ديوان ( بدون تصريح )
__________________
أنا وانتي وش وضهر
فمش ممكن هانتقابل
ولايمكن هانتبادل
لقا العاشقين
لأنك وصفه خياليه
بيقولوا عليكي إنسيه
وساعات بيقولوا جنيه
وانا اللي صانعكي
م الأوهام
وكتبت الشعر بالإلهام
ويجي الوحي من طيفك
نقول دواوين
وتيجي الكلمه مقسومه
مابين قلبين
ومين ياحبيبتي زيي صريح
كتبت حروفي بالقوه
تصد بعزم ميت نوه
عشان تشفي
قلوب مجاريح
وانا راكب بساط الريح
من أول حدود قلبي
لحد عنيكي
واول خطوه في حدودك
حسيت بأني دبيح
فسامحيني
أنا جايلك بدون تصريح
وسايب رزقي لعنيكي
ياتيجي النظره ترويني
ياتيجي سهامها ترميني
واطب جريح
أنا والحب ياحبيبتي
من زمان أنتيم
وأول كلمه تجمعنا
كتبنا حروفها بدموعنا
ومن روحنا
في هوا بلطيم
وانا في الحب مش لعبي
أنا يمكن أكون شعبي
وحبي يبان شعبي
ماهوش بالشوكه والسكين
مادام الفكره من ضيك
قوام طله
هاقولهالك واعيدهالك
200 مره
أنا صادق في إحساسي
وبين ناسي مكانتي عزيز
أنا فاهم أصول الدرس
مانيش تلميذ
وكلمه ف سرك إنتي وبس
جوايا حاجات تتحس
شايلها ف قلبي علشانك
مادام قلبك القاضي
أنا راضي بأيها حكم
ولو جاني
ومش هالجأ لأي محامي
ولااستئناف ، لأني باخاف
يضيع في عنيكى عنواني
.... بيوتنا القديمه .....
عينيا مالها مدغششه
شايف طشاش
البيوت مش هيه هيه
والأسامي مش عفيه
فين زمانك يابهيه
فين حميده وفين سنيه
حنينا لبيوتنا القديمه
فين عزيزه وفين كريمه
فين سعيده وفين نعيمه
لما كنا في يوم حبايب
والمصطبه لمه القرايب
غدوه حلوه بلقمه ناشفه
وجبنه حادقه وقعب رايب
كنا ننده ع اللي غايب
أو نشيل لغيابه نايب
لسه فاكر ستي حمده
كات وتد للعيله جامده
كات تنادي وامي نايمه
يابنتي راح القمر
قومي عجينك خمر
وتصحى تحمي الفرن بدري
للمشلتت والمعمر
والجيران حواليها تسهر
كات قلوب الناس عمار
والكلام عفه ووقار
كل كلمه وليها قيمه
كات وشوش الناس وسيمه
والكبير كان له مقام
والخصام كان يوم وليله
والهموم ماكانتش شيله
كنا لمه ف حضن عيله
.... ألبوم الصور ....
فين الوفا والضحكه
راحت فين ..؟
طلعت ألبوم الصور
مليان حنين
مشتاق لضحكه
ع الوشوش كات طيبه
مشتاق لأيام الصبا
وقلوب صحابي الطيبيين
ولقيت في الصوره
ناس زيينا تشبهنا
وليها نفس أمانينا
وأسامينا وملامحنا
باصوا لي باستغراب
وقالوا لي فين روحنا ..؟
ماقدرتش أرد جواب
ولا إرسم وش غير وشي
معرفتش أكون كداب
لأن الكدب بيفضحني
.... ( شطرتين ) ....
فاكر أول نظره
كات روحي بكر
وقلبي ع الفطره
كنت ناوي ع السفر
والنظره ذنب لايغتفر
وعينيها شاطره
والسهم صابني
شق قلبي شطرتين
لاجل اسيب لهواها شطره
وبنص قلب قلت اسافر
واشيل معايا ذكرياتها
وبعد فتره دق بابها
قالوا لها قلبك للي حاضر
واللي غايب عن عينيكي
أكيد نسيكي
رغبوها ... وغيبوها
جهزوها ... وجوزوها
وحلمي عيشته ف غربتي
مابين مناهده وبين معافره
ورجعت بالحلم الخضار
أسأل عليها والغربه كافره
والرد جالي بإختصار
سهم منقوع بالمرار
شق اللي باقي
ف صدري ليها لألف شطره
وساب لي نظره كات عمار
باشوفها طله بإنكسار
من عينيها دموع وحسره
فراق وحيره واحتضار
.... ( وناديت نتلم ) ....
طلعت أصور بعنيا
واشوف العالم حواليا
لقيت الداء بقى صاحب مطرح
وشوفت غباء عنوان للمسرح
وأجمع واطرح
وأقسم ضرب الحرب القايده
من غير فايده
مابين شيعي وسني
علوي ودرزي
عربي وكردي
والدنيا نشاز وفتحت التلفاز
على كل القنوات العربيه
معنيه أو غير معنيه
ولقيت الكدب مجاز
والأخبار كلها ألغاز
بصيت لخليجنا العربي
الممتد لتحت ونازل فحت
وبيشرب بترول على غاز
والجهل المتغطي بجاز
سموه إنجاز
وسابولنا الناس ع السطح
كقشر قزاز
والفرس بتقتل في الأهواز
ع الشط التاني
لخليجنا العربي الشامي
الروسي التركي الفارسي
الأمريكي السامي
عديت من مسقط
لليمن النايم قدامي
غرقان في الدم
وبينده في وداني سوداني
هو خلاص الضيم عم
وخدت النخوه العربيه
لسوريا المقطوع شريانها
وناديت نتلم ونمد حبال الود
لحد الموصل
ونوصل لولاد العم
ونضفر م الهم ضفاير
ونطير لمراكش ونعدي جزاير
على تونس واسأل يونس
عن عتم البحر
وليل الظلم وبطن الحوت
من بعد ماكانت خضره
وطارح فيها التوت
م الحسره شايفها قبالي
والجازيه بتنده ياهلالي
فين القوت
وفي ليبيا أنا شامم
ريحة الموت
وطلعت أنادي بعلو الصوت
واقول يامعين
إبعت لينا صلاح الدين
ينده فينا ويصحينا
نعيد حطين
ونجمع قنواتنا العربيه
معنيه أو غير معنيه
في قناه واحده
لاجل نرجع تاني الوحده
ونداوي جراحنا المعديه
ونزرع حواليها الياقطين
.... يانسمة هوايا ....
واحبك معايا يانسمة هوايا
ياوصفة دوايا ياست البنات
ياحبي اللي راكن
ومالي الاماكن
في قلبي وساكن
هناك للممات
ياضحكة خدودي يالمسة ورودي
ياأجمل وعودي ياشقه السكات
يامية وسواقي
وراويه الشراقي
وسعدي اللي باقي
في عمري اللي فات
( لمت لي خيوط الشمس )
الساعه تمانيه الصبح
ظبطت منبه قلبي
على تامن دقه
وعشان حبيت
روحت لأستاذ الإيتيكيت
واتعلمت أصول الرقه
ووقعت في ورطه
لما اداني شهاده
بدرجة أسطى
قوم سوقت انا فيها
وروحت أسأل
على سحر عنيها
بصت لي والشك ماليها
وعشان ارضيها
طلعت شهادة الإيتيكيت
وحكيت عن نفسي برقه
فسألت ع الواسطه ..؟
وقالت لي ياريتك ماحكيت
مش لايقه عليك الملاغيه
روح يابني على امك
نام واتغطى
وف تالت يوم
وف نفس التوقيت الصبحيه
الساعه تمانيه إلا شويه
وبدال مااتجن قلت أخشن
وانسى الإيتيكيت
ف سرحت الغيط
والفاس في إيديا
ع السكه الفاصله
مابين أرض الزعره
وأرض العوده
قابلتني بهيه
قالت لي بعوده
يابو طله بهيه
بصيت لخدودها الورديه
وضحكت بهمس
لمت لي خيوط الشمس
وغزلت توب الحنيه
( باقيه الجراح )
وصف الأطبا دجل
باقيه الجراح بتئن
قالوا ف عينيها العمل
يشفي اللي راكبه الجن
فكتبت شعر وغزل
فى عنيها لاجل تحن
معاها روحي البريئه
دايبه في تكوينها
وظنوني قايده حريقه
م الغيره وجنونها
فقصدت شيخ الطريقه
لا جلن يفهمها
وبنيت جسور الامل
ل عنيها قلبي بيحن
وصف الأطبا دجل
باقيه الجراح بتئن
قالوا ف عينيها العمل
يشفي اللي راكبه الجن
ف كتبت شعر وغزل
في عنيها لاجل تحن
وفردت روحي جناح
وطرت في سماها
أترجى في الأفراح
تسكن في نجواها
وعشت انا سواح
بالجرح والآآآهه
وكتبت شعر وغزل
في عنيها لاجل تحن
( حبك مدينه )
النجمه سابت عشها
طب فيها إيه
كابوس وجالها
طلعت تنادي بأعلى صوت
صحت جيرانها
طلعت تدور ع القمر
وقالوا خانها
والسما فتحت بيبانها
والقمر حالف مايهدم عشها
حالف يصونها
واقف على بابها وفي
حارس حصونها
نادى عليها اطمني
تعالي نرسم في السما
أضواء وزينه
مدى إيدك سلمي
مالك حزينه
زعلانه ليه وانا قلبي فيه
حبك مدينه
حسادنا دايما سهرانين
بصين علينا
كتبوا الغناوي عننا
عن نور عينينا
( النجمه قالت للقمر)
( النجمه مالت ع القمر فوق في العلالي )
وانا قلبي من حبك بيلالي
وامد نوري في السما
تحلى الليالي
يحلى السهر للعاشقين
دا الحب غالي
طب ساكته ليه اتكلمي
عدي الظنون يالا وتعالي
والليله دي ليلتي أنا
فيها اكتمالي
وليه تعاني وتزعلي
وتبني السدود
والنور يزيد لو تلبسي
حلو المعاني
لو حتى ساكنه ف كون خفي
إوفي الوعود
وهلي زي نسيم عفي
جاي بالورود
يتعبى قلبي ويكتفي
عنك يزود
إيدي في إيدك نجمتي
قمرك ودود
تعالي يالا إطمني
مالك حزينه
زعلانه ليه وانا قلبي فيه
حبك مدينه
زعلانه ليه وانا قلبي فيه
حبك مدينه
( يحكى أن )
يحكى أن الفوله باينه
والحكاية اللي مابينا
بين وبين
واقفه حايره
دايره بينا جوا دايره
وسط دايره
بتراضينا بالمحايله
ماشيه بينا سنه سنه
يحكى أن
يحكى أن الناس مصالح
والزمان الماضي صالح
واللي آتي شكله طالح
لما قلنا البيت بناسه
والعويل مايل أساسه
مهما يعلى وسط ناسه
برضه قله
والربايه الخايبه عله
فعل فاضح منتهاه
والحياه من غيره جنه
يحكى أن
يحكي أن الواد تقاوي
كان مخاوي حمار حصاوي
ومعزه عاميه
واخوه قناوي قالوا ناوي
يبيع غناوي ويبقى حاوي
ويحكي حالنا لما ميلنا
يحكي أن
يحكى أن كان زمان
نضحك الضحكه بأمان
كنا نسرح بالحنان
كات معاني الحب ساميه
كات عينين الشر عاميه
في الغيطان خضره وميه
كات قلوبنا لسه حيه
والتحيه بالقلوب مش بالرموش
ولبسنا توب الطيبيين مابيجرحوش
كان زمان كنا وكنا
يحكى أن
يحكى أن العدل لاص
قام يطالب بالخلاص
قال خلاص الظلم ساد
زاد وغطى ع العباد
لما جورنا ع الميراث
واللي زاد العله بله
لما يفتي فينا قله
جهله خادنا للمذله
وارتضينا العيبه بينا
يحكى أن
يحكي أن الواد عويل
كان طويل
زي تيل القطن هيله
لما شاف البت عيله
كات كبيره عنه هنه
شاف فلوسها جاتله جنه
رغم قطر العمر فاتها
وكان ناسيها
راح إليها يبوس إيديها
وساق عليها أمه وابوه
لأجل ترضى يكون عريسها
وملك إيدها يعيش في بيتها
لو بمنه يحكي أن
يحكى أن الواد مطاوع
كان ملاوع
بس زارع أرضه حنه
وقلبه طارح زي جنه
كنت عارفه لأنه جاري
بس كان فلاح أراري
طموحه عالي
كان بيحلم بالسفر
هايروح قطر يركب همر
ويشيل موبايل م الجالاكسي
عليه أغاني الحلوه نانسي
وجت ناموسه ف عز حلمه
تملى ودنه بأحلى زنه
يحكى أن
يحكى أن الطيبه بينا
قالوا ماتت لما خونا
وسيبنا للاندال مصيرنا
عاشوا بينا
عابوا فينا وعيبونا
شيلونا فوق همومنا
ومدوا ناب الخسه لينا
جرحونا بدلونا
طلعونا من هدومنا
يحكى أن
يحكي أن ويحكى إن
ويحكى عنا ويحكى أين
ويحكى ضعنا ويحكى بيعنا
كل الحكاوي مننا
كل الحكاوي عننا
واحنا اللي هونا
يحكى ............ أن
... سن القلم ...
سن القلم مكسور
محتاج لبرايه
عشان يعود مجبور
يكتب لنا حكايه
يوصف هموم الدور
ويحقق الغايه
ويكون دليل للنور
شجره وضلايه
سن القلم مصلوب
ومات معاه حلمي
حتى الأمل مشطوب
من دنيتي وعمري
ياعدل إمتى تتوب
بالفرح ترسمني
وانا راضي بالمكتوب
لو حتى تظلمني
الذنب ذنبك ياقلم
واقف ف وش الريح
توصف صنوف الألم
تكتب عن المجاريح
صوتك يداوي العلل
سنك دا سيف بصحيح
تحي العقول م العدم
لثورة التصحيح
سن القلم عاجز
قصفوه عشان ناجز
وبيهدم الحاجز
فيكشف المستور
واللي ماشاف النور
ويفتح بيبان الدور
ف تعرف المخاليق
ويهربوا م الضيق
فيفتحوا التحقيق
ويندهوا الحراس
سدينا باب الناس
بالضبه والترباس
مين اللي صحاهم
م النوم وخلاهم
يفارقوا موتاهم
ويصحوا ليه م العدم
ويحسوا طعم الألم
هو أكيد القلم
مغير الاحوال
هاتوه قوام في الحال
وعلقوا الأحبال
وانصبوا الجلسه
ع الهمزه واللمزه
والمحكمه جاهزه
تحكم عليه عاجل
بالشنق والإعدام
سن القلم بيقول
وكلامه م الغالي
يتغنى ع الأرغول
مواله يحلالي
خلى المزاج معدول
خلى المزاج عالي
( من طهرك )
ياصبرك ياشارب
مرار الغلب من صغرك
ومن طهرك بتروي زهور
لساك على عهدك
مستني ليل الضلمه
يطرح نور
والحلم شقق
في الأراضي البور
خايف تقول مستور
والفقر عشش
فوق سطوح الدور
واللقمه بالتيله
البرد نخور عضامك
مفيش حيطان تمنعه
والبق قطع لحافك
ريح الكفاف جمعه
واتفك شمل العيله
عشان ضمير البشر
واخد له تعسيله
سابك ياخلي جريح
واقف في وش الريح
عايش بدون تصريح
وتقلت الشيله
رماك في بحر الخطر
والظلم زاد وانتشر
إمتى الذنوب تغتفر
والدفا يسرح
تلقى العذاب انطرح
يطرح في قلبك فرح
غنوه وضليله
( الشيخ أبو الكلمات )
أنا صيتي في الخلق سمع
في الحق واضح صريح
يسمعني أبو القلب يدمع
شاعر وفلاح فصيح
كتبت الشعر بأصوله
بدون تجريح
وابدأ قولي بالفاتحه
ويجي الحرف ع البطحه
تقوم العقول شاطحه
تقول عني وانا المعني
وليه ياعم تجرحني
وتفضحني بين الناس
أقوله ياعم بعد الشر
واحلف له يمين الله
أنا باكتب بحق الله
لاعمري تاجرت بحروفي
ولايمكن هابيع الآآه
ولايمكن هاعيش حيرتي
أنا قلمي بيكتب آآآه
ونبض حروفي من سيرتي
لا انا باير ولا معطوب
ولاخايف من المكتوب
أنا بيتي ضد الطوب
مانيش مغصوب ولا غشاش
أنا أصلي هنا في بطاش
وتد مدقوق في سابع أرض
باصلي العزة سنه وفرض
واطوف واسعى واصون العرض
ومش ذنبي إن أنا باكتب
عن المجاريح
فاييجي الحرف في دماغك
يجيب داغك
في ثانيه تطيح
وتحلم حلم مش قدك
تروح مسطول يروح شدك
تنام دايخ
كابوس الكبر صور لك
عن إني باغير منك
تقوم قايل كلام بايخ
وانا في الأصل مش شايفك
ولا سمعك .. ولا حسك
الظن في شرعي عديته
ودوست عليه
وعندي كتييييير من الأمثال
مثل ستي دليلي فيه
( قتيل إيديه ماينبكي عليه )
ف مش ذنبي إن أنا محبوب
وانا الشاعر
على نظم الكلام محسوب
بلاقي حروفي مبدوره
في كل شتات
ولما إمشي تمشي ورايا
كأني الشيخ أبو الكلمات
وانا سارح مع وفاسي
تناغش فيا إحساسي
وتعد عليا أنفاسي
ولو زعلان تروح خايفه
تقول مالك
وليه ضحكتك جافه
أقول مالوا ومالت الكفه
فتعمل م الحروف زفه
وتجمع م الغيطان نوار
وتبدر سكتي أنوار
وتدفع للفرح ديه
وتشوف الضحكه في عنيا
واقول مبسوط
والآقيها محلوه بطعم التوت
وتاخد إيدي في إيديها
وانا وهى قدر مكتوب
وانا واحد على قدي
برص حروفي من كدي
ومشاعري تحيي قلوب
ومشاعري تحيي قلوب
( ساكسونيا )
برغم النور الساطع
والفجر الجاي خضار
جوانا حيتان بتصارع
وبنقتل ألف نهار
ونبيع الأحلام ع النوته
وننام على نفس الحدوته
الغوله اللي بتنفخ نار
والزار اللي بيشفي العله
والتعلب مابقاش مكار
وإن الوطن العربي خريطه
أوهام مرسومه على الحيطه
والديب الآسي الغدار
قطعها لمليون فتفوته
من ليبيا للديفرسوار
من تونس للأزريطه
وسوريا بقت ليتوانيا
جابوها مكان موريتانيا
رسمولنا حدود ساكسونيا
وسابوا لنا شتات الأرض
من بعد ماكنا فتوه
ونذود ونصون العرض
رمونا ف قلب النوه
وعبوا خليجنا سموم
ومراكش في الخرطوم
بتنادي البصره تقوم
وهموم ماليا البحرين
من ناس لابسين العمه
أبالسه ولاد شياطين
هدموا أركان الأمه
واليمني في صنعا غريب
والدوحه في تل أبيب
والشعب العبري حبيب
وقريب مطرود من ناسه
بتعدي سنينه عذاب
بيعافر مع إحساسه
وبينده ع الأحباب
ياعروبه وبايعه المله
في الغوطه مليون حدوته
البنت الحلوه صغنطوته
إندفنت تحت الأنقاض
والطيران لساه طاير
بيرمي البراميل
ويفجر في الأولاد
والجلد نساير
وذا فويس بيضلل فينا
وبيغوي عقول للإفساد
وترامب أهو غمي عينينا
وراح ع القدس يشد الخيمه
ويدق الأوتاد
( بحور الشعر )
ياعم الوحي والإلهام
أنا عاشق
لنظم الكلام مسحور
والكلمة قبل بحورها
كانت نور
شافها الخليل سطر
للمعاني بحور
وانا الناصر معاني الشعر
وبحمي حدوده م الهامل
وانا العوام في بحوره
من الوافر إلى الكامل
والآقي الخفيف منسرح
على موج الطويل بارع
ويجي المديد بالفرح
سريع الهزج ويصارع
والرجز ع الرمل مقتضب
بسيط المعنى ومضارع
واشوف الدخيل مجتث
وابني للحروف قارب
وانضف م المعاني الغث
وارمي الحرف ع الغارب
فيصنع للمشاعر حس
ويجي لقلبي متقارب
ياعم الوحي والإلهام
أنا شايف م الشبه ألفين
بحق اللي خلق حسك
مخلقش زيه اتنين
أنا هايم مع الهايمين
سارح باقول لله
قاصد مقام الشعر
يكفيني م الشبه واحد
يكون زيك
وانا عاشق
لنظم الكلام مسحور
والكلمة قبل بحورها
كانت نور
شافها الخليل
سطر للمعاني بحور
( الكلمة )
عادي جدا ثم عادي
تلعبي بمشاعري عادي
ترفعيني في السما
بين النجوم
وترزعيني ع القفا
قلمين هموم
وبرضه عادي
دا الوحي منك زي هاله
والفرح يجي استماله
ويلاغيكي لاجل ترضي
وتبعتي حبة مشاعر
وتحيي فيا نبض شاعر
وتهدي إحساسي المسافر
وتسمحيلي أصلي فرضي
حروفي واقفه ع البيبان
والجدع بيحلف بعرضي
قال لي ياشاعر
لوريل وهاردي
سرقوا أرضى
وداسوا عرضي
ف انظم قصيده
تؤدي الغرض
هما مش بيقولوا
الكلمه سيف
وأحيانا مدد
سمعتي ياختي يالا قابلي
زودتي شكي
لما شوفتك بين وبين
في الحيره تايهه وببالين
وانتي قوت الغلبانين
من عهد آدم للحسين
والكلمه عهد الطيبين
شالت قناع من ع الوشوش
كانت مدد طلعت فاشوش
هدمت في الكون عروش
( لأغوينهم )
مازالت عهد الشيطان
يغذي بالدم النار
ويحصد جهل الإنسان
وانا جيت أأدى طقوس جلالك
ولسه واقف ع البيبان
والقلب جاي طمعان في جاهك
مدى إيدك بالحنان
الكلمه للمحتاج نجاه
( إقرأ ) باسم الإله
غيرت شكل الحياه
عرفنا نكتب بالقلم
كسرنا ميت مليون صنم
ومد خيط النور مداه
وانا كلمتي سايقه ف دلالها
لما شافت حالي حالها
بتلاقيني ويهدى بالها
فعادي خالص ثم عادي
تلعبي بمشاعري عادي
ترفعيني في السما
بين النجوم
وترزعيني ع القفا
قلمين هموم
وبرضه عادي
( بنشحت الهمة )
صباح الخير على الأمه
صباح لابس 200 عمه
وجاي قاصد معالينا
وهما بيعقدوا القمه
خمول صابنا في مفاصلنا
وشدوا القوه من حيلنا
صباح مكسوف يغني لنا
وسابنا بنشحت الهمه
صباح الخير على الأمه
..............
صباح نااااااايم وبيشخر
صباح الفرح متأخر
وشافنا في عز أحلامه
لا بنقدم ولا نأخر
صباح الأقصى ويا القدس
صباح سوريا سد النفس
صباح صنعا داسها الفرس
صباح نفسه يبقى أخضر
صباح نااااااايم وبيشخر
صباح الورد ع الخاينين
ناس باعوا ضميرهم فين
صباح عادي على بلادي
مادام راسنا جت ف الطين
وناس ع العفه مفطومه
وناس بالخسه موصومه
عشان أخرتنا مقسومه
جنه ونار مابين لتنين
صباح الورد ع الخاينين
صباح صابح يقول لله
ساعدوني ياخلق الله
كان عندي وطن عربي
ضاع مني شيطانه غواه
وكان عندي عرب باعوا
نخوة وغيره وانطاعوا
في سوق الخسه وانباعوا
سنين عاشوا في عز وجاه
صباح صابح يقول لله
..... بساط الريح .....
أنا فلاح ودى بلدي
في حضن الريف
بحور الشعر عشقانى
وفاكراني واد حريف
وانا واحد على قدي
بادوس على جرحي وباعدّي
وارص حروفي من كدي
ماليش في الغش والتجريح
ولا فى البحر ليا شراع
انا راكب بساط الريح
لاني صريح مانيش خداع
واصيغ الوصف للأيام
واجيب الكلمه م الأحلام
تواسينى وواسيها
واصفيها م الاوهام
عشان تمشي بين الناس
تنوب عني بلا وسواس
تكون نبراس
وشرّبت من ابويا الكاس
وعلمني أكون حساس
وانا ثابت على عهده
ومش ناسي عرق كده
على جبينه يزور خده
بخبطة فاس
تبوس الأرض تطرح ماس
وأنا فلاح
وريحة أرضي عشقاني
وبتشكل فى بـُنيانى
وعرفاني أنا الطيب
باداوي الجرح وبطيب
آهات الناس
وانا الباني بتحناني
في ناسي أساس
أنا فلاح ونبراسي
ضمير الفاس
( قلبك ..... فنار )
الفجر شقشق
وانفلق نور الصباح
والعدل ف إيدين البشر
لو يعدلوا طابت جراح
والظلم لساه هنا نايم مراح
ف إياك تزيط تعمل عبيط
تمشي ف ركاب النار تشيط
خليك حويط
حتى لو كان جرحك غويط
إمسك لجام المجدعه
واياك تتوه ف المعمعه
تركب حصان السربعه
راح يوصفوك بالإمعه
وانت الجريئ
ماشي الطريق حلمك بريئ
زي غيط مليان خضار
زي ضحكه تطفي نار
قلبك فنار بيأدي فرضه
وانت نبع الخير وأرضه
وانت برضه حروف كلامنا
وانت ضي النور وجالنا
ع الوتر تعزف نغمنا
لو تغيب بيزيد هيامنا
ف إياك تغيب وتسيب آنين
وانت فين .... ؟
إنت فين .... ؟
مستنيين طيفك يزورنا
تيجي ومعاك الحنين
ترسم الضحكه وسلامنا
( الحق و البهتان )
أنا عايش ومش عايش
انا زي البسيس بايش
ماليش عنوان
وضاعت كل تفاصيلي
وانا التايه ف تأويلي
مع الأحزان
لا انا شايف ولا سامع
ولا شاري ولا بايع
ولا نازل ولا طالع
انا التايه
مابين الحق والبهتان
وانا الطيب مابين فجار
وانا الشاطر في إيد تجار
لكن غايب عن الأنظار
كأني شريد بلا عنون
ولقيت الكل في الأزمه
ضمير ميت مالوش لازمه
بنتسرسب من الحزمه
وضاعت قيمة الإنسان
ياشمس الصبح طال ليلك
ضيك فين وقنديلك
ماشدوا الظلم من حيلك
ولفوني في الأكفان
تعالى طلتك وافيه
مدي خيوطك الدافيه
يطرح زرعنا العافيه
ويحمينا من الحرمان
ونرجع تاني للمعني
وتصحى قلوبنا وتساعنا
وكلمة حب تجمعنا
ونرجع تاني زي زمان
وافك قيودي م الهامش
ويجي الفرح نتناغش
واحس إن انا عايش
مانيش بايش ولا هفتان
ويبان الحق م البهتان
( فين حطين )
وصحيت من نومي
على حلم كأنه
كابوس جبار
فقلت
اتسلي على الأخبار
وشوفت ترامب
وكيم إيل يونج
قاعدين مع بعض
ف قاعده سودوكو
ودخلت الغابه
وشوفت شكوكو
بيلعب مع هتلر
ويرش الدوكو بلون أخضر
وربيعنا العربي ماجاش أخضر
وتابعت ف سوريا المنظر
حادي يا بادي
وروحنا الموصل
والبغدادي شيخ المنصر
قطع الروس
وحكم فيها بشرع مجوس
وشوفت تيوس
وتيران بتدوس
على روس الخلق
حتى الفرس حافظه الكورس
قالت فيها ياناس لا اخفيها
ورقصت سيكا عشان أمريكا
تسيب الملعب
والأتراك على جبهة إدلب
سنه سنانها لاجل ماتنهب
قالوا الحرب ياناس حتميه
ولازم نغلب
والكل بيغني على ليلاه
وشاف الشعب العربي أساه
نام في الجهل سنينه وتاه
وشوفت بوتين ويا التنين
ل اتنين حلوين
ونسينا الأقصى وفلسطين
فين النخوه فين حطين
فينك ياصلاح الدين
قول لي علومك
قوم من نومك
واحمي الدين
نادي علينا بعلو الصوت
صحي النايمين
قبل مانبقى دبيحه بجد
وتكتر حوالينا السكاكين
( يام الإيمان بالقدر )
يابلدنا شدي الوتر
غني الكرامه نشيد
يام الإيمان بالقدر
شعبك أصيل مايحيد
هى سحابة خطر
هتعدي بكره أكيد
وأكيد هاتنزف مطر
وتخلي حزنك عيد
والذنب راح يغتفر
والإيد تشد الإيد
النيه نية بشر
إياك تزيد وتعيد
الدنيا فيها العبر
والعقل فيها مفيد
بعين ماليها النظر
دايما تشوف لبعيد
هانعدي بحر الخطر
بشراع وعزمه حديد
وينام حدانا القمر
والحسن فيكي يزيد
يابلدنا شدي الوتر
غني الكرامه نشيد
يام الإيمان بالقدر
شعبك أصيل مايحيد
( نسينا أقصانا )
عذرا أقصانا
المسلمين في سبات
الحرص خلانا
متفرقين وشتات
والجهل جوانا
فرق مابين ل خوات
والفرقه عجبانا
عايشين تبات في نبات
الدنيا لهيانا
أقصى منانا نبات
والبطن شبعانه
بالكبسه والفتات
وأحلامنا مليانا
بالرقص والنغمات
ونسينا أقصانا
ونسينا عز وفات
والنخوه جوانا
لفت سبع لفات
راحت وسيبانا
متفرقين وشتات
( دفيني )
حبيبتي جوا أسوارها
يامين يجيب لي أخبارها
واسهر ويا قمر الليل
عاشق وشوقي دليل
وأغنيها في المواويل
وادوب في عنيها واحضنها
بقالها مده نسياني
وظلماني وتعباني
وانا مجروح وباتألم
وباتعلم بقالي سنين
ونفسي مره نتقابل
ونتلاقى لقا العاشقين
واسهر ويا قمر الليل
عاشق وشوقي دليل
وأغنيها في المواويل
وادوب في عنيها واحضنها
واقول لجروحي
لاتبوحي ولاتنوحي
عشان اوصل أراضيها
واخبيها من الحاسدين
وتيجي تقولي دفيني
واغطيها برمش العين
واسهر ويا قمر الليل
عاشق وشوقي دليل
وأغنيها في المواويل
وادوب في عنيها واحضنها
واروح أسأل ملوك الجان
لو قالوا حبيبتي مرصوده
في ميت عنوان
هالف وادور واعدي بحور
وانول نظرة عنيها الحور
واسهر ويا قمر الليل
عاشق وشوقي دليل
واغنيها في المواويل
وادوب في عنيها واحضنها
( عهد النور )
سامحينا
ياعهد النور
يانبض الأمل لينا
ياغيط زيتون
ياوخذ الضمير فينا
في ليل ملعون
يانايمه ف نني م المغرب
ياحلم العمر
يانسمه وجايه من يثرب
وشايله الطهر
ليه جيتي في زمان العهر
عشان الفرقه لضمانا
ووخدانا لخصامنا
وعلت سور
وختمنا بحسه وبصمنا
وبيعنا النور
يعقوب في أرض العرب
يابو الكرام أنبيا
العدل هج وهرب
وسابنا ليه أغبيا
نسينا درس الخيانه
يوسف وسره العجيب
رضينا ليه بالمهانه
سيبنا الغزاله لديب
ياست يام العواجز
يام الدعا فدادين
هدينا ميت حاجز
بسيف صلاح الدين
الحاجز اللي اتبنى
مابين غزه وبين حطين
مربوط عليه العمل
والبنت جالها العدل
بس الحرس مانعين
قوليلي إيه العمل
والنخوه راحت فين
إمتى الأمور تتعدل
والنخل يطرح تين
والنخل يطرح تين
ياشاعر إصحى
إكتب وجازف
ماتقولش خايف
كترت ذنوبنا
واحنا ماتوبنا
لبسنا توبنا
والجرح نازف
قلوبنا لانت
والقدس هانت
يارب حوش
وفين جيوش
كانت وحوش
في ألغى نامت
ياشاعر إصحى
قول وزيد
إحكي حكايات
وصحي فينا
الذكريات
فل الحديد
بعد أما كنا
قلب واحد
ونبض واحد
في الوريد
أصبحنا ليه
مليار شريد .. ؟
إصحى ياشاعر .. ياشاعر إصحى
إصحى ياشاعر
إكتب لي عامي
وداوي همي
لاجل نسعى
وإكتب لي فصحى
خليني أهاتي
وانده يوماتي
ع الخلق تصحى
ع الصفحه شعرا
عارفين حالاتي
فلاح فصيح
ومسحراتي
وانده واصيح
وانادي عمي
واخويا وامي
تقوم حماتي
ياصفحه ذمي
ولمي لمه
سحورنا يحلي
بجبنه بيضا
وفول حراتي
إصحى ياشاعر.. ياشاعر إصحى
( وإيه يعني )
مشيت السكه بس سكوت
سابت لي الغربه حبة موت
ومش ناسي
اللي كان منها
مابين طيب ، وبين هلفوت
وبين طعم المرار فيها
وطعم التوت
بنتعلم أصول الدرس بالنبوت
وطبع الحياه ماشيه
لابد تفوت
بنتبدل ، ونتغير
فمش ممكن
بياض الشيب يعود لشباب
ولا الثيب حتبقى بنت بنوت
فإيه يعني
لو شافوا الجرح يوجعني
ماأنا المقصود وأنا المحقوق
وانا المعنى وإيه يعني
وإيه يعني
لو نزلت دمعتي مني
تشق الخد للنني
وبين الضحكه والآهه
تجمعني .. وتقسمني
وإيه يعني
وانا الشاعر
برص حروفي بمشاعري
وكل الخلق تسمعني
وباعجب ناس وبتساعني
وناس تانيه تمنعني
وإيه يعني
باكون طيب مع الطيب
لاعمر لساني يوم عيب
وعاب عايب
مهما عاب وقال عني
وإيه يعني
باسامح في اللي جرحني
وباعدل في اللي وقعني
واكمل طوبه في البنيان
واهجر سكة البهتان
عشان سيرتي
بعد غيابي تشفع لي
تنوب عني
وإيه يعني
وباسمع كلمه بطاله
واقول طيب، ماانا الطيب
باداوي العله وباطيب
عقول عاله
واكتب كلمتي حاله
فتمشي الفكره تتحالى
بين المخاليق وتتعالي
تكون نبراس
وتبني أساس
من الإحساس
وترفعني
وإيه يعني
مراكب صبري ولاده
واعدي الصعب كالعاده
واخطي الموجه ورا موجه
ماليش في التوهه والهوجه
ولا امشي في سكه معوجه
وباكتب حرفي متحني
وإيه يعني
وإيه يعني
يميل الشين
على ابو وشين
على الملاعين
وانا مالي
مادام الحق سلسالي
وراس مالي
وعزة نفسي رسمالي
طريق للخير يوصلني
وإيه يعني
وإيه يعني
( ياقلب الحور )
سلام الله
على حضرة جناب قلبك
سلام الله على عيونك
ملايكة ربي حارسينك
وحافظينك من عيون طله
وشايفينك
ولا صلوش
على سيدك ولا مره
وعارفينك
على وصف الجمال دره
سلام من قلبي يوصلك
مع النسمه
ويطبع لك 200 بسمه
على جبينك
سلام الله
على حضرة جناب وصفك
على إسمك على رسمك
وتملى عين محبينك
وتزرع أرضي من عزمك
يبات السعد ويلازمك
توصل حبل أجدادك
بأولادك وأحفادك
ويرسمني إحساسك
وتكتب عني أشعارك
وتبدرني حروف وشعور
والف وادور
واقول دستور
وتفتح لي بيبان قلبك
ألآقي النور
كدا مبدور على خدك
ومن كدك تبات مستور
سلام الله
على حضرة جناب قلبك
ياقلب الحور
سلام الله على الهادي
تلم شفاعته أولادي وأحفادي
فيطرح زرعنا النادي
وانادي بقلب عاش راضي
يكبر ع الوفا شادي
يكون زادي وزوادي
سلام الله على الهادي
( أحضني قلبك بقوه )
أنا شوفي ليكي
ريح ونوا
إحضني قلبك بقوه
سهم جوا عنيكي صابني
خدني بحر الشوق وسابني
طيري ويالليل وغني
غني حبي أحلى غنوه
دانا شوقي ليكي ريح ونوا
أحضني قلبك بقوة
عمري ليكي وانتي ليا
قلبي ليكي بنيته غيه
وانتي بس ف عيني طيري
طيري يالا لفوق وطيري
إعزفي لحنك وميلي
ونامي جوا القلب جوا
دا انا شوقي ليكي ريح ونوا
أحضني قلبك بقوه
لو تغيبي ابقى ارحميني
ياللي ساكنه جوا عيني
ادخليها وطوفي فيها
واجمعيني ويا إسمك
دوبيني ف لون ملامحك
ياللي ضيك من حنيني
هتلاقيني بحق آدم
أصل لوجودك ياحوا
حي بوجودك ياحوا
وانا شوقي ليكي ريح ونوا
احضني قلبك بقوه
أحضني قلبك بقوه
( تطرح سنابلها )
أنا نازل أعمل ثوره
ثوره من نوع فلاحي
هنزل بالليل ف القمره
والفاس ف إيديا سلاحي
أروى الأرض السمره
ع الساقية بلف وصاحي
لاجل ماتصبح خضره
واعزقها بكل كفاحي
واحرسها لعند الغله
تكبر وحصادها يوافي
تطرح سنابلها الصفره
وتميل يهنالي صباحي
ويهل الخير ب حصادها
ويطير الطير صداحي
يغني معايا عشانها
وأطير وياه ف براحي
وأطير وياه ف براحي
( على ابوها معونه )
على ابوها معونه
على ابوها معونه
دول خططوا لنا
ل يجوعونا ..
قالوا لنا يالا
إيدنا في إيديكوا
ورسمنا ثوره
ربيعها ليكو
وإيجى ربيعنا
ولع أبونا ..
على ابوها معونه
على ابوها معونه
دول خططوا لنا
ل يجوعونا ..
إيجوا ع سوريا
قالوا يساعدونا
حلقوا لنا كابوريا
وصحكوا علينا
لادربونا ولا سلحونا
وسابونا لروسيا
ل يقتلونا ..
على ابوها معونه
على ابوها معونه
دول خططوا لنا
ل يجوعونا ..
هدوا لنا جيوشنا
ويامين يحمينا
وسابوا لنا جحوشنا
بيناكفوا فينا
داعش والقاعده
ل يدبحونا ..
على ابوها معونه
على ابوها معونه
دول خططوا لنا
ل يجوعونا ..
الدم في صنعا
واصل بنغازي
وبقينا صنعه
في إيدين الغازي
لاحمينا المصحف
ولاصونا العدرا
تونس ياخضره
ليه ولعونا ..
على ابوها معونه
على ابوها معونه
دول خططوا لنا
ل يجوعونا ..
ماتت النخوه
ياعرب طيبه
ونسينا الأقصى
ضيعنا ماضينا
عيشه ماتسوى
دنيا ملعونه
على ابوها معونه
على ابوها معونه
دول خططوا لنا
ل يجوعونا ..
