نمبر ون .. بقلمي الفلاح الفصيح .. معوض حلمي

سباعيه

.......  نمبر  ون  .......

.............................

والله  انا  عقلي   اتجن
سمعت    الواد    الجن
بيغني     النمبر     ون
بكلام   معفشش   فش
ولسان  معيوب   بيغش

اللهجه ماهيش مفهومه
بتخاطب   عقل   البومه
يرحم   أغانيكي  ياثومه
لو شوفتي أغاني الألش
ولسان   معيوب  بيغش

أراجوز    متلون    ورد
بيتنطط    زي     القرد
مخلوق    عاشق   للهد
وعقول  محشيه   بقش
ولسان  معيوب  بيغش

ويقول   لك   انا  فنان
دا   فن   يجيب   غثيان
بيودي   على   التوهان
ويخلي   دماغنا   توش
بلسان   معيوب  بيغش

الواد   لابس    حظاظه
وسلاسل  م   الممتازه
ومفكر     دمه    لذاذه
ومحني إيديه  والرمش
ولسان  معيوب  بيغش

من  بعد  أغاني   حليم
وثلاثي    الشيبيريبريم
شوفنا  معاكوا   الضيم
فيروس ف ولادنا يحش
بلسان   معيوب  بيغش

والحل   نداوي   العيبه
ونشوف أسباب  الخيبه
ونرجع    مصر    نجيبه
ونحارب   كدب   الوش
ولسان  معيوب  بيغش
............................
بقلمي الفلاح الفصيح
معوض حلمي
منشأة بطاش
تمي الأمديد
دقهلية