ديوان عيون ستي .. للشاعر معوض حلمي

ديوان عيون ستي

(  ريشة  الفنان  )

______________

رميت  الحبل  ع الغارب
وسيبت  القلب  متوارب
واقول  يمكن
تجيني  حبيبتي  وافتحلك
ولأني  حبيبتي  مشتاق  لك
فتحت  حدودي   للنسمه
وشوفت  ورودي   تندهلك
وانا  من  صغري  بارسملك
في   قلبي   كيان
وجبت  الفرشه  والألوان
وسلة   ورد   م البستان
وخليتهم  على  المرسم
مابين  لوحتي  وبين  طيفك
والآقي   القلب   يتنسم
عبير  طيفك  وانا  بارسم
واشوف  ألواني  تتقسم
على  شعرك  على  رمشك
وشوفت  اللوحه   تشبهلك
وتوصفلي   جمال   قدك
وخدك    علبة     الألوان
وضاعت    ريشة   الفنان
عشان  طيفك  طلع  حرنان
وسابلي  اللوحه  مش  كامله
ناقصه  عنيكي   والبسمه
فقلت   أكمل    الرسمه
واجيب  طيفك  من  الأحلام
واتظاهر    بأني   تمام
واسيب  روحي  للأوهام
لقيت    الحلم    بيعاني
شافك   وانتي   بايعاني
فضاعت    مني   ألواني
وضاع   الورد  م البستان
وانا   الفنان   ومشتاقلك
وعاشق  ف الجمال  سنك
ونسمة   هوا  ...... منك
وأسهر   ليلي   واندهلك
عشان   تيجي  واجمعلك
سلة    ورد    م البستان
واخليها   على   المرسم
واشوف  عينك  وانا  بارسم
ف يرجع   قلبي  يتنسم
هوانا .............  زمان
وافتح    دولاب    خدك
 واخد    علبة    الألوان
واكمل  لوحتك  الناقصه
واسيبها  شويه  للنسمه
واشوف  ضحكتك  راسمه
أجمل    لوحه   بالألوان
أجمل    لوحه   بالألوان


 (  أنا  إنسان  )

أنا  إنسان 
جوايا  الآآآهه  تقسمني
لكن  قلبي  حجر  صوان
كتمت  الآآهه  من  همي
نزل  دمع  العيون  حرنان
وكان  نفسي  أعود  لامي
واشوف  عمي  ماهوش  غضبان
لكن  قدري  ماأمهلنيش
وسال  دمي  على  القضبان
وداب  لحمي  كأني  مفيش
ولموا  الحلم   في  الأكفان
حتى  أخويا   ماعرفنيش
وضاع  إسمي   مع  العنوان
وغطوني   بحتة   خيش
شافوني  الناس
وقالوا   حرام
دا  كان  طيب
دا  كان  غلبان
دا  كان  طيب
دا  كان  إنسان
دا  كان  إنسان


 علموهم

بعد عام
فات وانقضى
عام اتولد
ياللي بتحبوا  البلد 
إبدأوا بهمة  وجلد
إزرعوا
ف قلب  الولاد
حب البلد 

      فاكروهم
بالمعارك  والمحن
ودنشواي
واللي اتشنق
واللي اتجلد ...
علموهم
إننا  أهل  المروءة
والشهامة  والجلد 

         علموهم
إننا  رغم  الكفاف 
مرت علينا
سنين عجاف 
واللقمة كنا
ناكلها حاف 
وفضلنا إيد
تشد إيد   
زي الجبل
لاهزه  ريح
ولاعمره خاف

 علموهم
إن  العمالة  والخيانة
مش  طبع  فينا 
حفظوهم  في  الكتاب
سنة  نبينا 
فاكروهم  بالقنال 
ودم  سال 
على  رمل  سينا 
وان  جيشنا
قال  محال 
راح  يعيش
إللي  يعادينا 
      علموهم
إن  الوطن  مش  حدود
وتراب وطين  ...
دي  روح  وساكنه
جوا  ناسنا  الطيبين 
علموهم  اننا
في  رباط  متين
ونبض  واحد
في الوتين 
            علموهم
إنها  كانت  أمان
للأوليا  والأنبيا
يوم  ماكانوا  منبوذين 
وان  فيها 
خير جنود  العالمين 
وان  التاريخ
عبر التاريخ  إتكتب
بإدين  ولادها  الطيبيين 
علموهم
إن  مصر  كتاب  ودين


 (  ضمير  الفاس  )

أنا  فلاح  وبالبلدي
هنا  بلدي
في  حضن  الريف
بحور الشعر عشقاني
وفاكراني  واد  حريف
وانا  واحد  على  قدي
بادوس  على  جرحي  وباعدي
وارص زحروفي  من  كدي
ماليش  في  الغش  والتجريح
ولا في  البحر ليا  شراع
انا  راكب  بساط  الريح
لاني  صريح  مانيش  خداع
باوصف  وطأة  الايام
واجيب  الكلمه  م الأحلام
أوضيها ...... واصليها
واصفيها  من  الاوهام
عشان  تمشي  بين  الناس
تنوب  عني  في  غيابي
تكون  نبراس
وابويا  علمني  أكون  حساس
وانا  ثابت  على  عهده
ومش  ناسي  عرق  خده
ولا   كده
ولا ناسي  ضمير  الفاس
أنا  فلاح
وريحة  الأرض  عشقاني
وعرفاني  أنا  الطيب
باداوي  الجرح  وباطيب
آهات  الناس
وانا  الباني  بتحناني
في  ناسي  أساس
أنا  فلاح  ونبراسي
ضمير  الفاس


(  كأني صوفي  )

قلبي  ولي
ماشي  ف رحابك  مبتلي
زادي  الهيام
قاصد  عيونك  والمقام
حبك  دليلي  ف سكتي
وف قلبي  راشق
ماشي  ف طريقي
كأني  صوفي  وقلبي  عاشق
كتبت  إسمك ع الكتب
وع الصور  وع الحيطان
ورسمت  صورتك  ع  القمر
وع النجوم  وع البيبان
ونقشت  قلبك  ع الشجر
نزل  المطر  طرح  الحنان
ووقفت  مستني  الإشاره
والأماره  والبيان
علشان  تعودي  واشد  عودي
واقول  وعودي  للزمان
ويهل  عيدي
اعزف  نشيدي
ع الوتر وع الكمان
وارفع  كفوفي  للعلي
قلبي  الولي
ماشي  ف  رحابك  مبتلي
زادي  الهيام
قاصد  عيونك  والمقام
حبك  دليلي  ف سكتي
وف قلبي  راشق
ماشي  ف طريقي
كأني  صوفي  وقلبي  عاشق


""   عيون ستي   ""

كات  عندي  عاده
قبل  ما أطلع  م البيت
أبص  ف مرايتي ...
ومرايتي  كانت  هى  ستي
ستي  حمده 
كانت  عفيه  وجامده ...
كانت  وتد
كانت  قبيلة  ف البلد 
وكانت  حبيبتي 
كنت  بنسبها  بحس  قيمتي
ولما باسمع  قلبها
ينادي  إسمي
كنت  احس اني  أمير 
أركب  جناح  الريح  واطير 
وأما  بقت  ف حياتي  عاده
كنت  بشعر  بالسعاده
وكنت  بتعايق  زياده   
لما  تنادي  يا واد  تعالى  ...
دانا  ليا  حق  ياواد  عليك
عايزه  أفرح  لما  اشوفك 
خليني  أتسند عليك
وعيوني  تشبع  من  عينيك
وعنيها  كانت  نجمتين 
الضي  فيهم  كان  حنين 
وكان  محبه  وكان  أمان
وقلبها كان  نهر
فايض  بالحنان 
كان  جنة  ليها  ألف  باب
وانا  حبي  ليكي  مش  سراب 
ياساكنة  قبر  من  تراب
فوقيه  تراب
من  كام  سنه  وانتي  ف غياب
ومرايتي  اللي  كانت
ضي عينك  ...
لساها  برضه  ضي  عينك
ولضي  عينك  قلبي  حن
قلبي  داب
واحلف  يمين  الله  ياستي 
من  يوم  ما غيبتي
وغاب  حنانك
ماحد  شافني  حلو غيرك 
ولاعين  شافتني  زي  عينك 
ولاعين  شافتني  زي  عينك


"  أم  العيال  "

أم  العيال  ستر وغطا
وصدق  اللي  قال 
ف برد  الشتا
قبل  اما  تيجي  أم  العيال  ..
كان  حالي  حال   

أم  العيال  الطيبه
بنت  الحلال 
تعمل  كتافها  مركبه
لو  حالها  مال 
تلقاها  وقت  الصعب  دفه
وتعدي  بيك  بر الآمان 

أم  العيال  ف الرحله  خل 
تقلب  جحيم  الحر ضل
فطره  وخلقها  ربنا
والفطره  سر 

أم  العيال  المؤمنه
قلب  بضمير 
شيله  دايما  وف عنيك
هتعيش  أمير   
بين  البشر سرك  ف بير

أم  العيال  نصيحه  غاليه 
خدها  مني  وحافظ  عليها 
إوعى  يوم  تهجر رحابها
أو  تفارق  ضل  بابها 
وتخلى  بيها

أم  العيال دي  صاينه  سرك 
خليها  دايما  جوا  قلبك 
إكرم  جنابها
خليها  تتباهى  ف زمانها
إنها  غاليه  وعزيزه 

أم العيال
جميلها  شايله  تاج  ف راسي 
أم  العيال  عزي  وناسي 
حبها  ف قلبي  غريزه 
أم  العيال  عندي  عزيزه


 ""  خدها  لدينها   ""

أجمل  حاجه  تحب  بعقلك ..
إنسى  عيونك
أصل  عيونك  سهل  تخونك 
لكن عقلك  يحفظ  سرك 
ويصون  حبك  صعب  يخونك 
ياللي  بتهوى  تحب  بعينك 
إسمع  مني  حكمه  تزينك 
ممكن  واحده  بحبة  بودره
ووشين  بويا  تزغلل  عينك 
وتخليك  على  طول  حيران
مشغول  البال  عايش  بظنونك
سيبك  منها  وحكم  عقلك
مش  هيخونك
وهايخترلك  واحده  لدينها 
مالها  البنت  الحلوه  السمره
بدال  مفاتنها  دينها  يزينها
علشان  ماهي  سمره
تسيبك  منها 
دا  ذوات  الدين
في  زمان  الضيم
ماسه  ف زمانها 
لو  ربك  حبك
وكانت  يوم  من  حدك 
في  عيونك  شيلها   
هتعيش  مرتاح  البال
وتشيلك  ف عيونها 
وتشيلك ..  ف عيونها ..


 ""   مصر  رجعت   ""

أول  مانبتدي  القول 
نصلي  على  الرسول ( ص)
عالي  المكانه 
إسمعوا  واعوا  ياهل  الخيانه
لما  وصف  سيدنا  النبي
مصر الكنانه  للصحابه  الفاتحين 
قال  أهلها  الطيبين 
في  رباط  متين 
وفيها  خير جنود  العالمين
مجندين  لنصرة  الحق  المبين 
ودا قدرها 
مصر  اللي  التاريخ
عبر  التاريخ  إتكتب
بإدين  ولادها 
أسود  وهبوا  ف وقت  ضيقها
شدوا  حيلها  وصلبوا  عودها 
خلوا  الأمل  يسري  ف وريدها
ورجعت  مصر شابه 
من  جديد  تكتب  تاريخها 
مصر فاتحه  حضنها
للي  خانها  وباع   ترابها
واللي  خادها   لسكه  ضلمه
رغم  عنها  وزاد  جراحها 
مصر  بتسامح  وتغفر
مصر  دايما  طيبه  نيتها  صافيه
رغم  الأنين  بالحب  ناويه
تجمع  ولادها  الطيبين 
ف رباط  متين
تجمع  ولادها  الطيبين
 ف رباط  متين


 ::   أغنية   ::

لو عنك  يوم  سألوني
هاقول  بيحبني  موت ..
ويوماتي  بشوق  ومحبه  ..
يكتب  أسامينا  برقه  ..
على  شجره  وورق  التوت  ..

وهاقول  إنه  بيهواني  ..
وجاني  ف أحلامي  ناداني  ..
ولبحر  الشوق  وداني  ..
قبل  الأيام  ماتفوت  ..

وهاقول  طيبلي  زماني  ..
وبإيده  مسح  أحزاني  ..
وقربه  كمان  هناني  ..
لو  يبعد عني  أموت  ..

وهاقول إنه  بيحييني  ..
ساكن  ف قلبي  وعيني   ..
يسهر  ليله  يغنيلي  ..
على  صوت  الناي  والعود  ..

لو عنك  يوم  سألوني  ..
هاقول  بيحبني  موت  ..
لو عنك  يوم  سألوني ..
هاقول .. بيحبني موت





 ::  ست  الملاح   ::


مصر لازم  نعلم  بيها
وتعلى بينا ..
مصر  دي  أجمل  سفينه
وقت  الشدايد  والمحن
بتعدي  بينا ..
لو  خطر واقف  ببابها
يعلى  صوتها  وتنادينا  ..
مصر دي  هيه  الحبيبه
إللي  بحنانها  عايشه  فينا ..
واحنا  كمان  عايشين  ف خيرها  ..
وضل  نيلها
ووقت  ضيقها  بتلاقينا   ..

مش زي  ناس  مابتختشيش  ..
لو عليهم  يوم  تنادي
النخوة  فيهم  ماتلاقيش..
دول  أفيش  ونتف  ريش  ..
وناس  عويله  ماتستحيش  ..

الغدر فيهم  شيئ  مباح  ..
وعشان  ماكترت  الجراح ..
لساك  فاكرها  سداح  مداح  ..
إفتح  كتاب  التاريخ
باب  الكرامه  والكفاح  ..
على  مر الزمن  أحرار  ..
هزمنا  ل ستعمار  ..
فرس  مغول  وتتار  ..
عدينا  ميت  محنه  ..
ولا مره  قولنا  الآه
ولاحد خوفنا  ..
وسر قوتنا  جيشنا  ووحدتنا ..

وعشان  ماكترت  الجراح ..
لساك  فاكرها  سداح  مداح  ..
دا الفجر لاح ..
والورد  ف إيدين  الصبايا
عطره فاح  ..
ومصر دي  ست  الملاح ..

الطيبه ساكنه  قلبها  ..
والسماح  من  طبعها ..
جرب  تبوس  خدها ..
وتنام  على  صدرها  ..
هتقسى  وتسامحك  ..
وتغفر سنين  جهلك   ..
هتفتح  بيبان  قلبها
وف حضنها  تضمك  ..
هتفتح  بيبان  قلبها ..
وف حضنها  تضمك


"  إسأل  مجرب  "

جيتك  يابحر تداوي  جرحي
من  كلامهم  ..
أمشي  على  شطك  شويه  ..
وأهرب  من  ظنونهم  ..
 شوفت  حوله  ويا حوت
ماشيين  ف حالهم  ..
وشوفت  حوت
ماشي  وراهم  بيراقبهم  ..
خدني  فضولي  زي  عادتي  ..
قلت  أقرب  منه  حبه  ..
حس  بيا  بص  ليا  ..
بعينه  شافني
قالي  غيتني  ..
قولتله  وتسمع  نصيحتي ..
قالي  قولي
قولتله  سيبهم  في  حالهم  ..
قال  دا  اللي  ماشيه  معاه  حبيبتي  ..
إزاي  اسيبهم  لو سيبتهم
الحيتان  هتجيب  في  سيرتي  ..
إوعاك  تلومني  غصب  عني  ..
أخاف  تضيع  مني  حبيبتي  ..
أرجوك  ساعدني
قولتله  سامع  كلامهم  ..
قالي  سامع  بس  مش  فاهم  ..
أصله  حوت  مش  من  فصيلتي  ..
شوفلي  حل  هاموت  بغيرتي ..
 قلت  مشكلتك  في  إيدك  ..
ماتخدش  رأى  حد  غيرك  ..
لو حبيبتك  شاريه  حبك  ..
وف قلبها  ساكنه  غلاوتك ..
لو  ألف  حوت
مش  من  فصيلتك ..
أو من  فصيلتك ..
مش  هايقدر  وقتها
يخطفها  منك ..
واسمع  نصيحتي
 أخر  نصيحه
قبل  مامشي ..
لو حبيبتك  ساكنه  قلبك  ..
أو هى  روحك  جوا  منك 
وبتحيي  نبضك ..
إوعاك  تبين  ليها  غيرتك ..
أو تشوف  بعنيها  ضعفك ..

خليها  دايما  واثقه  إنك
حوت  واثق  بنفسك  ..
حسسها  ان  إنت  حوت
بألف  حوت  من  فصيلتك  ..
وبألف  حوت  مش  من  فصيلتك  ..
خليها  تسكن  جوا  قلبك ..
خليها  تتباهى  بحبك  ..
وانها  بس  الوحيده  الغاليه  عندك  ..
دي  نصيحتي  آخر  نصيحه
بس  انت  جرب  ..
وان  زادت  يوم  ظنونك
غصب  عنك  ..
إياك  تتوه  وبسرعة  روح
وإسأل  مجرب ..
إياك  تتوه .. وبسرعة  روح ..
وإسأل  مجرب ..


(  مافارقتش  يابا  )

حاضر يابا
بعد غيابك  قلبي  محبش
بعد  حنانك  قلبي  محسش
ياللي  سكنت  الروح  مافارقتش  ...
فاكرك  يابا  فاكر  همسك
حتى  العرق  النازل  منك
بقى  صفصافه  وفردت  ضلك  ...
كبرت  يابا  وخيرها  أساسك
ضلت  ناسك
فاكرك  يابا
وانت  بتعزف  من  أنفاسك
نغمة  فاسك  ...
سابت  يابا  ف قلبي  إيمانك
ضحكة  وشك  حتى  حنانك
وانت  الصابر على  أحزانك  ...
طيب  يابا
مهما  تغيب  معروف  عنوانك
أصل  الطيب  من  طرح  مكانك
واحنا  فروع  من  نبع  كيانك  ...
زرعك  يابا
وحلمي  المفروط  من  حلمك
واصل  قلبي  بقلبك  يابا ...
واصل  قلبي  بقلبك  يابا ...


(  أحضني  قلبك  )

أنا  شوفي  ليكي  ريح  ونوا 
إحضني  قلبك  بقوه
سهم  جوا عنيكي  صابني
خدني  بحر الشوق  وسابني
طيري  وياالليل  وغني
غني  حبي  أحلى  غنوه
دانا  شوقي  ليكي  ريح  ونوا
أحضني  قلبك  بقوه
عمري  ليكي  وانتي  ليا
قلبي  ليكي  بنيته  غيه
وانتي  بس  ف عيني  طيري
طيري  يالا  لفوق  وطيري
إعزفي  لحنك  وميلي
ونامي  جوا  القلب  جوا
دا  انا  شوقي  ليكي  ريح  ونوا
أحضني  قلبك  بقوه
لو  تغيبي  ابقي  ارحميني
ياللي  ساكنه  جوا  عيني
ادخليها  ولفي  فيها
واجمعيني  ويا إسمك
دوبيني  ف لون  ملامحك
ياللي  ضيك  من  حنيني
هتلاقيني  بحق  آدم
أصل  لوجودك  ياحوا
حي  بوجودك  ياحوا
دانا  شوقي  ليكي  ريح  ونوا
أحضني  قلبك  بقوه
أحضني  قلبك  بقوه


(  نبض   قلبك  )

لما   روحك    جوا   منك
تندهك     مشتاقه    ليك
يبقى   قلبك  غصب  عنك
مات  في  صدرك  ومجافيك
أصل  روحك  واصله  قلبك
ساكنه  نبضك  حاسه  بيك
لما   تلقى   الهم  راكبك
تيجي    جنبك    وتلاغيك
فاصنع  الفرحه  ف حياتك
خلى  روحك  تصفى  ليك
تحضنك    وتزيد   حلاتك
تزرعك  ورد  في  واديك
حب  ناسك   تلقى  ذاتك
والسعاده    بين   إيديك


( أكتر  حاجه  توجع )

كل  واحد  فينا  بيحلم
وحلمه  أكبر من  حدوده
والخطاوي  جوا  خوف  متكتفه ..
والأماني  ع الرفوف  متستفه  ..
بارت  وغطاها  التراب
بس  باقيه  بالحنين ..
والسؤال  ملهوش  جواب
واحنا  فين ..؟
إحنا  واقفين  جوا  دايره
دايره  بينا  وروحنا  حايره
وبعذابنا  مربوطين  ..
بس  أكتر حاجة  توجع
لو  نوينا  مره  نطلع
بتلاقي  بسرعة  نرجع
مسجونين  ..
إرتضينا  الضلمه  يابا
ومبسوطين  ..
خايفين  نطلع  لبره
وبره  الدنيا  غابه
وناس  بقلوب  ديابه
والغلابه  مطحونين   ..


::    بطلت  اشوف   ::

كتبوا  قصص
كتبوا  حكايات   ...
غنوا  الغناوي
على  صوت  نايات  ...
عن  قيس  وليلى
دول  أصبحوا
م الذكريات   ...
حتى  القمر
عن  حكاويهم
فاكر شوية  همهمات    ...
وجاني  طيفك  من  سكات   ...
صحى  فيا  ذكريات   ...
نامت  سنين ...
لو حسوا  بيها  العاشقين  ...
كانوا  دابوا  م الحنين ...
كنت  ف خيالي
سارح  وهايم   ...
صحى  شيء
ف كياني  نايم  ...
خلاني  عايش  ف المناهده   ...
بعد  اما  جرحى  طاب  ولم    ...
وبدأت  أنسى
صحى  فيا  كل  ذكرى  ...
وكل  همسه  وكل  لمسه
من  إيديكي   ...
وكل  نظرة  حب
بانت  من  عينيكي ...
حتى  نار البعد    ...
لما  كنتي  بتتقلي  ...
وتجربي  غيرتي  عليكي  ...
ساعتها  حلفتلك
يجي  100  يمين
بعد  العيون  المليانين 
سحر  وحنين   
بطلت  اشوف   ...
والشعر  واخد  من  سواد 
الليل  صنوف   ...
والورود  على  ضحكتك
تعزف  دفوف  ...
حتى  المطر  نازل
يغازل  خدك
المرسوم  حروف  ..
وانا  عمري  فات
ماعادش  فاضل
 غير ساعات  مليانه  خوف ...

ورغم  ذلك  باحلف  لطيفك
  100 يمين
بعد  العيون  المليانين ...
سحر  وحنين ...
بطلت  اشوف ...
بطلت  اشوف   ...


 { صمتي  بركان  }

ياللي  جاي  طمعان  ف حبي
قلبي    قايد   نار    ونور
ياللي  جاي  تجرح  ف قلبي
قلبي   طارح   لك   زهور
 سيبني  أحلم  بيك  واخبي
حب    عاشق     للظهور
سيبني  عايش  حلم  وردي
وف  مداه  اسرح  وادور
سيب  نداه  يسرح  ف عمري
زي   ليل   مشتاق   لنور
لو   ناديت  هافرح  والبي
وازرعك   لحدودي   سور
هدي  حبه  وحس  وجدي
وجدي  شوق  يملى  البحور
لو تشوف  ف عيوني  صمتي
صمتي   بركان  لو   يثور
ياللي  جاي  طمعان  ف حبي
قلبي    قايد   نار   ونور
لو  نويت  تجرح  ف قلبي
قلبي   ليك   طارح  زهور

قلبي  ليك  طارح  زهور


(  البنت  )

البنت  حته  من  السما
حنانها  سارح  بالوما
وهواها   غيم
إياك  تقولوا  الليل
في  وجودها  عتم
أو  جاي  مضلم
كل  الحكايه  ان  القمر
من  سحرها  أصبح  رتوش
البنت  ماشيه
ع الخدود  وع الرموش
والعيون  زي  الورود
مابيجرحوش
وتجود  بضحكة  سنها
ولثغرها  حنت  وشوش

البنت  دي  زي  الندى
راسمه  المدى
أحلام  كتييييير
البنت  دي  قلب  بضمير
لو تبدر الود  ف رحابه
تطرح  سنابل  الحب  الوفير

البنت  سارحه  في  الوريد
شايف  عينيها  من  بعيد
نجوم  بتضوي  في  السما
وهلال  سعيد

البنت  في  البيت  وليفه
زي  نسمة  صيف  خفيفه
تشبه  تراتيل  الصلا
صوتها  غناوي  وجلجلا
زادت  ورود  الكون  حلا
هاديه  ولطيفه

البنت  دي  أجمل  متاع
سحرتني  بعنيها  الوساع
نازله  جدايل  شعرها
وقلبي  داب  من  حسنها
والصبح  دافع  مهرها
والليل  شراع

البنت  حد  من  الحدود
على عهدها  دابت  وعود
في  الأرض  جنة  ربنا
نظمت  قصايد  حبنا
حرفين  وعزفت  لحننا
وترين  وعود

البنت  دي  طيبه
فاتحه  البيبان  للريح
بتسمع  كلام  م الرخيص
وراضيه  بالتجريح
البنت  دي  مننا
وساكنه  جوا  الروح
هديه  من  ربنا
ونبني  ليها  صروح
وحته  من  قلبنا
تروح  فداها  الروح
تعيش  حياتها  ف هنا
راحه  وغنا  وتفاريح


( حلمك  المستني  نور )

الورد  أنواع
كل  ورد  له  شذاه  ..
والدروب  أطماع
كل  درب  له  بدايته
ومنتهاه  ..
والقلب  نفسه  ينول  مناه  ..
والحلم  كامش  في  الصدور
والكتاب  مليان  صور
صوره  عتمه
وصوره  نور
والصور  فيها  العبر
لو  هدمتك  كبرت  عليك
هتلاقيك  ضحكه
في  عيون  البشر
والزمان  عمال  يدور
وحلمك  المليان  غرور
خلاك  حجر
قاعد  بتحلم  بالقمر
وانت  ساكن  في  القبور
دا  الضلمه  للكسلان  فتور
وحلمك  المستني  نور
محتاج  يعافر
يشق  صدر  الليل
ويعدي  م المخاطر
ألف  ميل
زي  أسراب  الطيور
لما  تهاجر
وتعدي  بالحلم  الجميل
لغيطان  بشاير

::  زمنك  جبر  ::

وتسأليني
ليه  ف الشتا
بينزل  مطر..؟
وفي  الربيع  يحلى  السهر ..
والبحر  ليه  مليان  درر ..؟
ونسيتي  قلبك  ليه  غدر  ..
سافرتي  ليه
من  غير  خبر ..
سيبتيني  مستني  القدر ..
شريد  وساكن  ف الحفر  ..
زي  الخريف  اللي  احتضر ..
ومات  معاه  لون  الشجر  ..
بالمختصر  زمنك  جبر  ..
واللي  ابتدى  بكيفه  وهجر ..
باع  واشترى  قلوب  البشر ..
وخان  عهود  لاتغتفر  .. 
ويجي  دوره  يدور ينوح
لما  قلبه  يزيد  جروح
ويحس  مرة  بالخطر  ..
مايشتكيش  حكم  القدر ..
جرب  يشوف  جرح  القلوب
جرح  القلوب  بيسيب  أثر  ..
وجرح  القلوب  .. بيسيب  أثر  ..


( قلب  الشاعر )


قلب  الشاعر
رغم  جروحه
والواصله  الحلق
لسه  بعافر  ..
قلب  الشاعر  ماستخسرش
الضحكه  ف وشه
رغم  الألم  النازف  منه
و رسمهالو  حروف  ومشاعر
ضوت  زي  ضمير  الحق
لاجل  يعافر ..
قلب  الشاعر جنه  وفيها
بحور  إحساس
حارت  فيها  عقول  الناس
داس  الشر بألف  مداس
وبرغم  همومه
قلبه  الواعر
شايل  كل  هموم  الخلق
ولسه  بعافر  ..
قلب  الشاعر  ماسه  بجد
عد  جروح  الناس  وجروحه
شوف  الآآآآآه
مطبوعه  ف روحه
شقت  قلبه  الطيب  شق
ولسه  بعافر  ..
قلب  الشاعر
شايل  كل  هموم  الخلق
وبرغم  جروحه
 الواصله  الحلق
ولسه  بعافر


""   دبور  وزن    ""

دبور وزن  سلم  ودانه
للي  خانه ..
وعقرب  الساعه  رن 
آن  أوانه  ..
جاي  القدر  بالمختصر  ..
حكمك  صدر  م المحكمه  ..
والمشنقه  متعلقه  ..
هتموت  بلاش   ..
مش  هتفرق  مات  ولا عاش  ..
وانت  اللي  عايش  ع الكفاف 
قاعد  تعد  سنين  عجاف  ..
واللقمه  فيها  تأكلها  حاف  ..
وبردها  زاد  ع اللحاف  ..
ليه  تخاف  ياتعيش  جدع
ياتموت  جدع  ..
م انت  اللي  صدقت  الودع ..
ورضيت  بكيفك  تنخدع   ..
وسيبت  حقك  راح  فاشوش  ..
وانت  ف زمان  المكر  فيه
مالي  الوشوش  ..
والكدب  فيه  سم  زعاف 
مالي  اللسان  ..
وفيه  بشر  مبيرحموش ..
لو طالوا  لحمك  ينهشوك
زي  الوحوش  زي  الحيتان
خايف  تموت  والموت  أمان  ..
وانت  الضعيف
في  زمان  جبان
صدقني  موت 
دا  الموت  أمان 
(  أيوا  بحبك  )

أنا  محتاجلك  جنبي  تملي 
ياللي  عيونك  سكني  وضلي 
إيوا  بحبك  بحبك  ايوا 
وقلبي  ف حبك  محتاج  نوا 
نوا  تشيله  تجيبه  لعندك
قولي  تعالى
وانا  آجي  واحبك  ..
أقعد  جنبك
وأحرس  قلبك  لايضيع  منك 
أنا  مستني  العمر ف حدك 
بخطب  ودك 
نفسي  عيوني
تدوب  ف ملامحك ..
إوعاك  تقسى  ويزيد  صدك 
إياك  تنسى  وتهجير عشك 
غيب  على  كيفك 
مهما  تغيب  أنا  واثق  إنك 
لازم   تيجي  لحضني  واضمك 
جرب  غيري
وانا  مستني
ف عشي  ياطيري 
لما  تملك  أحضان  غيري 
وتزهق  منك 
يومها  هتعرف  ظلمك  ليا 
لما  تهشك 
وترجع  تاني  رافع  رايتك 
تعلن  ندمك  لازم  اسامحك 
دانا  بتحمل  ياما  آسيه 
وباقول   يمكن  ترجع  ليا 
وتسكن  عشك


"  مستني  ضي  "

لو  تعرفي  حكايتي  ف هواكي ..
هتقولي  قلبك  داب  خلاص  ..
لكن  باقول  عذرك  معاكي  ..
شكلي  يمكن  مش  جميل  ..
لكن  القلب  اللي  عندي ...
ليكي  فيه  مليون  دليل  ..
شوفي  عيني ..
عيني  مش  ممكن  تحب
أو تميل
وتشوف  سواكي  حد  تاني   ..
شوفي  لوني  لوني  منك ..
مدى  إيدك  لو  تحبي
لونيني  بأي  لون  يرسم  جنوني 
عنيكي  دول  وف سحرهم
تاهت  ظنوني  ..
بس  قولي  وبشفايفك  ..
كلمه  واحده 
كلمه واحده  تخلي
قلبي  يقول  حكايتك  ..
قولي  نبضك  زاد  عشاني  ..
هتلاقيني  معجباني   ..
وتلقى  قلبي  الأخضراني    ..
اتوضا  نورك  ..
دا  انا  قلبي  عاش
مسجون  غرورك   ..
عاش  ف سجنك  ..
رغم  ظلمك  رغم  جورك
مستني  ضي
مستني  كلمه  من  شفايفك
تعيده  حي


::  قسوة  خيانتك  ::

حبيبي  اللي  خاني 
ياضيمي  وهمي
ودمي  اللي  سال 
ملخص  مابينا
رجوعنا  محال 
لأنك  شمال 
وباختي  اللي  مال 
ولأنك  معايا
تعلب  وماكر 
هارجع  اذاكر 
فصول  الروايه 
واخلي  هوايا 
يبطل  غوايه 
لقلبي  الكبير 
وقلبي  يعيش 
ويطلعله  ريش 
وارجع  اطير 
حر  وأمير 
واعيش  ويا نفسي 
وياريت  تنسى  إسمي
وشكلي  ورسمي 
عشان  يبقى  جرحي
بسيط  مش  غويط
وهابقى  حويط 
لو  جيت
تشكي حالك 
هاكدب  كلامك
واقطع  حبالك
وتاخد  شباكك
وترحل  بعيد 
مهزوم  مش  سعيد 
وتجرب  بنفسك 
عواقب  خيانتك 
ومكرك  وشرك 
عشان  لما  ترجع
وتنزل  دموعك
يمكن  اسامحك 
ويمكن  جروحي
تخاف  من  خيانتك 
ف ترجع  بحيرتك 
تقاسي  عذابك 
ومن  نفس  كاسك 
تشرب  مرارك
وذل  انكسارك .. وقسوة  خيانتك ..


::  أنا  الحاوي   ::

أنا  الحاوي
مانيش  ناوي ..
ف يوم  ارتاح
م الألاعيب  ..
وأمري  عجيب ..
بلون  وشي  بالألوان ..
واوزع ضحكي  بالمجان  ..
وانا  الغرقان  ف أحزاني
وريحة  الموت ..
يصادف  يومي
 ميت  فرحه
كما  النسمه
بسرعة  تفوت ..
ولا فرحة
تصاحب  روحي
كأن  الروح
ساكنها  الموت  ..
مدبوحه  ومدفونه
ف ألف  تابوت ..
وانا  بانده  بعلو الصوت  ..
نفسي  أعيش
كما  الدرويش ..
يعجبني  أنام  ع الخيش  ..
واصاحب  الحرافيش ..
واللقمة  تهنى  وياهم
بملحايه  وكسرة  عيش  ..
بملحايه  ..  وكسرة عيش



""   قالوا  مره   ""

قالوا  مره  العيشه  مره ..
والمره  تحلى  وانتي  جنبي ..
وليه  تخبي  وتداري  عني 
سواد  عنيكي ..
وانا  قلبي  ورده
مابين  إيديكي ..
محتاجه  حبك  طمنيها  ..
وبحنانك  لملميها ..
لونيها  بلون  خدودك
إوعاكي  يوم  تقسي  عليها ..
أو تنسي  مره  تحضنيها ..
إزرعيها  ف نبض  قلبك  ..
وبوريدك  وصليها ..
عشان  ماتطرح  واحنا  نفرح  ..
ولما  نفرح  الدنيا  تفرح  ..
عشان  فرحنا  وتطيب  جراحنا ..
ونعيش  حياتنا  قلوبنا  دافيه  ..
والنيه  صافيه  تكوني  ليا
واكون  حبيبك ..
تعيشي  فيا  واكون  وريدك ..
وبحنانك  تجمعيني
وتطرحي  مني  الأنين ..
دانا  باعشقك  عشق  السنين ..
لو  يقطعوا  مني  الوتين ..
أموت  واحبك  مرتين ..
أموت  واحبك  مرتين ..




(  راضيه  ومرضيه )


زي  أهل  زمان
أبويا  كان  طمعان  ...
يجيب  م الولاد  دسته ...
وستي  بالواسطه  ...
قالت  كفاية  كده
وصل  العدد  سته   ...
تلاته  ولاد  وتلاته  بنته
وستي  كات  شاطره ...
كان  فيها  شيئ  لله
ربتنا  ع  الفطره     ...
وابويا  على  نهجها
ماشي  بأمر  الله
وانا  منه  باتعلم   ...
تتبع  خطايا  خطاه
ولما  الزمن   سلم ...
على  وشها  وعلم ...
عدى  وساب  ذكراه ...
وابويا  يحضنها
علشان  يطمنها
تفرح  تقول  الله   ...
ولما  اجي  أحضنها
وابص  ف عيونها
تفارقني   قولت  آه
ويلاقي  قلبي  دواه   ...
وتضمني   ضمه
وابويا   يتسمع
يقول  لها  يامه  ...
الواد  بيدلع      ...
تقول  ياواد  مالك
غيران  وهتولع  ...
وتضحك  وتتبسم
وتقول  ياواد  قسم  ...
إلبس  كدا  وارسم   ...
ياروحي   وعنيا
دا  اللمسه  من  إيدك
بتزيدني   حنيه   ...
والنظره  من  عينك
لجرحي   مداويه   ...
ومرت  عليها  سنين
من  العدد  ميه   ...
والأصل  مش  بالكلام
الرك  ع  النيه     ...
حست  طلوع  الروح
ندهت  عليا  ف يوم
تلزمني  بوصيه  ...
قالتلي  لما  أموت
مش  عايزه  أسمع  صوت
ولا عايزه  أسمع  زيطه ...
خليني  أدخل  قبري
وروحي  مبسوطه  ...
أنا  عشت  بينكم  عمري
راضية  ومرضيه  ...
وقف  الكلام  ف الزور
محشور  رفض  يطلع 
والقلب  كان  يدمع  ...
ومشينا  ف المشهد
وربنا   يشهد   ...
سمعنا  زغروطه
مظبوطة  ع النيه   ...
كأنها   زفه
وعروسة  متحنيه  ...
وهيى   بتودعني
بنظره  من  قبرها  ...
نسيت   ترجعلي
أمانه  كات  عندها  ...
كات  روحي  ف عيونها
وخدتها  حنيه  ...

كات  روحي  ف عيونها
وخدتها  حنيه  ...


::   ستي  حمده   ::

ستي  حمده
كات  أميره  بغصن  بان  ..
دفة  إيديها   صولجان  ..
وكات  شراع  والريح  جبان ..
وكات  سفينه  تساع  مافينا  ..
وتعدي  بينا  للأمان ..

ستي  حمده  كات  محبه  ..
نظره  عينيها  كات  دليل  ..
كات  نسمه  سارحه
ف حضن  ليل  ..
كانت  مرايتي  وضحكتي
وحلمي  الجميل  ..

ستي  حمده  كات  جناح  ..
يحمينا  من  برد  الشتا   ..
كانت  دوا  يداوي  الجراح ..
ولما  يجي  الصيف  مباح ..
تبقى  سحابه  ف السما  ..
تجري  وتفرد  ضلها     ..
ف غيطان  براح  ..

ستي  حمده
كات  زي  ورده  ..
لأ  ..  لأ
الورده  كانت  زيها ..
واخده  الجمال  من  حسنها  ..
واسألوا  النسمه  اللي  سارحه
كانت  تغير  ..
وكثير  تميل  على  خدها  ..
وتشيل  عبير  من  عطرها  ..
وتسرح  بعيد  ..
ستي  حمده
كات  زي  عيد ..
كات  نبض  سارح
في  الوريد ..
لما  كنت  احتاج  لها
وشوقي  يزيد  ..
كنت  باستهبل  ساعات ..
واعمل  مريض  ..
عشان  تأخذني  ف حضنها  ..
واسمع  حنين  من  قلبها  ..
واصل  لقلبي  ..
يهمس  يقولي  ياولد  ولدي  ..
ياأغلى  شيئ  ف الدنيا  عندي 
يانن  عيني  وروحي  مني  ..
الود  ودي  ياكبد  ستك ..
أشيل  بدالك  التعب
وانت  سلامتك  ..

ستي  حمده
أجمل  عيون  حست  ودادي
لما  كانت  ساعة  عصاري 
تيجي  وتقعد  قصادي 
كنت  اشوف  طيبة  عيونها
كان  قلبها  م الحقد  فاضي
ستي  حمده
كات زي طير
سارح وشادي  ..

ستي حمده
كات  زي  نوار الأراضي


 (  تتعدل  موازين  )

نقطه  ومن  اول  السطر
وهل  زمن  ...... الشر
بالغش  ......  والتدليس
وضاعت  .... المواريث
والشرع   ولي   تعيس
بإيدينا    قيدنا    الجمر
وشربنا  كاس ..... المر
بالفتوى    من   جاهل
ف الشرع .... يتساهل
واحنا   اللي   نستاهل
غضينا  عنه .... البصر
فيروسه  بينا .... انتشر
والعيب  بقى ......عاده
والعاده  ......... وداده
ساهيه ......... وولاده
إبليس   فرح   واتمنظر
لما     غوانا     وسطر
للخلق  .........   أنبائنا
وشد  ..........  أوثاقنا
والجهل  كان .......داءنا
والظلم      دفع    المهر
أصبح   عريس  العصر
ماشي .......  بيتمختر
ع العدل ....... يتشطر
والعدل......... بيتحسر
والسهل  بابه .....يسير
إمتى  الضمير  هايغير
ويصحى  من .... نومه
ويضوي ........بنجومه
ويجيلنا .........بعلومه
ماشي   وزاده   الصبر
طمعان  صنوف  الدهر
فجأه  ............ تتبدل
وربنا ........... الأعدل
أحوالنا .......... تتعدل
ونعود    لذاك   العصر
رافعين  لواء .... النصر
نحمي  عماد ..... الدين
ونطرد .......الشياطين
ورباطنا  يبقى .... متين
ونطفي  نار .......الغدر
ويهل  نور ........ البدر
فاحفظ  لسانك ..... زين
بالعقل  تبقى .... رزين
وتتعدل ........ موازين

وتتعدل ........ موازين


( سيرة  ابويا  )

مين  اللي  قال  أبويا  مات ..؟
وابويا  عايش  في  الحاجات
لسه  روحه  عايشه  فينا
سحابه  بتضلل  علينا
وصوته  بيشق  السكات
يومياتي  اروح  على  سكه
 حضنت  خطوته
 وامشي  الساعات
والعمر  فات ..
وابويا  أصبح  ذكريات
واحشني  ابويا
مشتاقه  روحي  لطلته
مشتاق  لحضنه  ولهفته  ولحظة  لقاه
أبويا  كان  بيضحك  تملى  ع الحياه
ولا مره  تعبت  خطوته
ولا عمره  تاه
وعشان  سلامة  نيته
أبويا  طابت  زرعته
فاكر عيدان  الدره
وقطف  الشواشي
والأرض  طارحه  المغفره
والنيل  نجاشي
والنيه  صابحه  مخضره
يلم  الكيزان
عشان  ماندي  للجيران
والخير  يوافي
أبويا  كان  طيب  قوي
كالنبع  صافي
كان  زي  نسمه  حنينه
ترمي  العوافي
والسيره  باقيه  وسطنا
طارحه  السنابل
يادعوه  نايمه  ف قلبنا
والرب   قابل
تنزل  علينا  بالهنا
 نلم  الحصاد
وازاي  نكابر
 أو  نغالط  بالعناد
والبركة  جند  من  السما 
والحب  زاد
ومين  اللي  قال 
ان  السعاده  شوال  فلوس
غير السكارى  والحدادي  والمجوس
دول  هاموش  مابيفهاموش
ولايعرفوش
إن  السعاده  قلب  طيب
يبتسم  تضحك  وشوش
 والسعاده  ف سيرة  ابويا
وسيرة  ابويا  مخضره
ودعوه  باقيه  في  النفوس

وسيرة  ابويا  مخضره
ودعوه  باقيه  في  النفوس


( أنا  شاعر على  قدي )

أنا  صيتي  في  الخلق  سمع
كلامي  واضح  صريح
يسمعني  أبو القلب  يدمع
شاعر  وفلاح  فصيح
كتبت  الشعر  بأصوله
بدون  تجريح
وابدأ  قولي  بالفاتحه
ويجي  الحرف  ع البطحه
تقوم  العقول  شاطحه
تقول  عني  وانا  المعني
وليه  ياعم  تجرحني
وتفضحني  بين  الناس
أقوله  ياعم  بعد  الشر
واحلف  يمين  الله
أنا  باكتب  بحق  الله
لاعمري  تاجرت  بحروفي
ولايمكن  هابيع  الآآه
ولايمكن  هاعيش  حيرتي
أنا  قلمي  بيكتب  آآآه
ونبض  حروفي  من  سيرتي
لا انا  باير  ولا معطوب
ولاخايف  من  المكتوب
أنا  بيتي  ضد  الطوب
مانيش  مغصوب  ولا غشاش
أنا  أصلي  هنا  في  بطاش
وتد  مدقوق  في  سابع  أرض
باصلي  العزة  سنه  وفرض
واطوف  واسعى  واصون  العرض
ومش  ذنبي  إن  انا  باكتب
عن  المجاريح
فاييجي  الحرف  في  دماغك
يجيب  داغك
في  ثانيه  تطيح
وتحلم  حلم  مش  قدك
تروح  مسطول  يروح  شدك
تنام  دايخ
كابوس  الكبر  صور لك
عن  إني  باغير  منك
تقوم  قايل  كلام  بايخ
وانا  في  الأصل  مش  شايفك
ولا سمعك .. ولا حسك
الظن  في  شرعي  عديته
ودوست  عليه
وعندي  كتير  من  الأمثال
مثل  ستي  دليلي  فيه
( قتيل  إيديه  ماينبكي  عليه )
ف مش  ذنبي  إن  انا  محبوب
وانا  شاعر
على  نظم  الكلام  محسوب
بلاقي  حروفي  مبدوره
في  كل  شتات
ولما  إمشي  تمشي  ورايا
كأني  الشيخ  أبو الكلمات
وانا  سارح  مع  وفاسي
تناغش  فيا  إحساسي
وتعد   عليا   أنفاسي
ولو  زعلان  تروح  خايفه
تقول  مالك
وإيه  غير  احوالك
وليه   ضحكتك  جافه
أقول  مالوا  ومالت  الكفه
فتعمل  م الحروف  زفه
وتجمع  م الغيطان  نوار
وتبدر  سكتي  أنوار
وتدفع  للفرح  ديه
وتشوف  الضحكه  في  عنيا
واقول  مبسوط
والآقيها  محلوه  بطعم  التوت
وتاخد  إيدي  في  إيديها
وانا  وهى  قدر  مكتوب
وانا  واحد  على  قدي
برص  حروفي  من  كدي
ومشاعري  تحيي  قلوب
ومشاعري  تحيي  قلوب


{  حدود  أمانينا  }

وحبيبتي
لابسه  منديلها
وغازله  ضفايرها
كما  الصفصافه
ع  الترعه
نازله  جدايلها
تبوس  نيلها
يهل الصبح  ويجيلها
على  الأرغول 
يغني  لها  مع  القمره
غناوي  البيضه  والسمره
وقلبين  على  الشجره
وشعرها  المغزول
جدايل  نور  تملي  يقول
كلام  معسول  دوا  عنينا
وحرفين  أسامينا
ع الساقيه  والتوته
ونسمة  حب  تتمايل
على  اللحن
اللي  ف النوته
ونسهر
في  الهيام  ليلنا
طايرين
ومعانا  أحلامنا
تاخذنا  لفوق  حدا  النجمه
نسايم  شوق  تمرجحنا
بخفه  وذوق  تفرحنا
وتيجي  الشمس  تسرقنا
ف توجعنا  أشواقنا
وتجرحنا  لاجل  نفوق 
وننسى  الألم  بالشوق
ونركب  مراكبنا
نحلم  تعدينا
لحدود  أمانينا
وف بحر  أوهامنا
تقسى  وترمينا
تضحك  على  دموعنا
لو  قلنا  حبينا
هى كدا  الدنيا
قاسيه  على  قلوبنا