القلب  كان  يطلع  له  ريش
وكان  بيطير  م الإنبساط


ع الزراعيه

باستعجب  والا  ف سحر  عينيك
فرشوا  لي  الأحلام  ورديه
نصبوا  لي كمين  ع الزراعيه
قبضوا  عليا
وخادوني  إليك
حوش  عني  عينيك
انا  اصلاً  ميت  دايب  فيك
أول  مره  أشوفك  مالي
عقلي  اتكعبل  مال  طوالي
يومها  حلفت  مافارق  بابك
ياللي  حنانك  داب  ف حناني
قلبي  ناداني  تعالى  معايا
جايلك   متعبي   بأفراحه
سلم  لك  بابه  ومفتاحه
تقطف  من  ورده  وتفاحه
واهو  مد  براحو  عشانك  مد
ماتقول  لي  بجد
إزاي  جريت  الفرح  ف دمي
وإزاي  نسيتني  ياواد  عمي
ونسيت  خالي  وحالي  وناسي
وإزاي  بحروف  الشعر العامي لونت  بإيدك  إحساسي


............ قولتله حاسب ...........

........................................

كان  بيونس  روحي  بروحه
كان   ضلي  وكنت  صروحه
فجأه  لقيته  حصان  حرنان
قولتله  حاسب
قال  لي  إزاي  والروح  موهومه
قولتله  حاسب
قال  لي  قلوب  الناس  مهمومه
قولتله  حاسب
قال  لي  الحسبه  ماهيش  مفهومه
قولتله  حاسب
قال لي  مافيش  ويايا  سنابل
تملى  الحاصل
ولا  عاد  فاصل  يمنع  عايب
قولت  انا  عارف  موجهم  غادر
ونفسي  تحاسب
قال  مش  قادر
مش  قادر
.................