ديوان حلم عادي
وانا مسافر )
---------------
شيطان الشعر سهاني
نيمنى على وداني
عمل تعويذة علشاني
ومنعني أرد جواب
سقاني السحر مش بحساب
لأنه عارفني مش كداب
ولا واقف ورا ل ابواب
أتسمع وأتصنت
عشان أسرق أمان الناس
ولأني مخاوي من صغري
كشفته قوام
ف سابني أعوم على كيفي
خدتني الريح لبحر هيام
ودا بحري ومملكتي
وفيه أنغام وعزف نايات
لقيته مره بالصدفه
وانا مسافر
مابين الأرض والسموات
معايا تأشيرة بس مرور
لمحني بعينه حياني
صباح النور
وشوفت اللهفه ف عيونه
تلت لهفات
ف سيبت علامه من روحي
على حدوده
وانا باختم الجوازات
لقيت طيفه كده
سارح في وجداني
ولقيته زيي وحداني
مالوهش عزول
ولايعرف خطوط العرض
ولايعرف خطوط الطول
ولا فاتح على المحيطات
دا فاتح بس على قلبي
وشمسه الدافيه ترسمني
على وشه
وتيجي النسمه تحضني
أنا ورمشه
قابلني بضحكه وداده
وانا العاشق كما العاده
وشافني عيوني مكسوره
وضايعه ملامحي ف الصوره
كأني ف لحظه لخبطته
ونام مووجه على شطه
لقيته مفارق العافيه
سألني الدمعه ليه وافيه
وليه الضحكه مش صافيه
فقلت الدنيا مش ع الكيف
طعم الغدر مررها
وعايشينها رغم الزييف
فقلت أطير مع الأحلام
أجيلك حبه نتسامر
واحشني قلبك العامر
ف خليني هنا جنبك
ماانا زيك ماليني هيام
ماانا زيك ماليني هيام
---------------
( إزاي أطير )
لمين هواك
ياطير وطاير بالوما
مين علمك تملى السما
فرحة غناك
مين علمك ..؟
تبني عشك بالغنا
وان الأماني ممكنه
تيجي الوليفه بالهنا
وتحضن هواك
مين علمك ..؟
تنسى الألم
وتعيش ملاك
بجناح وريش
حزنك مفيش
مانتاش أفيش
زايد حلاك
صوتك بيعزف دندنه
والنسمه جايه حنينه
والدنيا عندك هينه
سعدك ملاك
وإنت الأمير
والإسم طير
عبر الأثير
وريني ضيك
علمني زيك
إزاي اطير
واسبح معاك
في بحور هواك
ياطير وطاير بالوما
مين علمك تملى السما
فرحة غناك
وتملي عشك بالغنا
وتملى عشك بالغنا
(صباح الورد يا سمره )
صباح الورد ياعمري
يامرويه بعرق ناسك
صباح الورد ياسمره
يافارده العزه نبراسك
صباح من قلبي وناسك
وانا ف محرابك الناسك
وانا فلاحك المصري
فصيح من اول التكوين
صباح الورد والياسمين
وهاسرق موجه م الطايرين
واذيعهالك ع الهوى حصري
صباح الورد ياعمري
صباح الورد ياعمر
( با طالب بحنانك )
م الأخر
أنا بتحمل قرص البرد
أنا واقف لاجل عيونك
حائط صد
وبرغم جنونك
سرقاني عيونك
وباشيل من كونك
برد وشرد
وانا كلي إراده
أنا أصلي بحبك
حب عباده
أنا قلبي
زي حصان طرواده
مخلوق بيعافر
متعبي جيوش جراره
والصدر سواتر
تمنع عنك أيها غاره
أنا واقف وبكل جساره
حارس على بابك
صاحي ومش هتاخر
وهامشي طريقك للآخر
أنا مؤمن بيكي وباتفاخر
وعشانك
هاكتب بإيديا بيان
وهاهدم أسوار سجانك
وهاعلن ثوره
في كل ميدان
لاجل مايوصل صوتي
لحد ودانك
وتشوفي بعينك أوضاعي
وتحسي شويه بأوجاعي
أنا إبنك ومانيش طماع
ولا طالب عز وجاه
ولا عايز اهد كيانك
أنا عايز أحس
إن انا إنسان
أنا بس باطالب بحنانك
أنا بس باطالب بحنانك
______________
( أزرع الإيمان )
قلت أبدأ بالسلام
لما قالوا إن السلام
يمحي الأسيه
وازرع الإيمان وتد
يشد خيمة
مصرنا الحره الأبيه
لاجل مصر ماتعلى بينا
وتبني فينا عقول عفيه
عقول وتبدأ م الأساس
مصر زارعه وطارحه ناس
وناي بيعزف سمسميه
وبندقيه حاضنه فاس
وضهر حمال الأسيه
( أنا العاشق )
كتب التاريخ عن العشاق
وعلى جبين الزمان سطر
وانا العاشق كما عنتر
وتمشي خطايا واتعثر
وأمد إيديا لترابك
ألآقي القلب متعطر
يامصر يام الجبين أزهر
نبضك وفا حضنك دفا واكتر
مين عنكي يتأخر مايتعطر
بريحة المسك والعنبر
ومين قال إن انا ناسي
يانبضي ووحي إحساسي
وانا من ناسك
قمرك ووناسك
أصد الصعب لو جالك
وانا الناسك ف محرابك
وانا أمامك ودجالك
وانا الواعظ كدا أوقات
وانا بتاع التلت ورقات
ولو ميت ألف تعلب فات
عمري مانسى أفضالك
وتوبي اللي اتغزل
من شالك
وانا الحرف اللي نظم
موالك صبا وحجاز
وانا الوتر اللي عزف
لحنك وقالوا نشاز
وانا النازل نزال قلبك
وعمره مافاز
وانا الصعب اللي مش
مفهوم كما الألغاز
لكني الماشي ف رحابك
وف ركابك بدون تفكير
لا ليا كوم فيكي
ولا عمري كنت أمير
وعدى العمر ع الفاضي
وانا راضي .. أنا راضي
أكون حارس على بابك
واموت لو أي شئ صابك
وانا المطحون ف الأزمة
وصفر شمال مالوش لازمة
لكن عاشق .. أنا عاشق
أنا صقر السما الباشق
على حدودك وتد راشق
أنا العاشق .. أنا العاشق
( سواقي وأراضي )
يابلدي ......... الأبيه
ياحره ........ وعفيه
رسمتك ..... قصادي
سواقي ... واراضي
يازرعي ... وحصادي
وخيري اللي زاد
يابلدي ........ الأبيه
ياحره ........ وعفيه
يابانيه ..... المصانع
كنايس ....... جوامع
صدرك ........ موانع
وعزمك ......... زناد
يابلدي ........ الأبيه
ياحره ....... وعفيه
يافن ...... ومسارح
وضل ...... المطارح
وحلمي اللي سارح
وطارح ......... ولاد
يابلدي ........ الأبيه
ياحره ....... وعفيه
يانبعي .... ومعيني
بعينك ...... راعيني
قومي .... إندهيني
كاويني ...... البعاد
يابلدي ....... الأبيه
ياحره ...... وعفيه
ياطارحه ..... وشال
وحضن ...... العيال
ياخفه ........ ودلال
وغاية ....... المراد
يابلدي ........ الأبيه
ياحره ....... وعفيه
ياغله ....... وسنابل
وصوت ...... البلابل
ياعزم ......المناضل
في عز ..... الجهاد
يابلدي ........ الأبيه
ياحره ...... وعفيه
ياحنة ....... كفوفي
وفاسي وشادوفي
ياعرقي اللي نازل
وراوي ....... العباد
يابلدي ....... الأبيه
ياحره ....... وعفيه
ياشمسي .. وضلي
ووردي ...... وفلي
وناسي اللي مني
وصالك ........ وداد
يابلدي ....... الأبيه
ياحره ....... وعفيه
ياراويه .. الشراقي
ياأرض ..... التلاقي
ياحبي اللي باقي
هدايه ...... ورشاد
ياحبي اللي باقي
هدايه ....... ورشاد
" مجدافك صفيح "
لما تبدأ رحلتك ..
حاسب على خطوتك ..
خطوتك مركبك ..
وبارك تباريح
شديد الريح ..
ومجدافك صفيح ..
وقلبك الغرقان وجع
مستني موت ..
أو بطن حوت
حتى الودع قال الجدع ..
محتاج شراع والشراع
ف النوا ضاع ..
سابك وراح مليان جراح ..
زي الصديق شافك غريق ..
لا بل ريقك ..
ولا مد إيده يشد إيدك ..
لو كان صديق إزاي يبيعك ..
دا الصديق ف الرحلة ضهر ..
يشيل همومك
وبعدي بيها ألف بحر ..
ويكون شراع
يصد عنك أعتى ريح ..
لو جريح يقاسمك
الجرح بصحيح ..
الصديق لو كان صديق ..
هيكون وفي ويكون جدع ..
ويداوي قلبك م الوجع ..
ويداوي قلبك م الوجع ..
( إنت مش نوح )
إنت مين ..؟
تايه وبتعد السنين ..
واقف طابور المخدوعين ..
مجروح وجرحك زاد أنين ..
خايف تفضفض بالكلام
والكلام أصبح سكوت ..
خايف تخطي خطوتك ..
سكتك مليانه موت ..
نفسك تفوت ..
ف سفينة تحضن لهفتك
أو بطن حوت ..
وتعدي بيك بر الأمان ..
بس انت مش نوح ..
ولا فيه طوفان ..
ويونس
اللي طلع غضبان ..
ماكانش طمعان ف جاه ..
ولا مرة تاه عن دعوته ..
ورب العباد وبرحمته عداه ..
ف ضلمة ف بطن ضلمة ..
ف بطن حوت
لشط فيه ناس طيبين ..
والأرض حضنت نسمته ..
دابت حنين ..
حست جراحه ولهفته ..
نبتت عشانه الياقطين ..
وعشان سلامة نيته ..
طابت جراحه وسكته ..
بأمر رب العالمين ..
وانت مين ..؟
ونيتك سكتها فين ..
تايه وبتعد السنين ..
واقف طابور المخدوعين ..
مستني السفين ..
والحوت الأمين ..
والأرض اللي كانت طيبه
راحوا ناسها الطيبيين ..
نشفت وماتت
ومات معاها الياقطين ..
ومات معاها الياقطين ..
( يالا يامصري )
مين اللي قال ان النجوم ...
اللي ف سماكي دول نجوم ...
دول ملايكه
بيحروسوكي م الهموم ...
لو تندهي يامصري قوم ...
من الشقوق تطلع أسود
وقت اللزوم ...
يالا يامصري
هم وقوم بالروح افديها ..
دا مفيش شيء أبدا
يغلى عليها ...
خلي الندل اللي بيكرهها
وواكل خيرها ...
زي ألسوسه ساكنه جسدها
بتنخر فيها
يرحل عنها
ويرمي حمولها
ع اللي شاريها ...
دا اللي شاريها
أكيد يحميها م التزييف ...
هو الأقوى عشان على حق
هو عفيف ...
عمره ماباع
ف ترابها وخانها
عمره ما كان
في الأزمة ضعيف ...
عمره مافارق بابها وسابها
هو الحارس هو شريف ...
يالا يامصري
إنت الطيب إنت المجدع ...
عزمك يحمي بلادك واسمع ...
عزمك يشبه دانة مدفع ...
عزمك حضن يلم ويجمع ...
عزمك درع يصد ويمنع ...
يمنع كل آيادي الغدر
تهدم ف المدنه وف المصنع ...
عزمك ساقيه تروي الأرض
عزمك همه تصون العرض ...
عزمك همه تصون العرض ...
( يابن بلدي )
يابن بلدي ..
ليه مصمم ع الخيانه ..
ليه تبيعها ..
ليه تخليني أعاني
كنت فاكرك زيي منها
كنت فاكرك طرح نيلها
فجأة شوفتك حد تاني
حد كاره لون سمارها
حد مستني الإشاره
وبمهاره يبيع ترابها
حد مفتحش الكتاب
حس بيها وعاش عذابها
والأمهات بدموع عنيها
وضت ولادها للجهاد
والنيل بيجري ف البلاد
شايل معاه حلم الولاد
يروي الأراضي والعباد
تطرح فرح تطرح غناوي
وجاي الولد بالفرح ناوي
يكتب كتاب ست البنات
والزرع دايما خيره وافي
جاي حصاده في الميعاد
واللي زاد حيرتي وناري
إنتوا ليه زايدين عناد
هتوصلونا لحد فين
قطعتوا ليه حبل الوداد
عايشين مابينا خوانين
كدابين والكدب زاد
كارهينها ليه ومفرقين
ورضعتوا الأسى
من صدر مين
ومصر دين طهر وعباده
ف قلوب ولادها الطيبيين
ومصر دين طهر وعباده
ف قلوب ولادها الطيبيين
:: غاويه وعشقاني ::
يامصر أمرك عجب ..
لو مره قولتي الآه
حسيتي يوم التعب ..
تلاقيني قايد نار ..
أعيش غريب الدار ..
وامشيلك الرحله ..
مشوار ورا مشوار ..
لو سكتك صعبه ..
الصعب يومها يهون ..
لو بتلاقيني عيون ..
في نهاية الرحله ..
غاويه وعشقاني ..
وتروق بقى وتحلى ..
ويجي نهر الشوق يوافي ..
تهدي ولاتخافي ..
ف عيونك الحلوه
تحلي أوصافي ..
ويجي فجر بنوره دافي ..
يصحى حلمك الغافي ..
وترجعي أجمل صبيه ..
وتستحمي ف نور عينيا ..
وتلبسي منديل ب أويه
وطرحتك والجلابيه ..
من جديد وتعيشي فيا ..
تندهي الحال ينصلح ..
العرق بالخير طرح ..
بساتين فرح ..
والقلوب ترجع تتوب ..
بالدموع تمحي الذنوب ..
والإيدين الشقيانين
تتوضا نورك ..
حضنك أمان الغلبانين
مش حد غيرك ..
واحنا دينك أسود عرينك ..
فداكي روحنا وتسلمي
ونعيش ف خيرك ..
فداكي روحنا وتسلمي ..
ونعيش .. ف خيرك ..
( تطرح سنابلها )
أنا نازل أعمل ثوره
ثوره من نوع فلاحي
هانزل بالليل ف القمره
والفاس ف إيديا سلاحي
أروى الأرض السمره
ع الساقيه بلف وصاحي
لاجل ماتصبح خضره
واعزقها بكل كفاحي
واحرسها لعند الغله
تكبر وحصادها يوافي
تطرح سنابلها الصفره
وتميل يهنالي صباحي
ويهل الخير ب حصادها
ويطير الطير صداحي
يغني معايا عشانها
وأطير وياه ف براحي
وأطير وياه ف براحي ..
( حلم عادي )
كنت باحلم حلم عادي
كان ودادي أبقى شاعر
وانظم قصايد ع الورق
واللي يقرا حروفي يقرا
بس يقرا بالمشاعر
حلم عادي مش كبير
لاجل يملا قلوبنا خير
ويصحى جوانا الضمير
عشان يجينا الحب طاير
من هواه نغزل ضفاير
راح نخاصم كل فاجر
واللي قلبه شديد وواعر
والأمان يسرح في لمه
واللي فاتح بابه سمى
قام لصوت الفجر صلى
واللي سارح كله همه
واللي تاجر واللي صانع
واللي رايح أرضه زارع
واللي سن فاسه قالع
كل خاين كل بايع
واللي قلبه كان حقود
واللي واقف ع الحدود
حالف يمين الله يزود
قام وقال بالروح هاجود
لما شاف الشر دايس
والمدرس واللي دارس
والفقير على بابها حارس
صوته بيلم النوارس
صوته عامر بالمشاعر
في الوريد دايما مسافر
جوا روح الروح بيعافر
صحى حلمي الغافي فيا
صحى فيا نبض شاعر
نزلت قصايدي ع الورق
وحروفي سالت بالمشاعر
للي يقرا حروفي يقرا
بس يقرا بقلب شاعر
للي يقرا حروفي يقرا
بس يقرا بقلب شاعر
:: تايه وقلبك هام ::
ع السكه سكة سفر
تايه وقلبك هام ..
قاعد بتحسب
فرحتك أوهام ..
والعمر بيعدي
وهم ملضوم بوهم ..
وعدت رحلتك أوهام ..
ع السكه تاهت سكتك
واتبعترت أيام ..
وحلمك المليان وجع ..
فيك إنخدع ..
لساك بتحسب
رحلتك أحلام ..
دا الحلم زي الزهور ..
من بعد عتمة ليل
محتاج يشوف النور ..
محتاج لحبة ندى
تخضر أرضه البور ..
ف يطرح قلوب خضرة ..
تفرد جناحاتها ..
تطير ف السما وتدور ..
كما الطيور سارحه ..
زي الصبايا الحور ..
وتغني للفرحه
زي الصبايا الحور ..
وتغني للفرحه ..
"" التوته ""
حلمت ان انا ف حدك ..
هاشوف حسنك ..
واشوف قدك ..
والآقي الشمس
متحنية من خدك ..
ومين يقدر يشوف خدك ..
ويقولك دا زي الورد ..
ولون الورد من خدك ..
وقلبك بيسقيه شهد ..
فيطرح نور
وتدور النجمه حواليكي ..
ياقمرايه ..
وسارحه ف سمايا ..
رسمتك فرحه جوايا ..
لعمري الجاي ..
ليه روحتي وخدتي الضي ..
وسيبتي منه حبة ذكريات ..
دا الزمان الباقي منك
ذكريات ..
والذكريات الباقيه منك
شيئ بديع ..
تملى تيجي بالفرح
زي الربيع ..
كل اما اروح للتوته وحدي ..
ألآقيها تحكي بصوت وديع ..
عن حكاوينا القديمه ..
وشاهده على لمسة إيدينا ..
والآقيها تسرح ف الخيال ..
زي ما تسرح عينينا ..
لساكي برضه ياتوته واقفه ..
تحكي عنا ..
فاكره تنهيدة قلوبنا ..
وقد إيه م العشق دوبنا ..
لساكي برضه ياتوته واقفه ..
تحلمي بلحظة رجوعنا ..
بعد ماتاهت دروبنا ..
وتعبت خطاوينا وضعنا ..
وتعبت خطاوينا وضعنا
( قلبي إمام )
أنا عديت حدود الخلق
وباكتب حق مش باطل
وقلبي ماهوش عاطل
لأنك فيه تساوي الخلق
وزرعته جناين ورد
ف يتمايل على عنيكي
ويرمي الشهد
وانا ع العهد حبيتك
وخبيتك من الحاسدين
وخوفت عليكي م النسمه
ف غطيتك برمش العين
حتى الحلم في غيابك
خاصمني سنين
وانا العاشق لأوصافك
وسهم الحب أهو صابني
وليه سابك
وليه مداريه أسبابك
وسيباني ماليني حنين
وانا الشاعر
وباكتب شعري بالإحساس
واغمض عيني على رسمك
ف تجري حروفي على
إسمك قصايد ماس
وانا الكلمه اللي داوت ناس
وليه وياكي بتألم
وبابني أساس من الأوهام
وباحلم حتى وانا صاحي
وجاني منام
لقيت طيفك مع طيغي
وعمري هيام
وقلبك صلى ورا قلبي
وقلبي إمام
وطال الحلم ف رحابك
وانا المرهون على بابك
وفيت بالندر أعتابك
وعدى العمر ف الأوهام
وليه شايف على حدودك
حرس واقف كما الددبان
وكل الكون حدود كونك
وإيه ذنبي أعيش دونك
ومين عباكي بالأوهام
ومين قال لك عليا كلام
فزاد الشك وظنونك
وزرعتي الطريق ألغام
لا انا عارف أخطيلك
ولا قادره خطايا تمد
وانا مادد حبال الود
ومش ناسي اللي كان بينا
سنين عشناها في الجنه
ف تطرح ضحكتك حنه
فتتحنى خدود الورد
وليه زاد البعاد والصد
وكلمة شر تصبح سد
ماتيجي نسد باب الريح
ونتعاهد على التصحيح
ونبني صرحنا العالي
ونحمي قلوبنا م التجريح
ونحمي قلوبنا م التجريح
( نازل بفاسي )
سألوني نازل
قلت طبعا
لازم انزل ..
بس مش
نازل ميدان ..
ولاناوي أعمل
هيلمان ..
ولا هاهدم
البلد
إللي كانت
يوم أمان ..
أنا نازل أعلن
إني مصري
ومصر ديني ..
نازل بفاسي
لاجل قوتي
ولاجل أمني
سارح لأرضي ..
حتى لو
زايد أنيني ..
هاصلي فرضي
واروي أرضي ..
من حنيني ..
"" أنا مش هاتوب ""
قالولي توب ..
وادعي ربك
يغفر ذنوبك ..
قلت المحبه
ف شرع ربي
مش ذنوب ..
لو تعرفوا
سر المحبة وسحرها
جوا القلوب ..
المحبة ف قلبي
طارحة ..
ورود وفرحة ..
ونسمة سارحة ..
إزاي اتوب ..
لو قالوا مرة
الشمس نسيت
وطلعت م الغروب ..
أنا مش هاتوب ..
لو حبي ليكي
سموه ذنوب ..
هاحبك اكتر
وأكيد هاكتر م الذنوب ..
ومش هاتوب
مهما يلوموني ..
وعن عيونك يبعدوني ..
ويسألوا عني يلاقوني ..
راسم تفاصيلك ف كوني ..
سهران عشانك
مانامت عيوني ..
مدى إيدك طمني
حيرتي وظنوني ..
لو تعشقي م البشر
مليون دوني ..
هاتلفي ياما وتتعبي
وهترجعي ..
مشتاقه لدفا قلبي
وشجوني ..
مشتاقه لدفا قلبي ..
وشجوني ..
{ إوصفلي شعورك }
لو تعبت خطاويك ع السكه
لو تاهت حيرتك وظنونك
لو حواليك الدنيا بحالها
وانت وحيد عايش بهمومك
أنا زيك عشت شعورك
ف ارسم على خدك ورده
لونها بألوان الطيف
وسيبها تداعب خد النسمه
ف البرد أو ليلة صيف
وساعتها اوصفلي شعورك
طب طلع من قلبك ضحكه
ترسم على وشك نورك
هاتدوب دمعة حزنك
قدام فرحك وسرورك
وساعتها اوصفلي شعورك
طب إرمي حمولك على بكره
وقول الكلمه اللي تزينك
وازرع من أحلامك فكره
هاتشوفها بتطرح خيرك
وساعتها اوصفلي شعورك
أنا أصلي مجرب ميت مره
وشعوري أنا باوصفهولك
قوم عيش الأيام الحلوه
سامح واتخطى ظنونك
هتلاقي الدنيا بتضحكلك
وساعتها اوصفلي شعورك
وساعتها اوصفلي شعورك
:: لسه فاكراني ::
سألوني عن مهنتي ..؟
قلت أنا شاعر
رص الحروف شغلتي ..
واعرف أنظم كلمتي
أستاذ مشاعر
سكتي مليانه خوف ..
ع الطريق دايما مسافر
خطوتي ف إيد الظروف ..
قبل اما تبدأ رحلتي ..
وجيت أسافر
كانت ف إيدي أجندتي ..
وفيها رصيت القصايد
والخواطر والحروف
وكتبت عنوان المهاجر
ع الأفيش ..
خرابيش حرفوش
من الحرافيش ..
وناديت لبنتي
خلي دي عندك أمانه
يمكن وشوشنا
ماتتلاقيش ..
ويبقى سيبتلكم أثر
هو إيه يعني البشر ..
غير حبة حروف
والذكريات
برضك حروف
والأسامي والكتب
حبة حروف
ومتخافيش ..
لو بيينا طال مر الغياب
ومتزعليش ..
لو قالوا عني
أبوكي مات
إياك دموعك تهزمك
متعيطيش ..
دا العمر محسوب
في الكتاب
كلنا لازم نموت
داري حزنك والعذاب ..
قولي ابويا لما عاش
عاش أسد
ولما مات مات جسد
لكنه عايش ف الكتاب ..
عايش بالمشاعر
والقصايد والخواطر ..
أبويا كان للخير
والحب شاطر ..
خليكي فاكره
إن انتي واخواتك
ساكنين كياني ..
لما تيجي روحي
مشتاقه لهواكم
وتزور مكاني ..
تلاقاكي فاكراني ..
سهرانه مع كتابي
وحضناني ..
وتيجي جنبك تحضنك
هتحسي بيها ..
دا انا أجمل قصيده
في الكتاب كتبتهالك
إبقى افتحيها ..
نفسي روحي
تحس إيدك
بين حروفها تعطريها ..
وتشوف عنيكي ع السطور
سرحانه فيها ..
لو دمعه
نزلت من عيونك
يوم عليها ..
والله هافرح
وأتباهى بيها ..
بين جيراني ..
وأقول دي بنتي
بنت ابوها
ساكنه كياني ..
حسيت حنانها
مشتاقه لحناني ..
نزلت دموعها
غصب عنها ..
ولسه فاكراني ..
ولسه فاكراني ...
( حلمك المستني نور )
الورد أنواع
كل ورد له شذاه ..
والدروب أطماع
كل درب له بدايته ومنتهاه ..
والقلب نفسه ينول مناه ..
والحلم كامش في الصدور
والكتاب مليان صور
صوره عتمه وصوره نور
والصور فيها العبر
لو هدمتك كبرت عليك
هتلاقيك ضحكه
في عيون البشر
والزمان عمال يدور
وحلمك المليان غرور
خلاك حجر
قاعد بتحلم بالقمر
وانت ساكن في القبور
دا الضلمه للكسلان فتور
وحلمك المستني نور
محتاج يعافر
يشق صدر الليل
ويعدي م المخاطر
ألف ميل
زي أسراب الطيور
لما تهاجر
وتعدي بالحلم الجميل
لغيطان بشاير
وتعدي بالحلم الجميل
لغيطان بشاير
:: حروف حبيبتي ::
أول مره أبعد عنك ..
توهتيني ف بحر ظنونك ..
أول مره أحس بغربه
لما فاتوني سحر عيونك ..
هاخدك
طول العمر حبيبتي
وطول العمر
هاعيش مجنونك ..
واحب ابتسامتك ..
وهمسك ولونك ..
واحب الصبح
اللي هل ف عيونك ..
واحب الندى
اللي فاض من شجونك ..
واحب صدك واعشق جنونك ..
واحب السهر يداعب جفونك ..
واحب الطيور
اللي سارحه ف كونك ..
واحب الورود
لما تلمس خدودك ..
واحب الأماني
تأخدني لحدودك ..
واحب همسك ..
لما تيجي وتقوليلي
انك حبيبتي ..
وابتدي من فرحتي ..
اكتب قصيدتي ..
وتبتدي كلماتي مني
غصب عني ..
تترسم بحروف حبيبتي ..
وعشان ماغيبتي ..
عرفت إيه معنى الأماني ..
وكتبت ف عيونك أغاني ..
تتغنى بس عشانك إنتي ..
دنا بارسمك
من صغر سني ..
وأطبع ملامحك جوا مني ..
لو زاد أنينك
بس شاوري ..
باهديكي روحي ..
عشان بحبك
تحيي نبضك وتفارقني ..
تحيي نبضك وتفارقني ..
" روحي حايرة "
العمر فات ...
والقلب مليان ذكريات
منها اللي مات ...
ومنها اللي
عايش من سكات ...
ومنها اللي مزروع
بالحنين يطرح أنين ...
ودمعتين ...
دمعه للعمر اللي فات ...
ودمعه بتعد السنين ...
وكلمتين
كلمة ندم وكلمة ياريت ...
ومابين حنيني وبين ياريت ...
انا اتهريت م الإنتظار ...
والصبر قايد جمر نار ...
بين البشر عايش أثر
عدى عليه مليون نهار ...
لو بإيدي الإختيار ...
هاختار أكمل رحلتي
واخد قرار ...
ياإما جنه ياإما نار ...
دانا روحي حايره ...
داير ف دايره ...
نهارها ويل وليلها ضلمه...
وغربه ضايع فيها الطريق ...
باحلم ببكره يكون جريئ ...
ويكون صديق ...
ويعدي بالحلم الغريق ...
ويلاقي مرسى ...
أو سفينه تساع مافينا ...
وتعدي بينا لأي مينا ...
مكان ماترسى ...
من غير صديق ...
ماشي الطريق ...
زي الغريق ...
مش لاقي شط
يشيل همومي ...
ويعدي أمسي زي يومي ...
ويعدي أمسي زي يومي ...
"" خليكي شاهده ""
عامله نفسك
يادنيا ناسيه ...
وانت طبعك
معايا أسيه ...
طب انصفيني
مره واحده ...
وخليكي شاهده ...
إني صابر وبصد عنها
م المخاطر أي غادر
يبيع ترابها لأي تاجر
خليكي شاهده
قلبي عمره
يوم ماخاف ...
رغم اني
عايش ع الكفاف ...
و بالمناهده ...
خليكي شاهده ...
حبيبتي برضه
معايا أسيه ...
ولأني واد
طبعي أصيل ...
حبيتها حب
مالوش مثيل ...
دا النهر فيها
سلسبيل ...
طارح ف قلبي
عشانها ورده ...
خليكي شاهده ...
لا ليا فيها شوال فلوس ...
ولا قصر عالي ...
هدمتي على قد حالي ...
ولقمتي بتكفي طقه ...
وطقه لأه ...
خليكي شاهده ...
ع الطريق دايما مسافر ...
والدمعه نشفت
ف المحاجر ...
والحنين خلى المشاعر ...
ليها قايده ...
خليكي شاهده ...
حبيبتي على
مر الزمان ...
ساكنه روحي
والكيان ...
ولا عمر قلبي
مره خان عهدها
ولا مره باعها ...
خليكي شاهده ...
خليكي شاهده ...
( اليتامى بتبكي بينا )
عايزين نتوب
والنيه باين فيها إنا ..
مستحيل ربنا يقبل توبتنا ..
واليتامى بتبكي بينا ..
إزاي نتوب والوش كالح ..
والحزن طارح ف المطارح ..
والحلم سارح للغروب ..
الشحوب
على وشي واضح ..
ضحكتي مسروقه مني ..
الألم نايم في جرحي ..
والأنين راسم ملامحي ..
نفسي أصرخ نفسي أحكي ..
ومهما نحكي ومهما نشكي ..
مش هانقدر يوم نعبر ..
عن ألامنا وعن همومنا ..
عن حلم طفل ..
نفسه يفرح ..
نفسه يلبس يوم جديد ..
نفسه يشعر مره إنه
كان ف عيد ..
نفسه يشعر إنه حي ..
إنه عايش
مش على الهامش ..
أو عايش رديف ..
لما ياكل لقمته ..
ويروح ينام ..
ينام على فرشته ..
مش ع الرصيف ..
نفسي أسعى ف ضل روحه ..
نفسي أطوف ف رحاب
جروحه ..
نفسي أمسح دمعته
واداوي خوفه ..
لا أم تحضن لهفته
ولا ضحكته
نامت بشوق على خدها ..
والصبح هل
والجراح على وسعها ..
والهم زاد
والكتاف ماعدتش شايله حملها ..
والخطوة من كتر الحمول
تعبت وتاهت ف السكك
سكة اللي يروح مالوش تمن ..
وسكة الحلم اللي اتسجن ..
ويجي ليل الشجن
توسع جراح الروح ..
نحلم يروح الألم
ف نوم الأسى والنوح
وعمر نوم الأسى
مايداوي جرح الروح ..
وعمر نوم الأسى
مايداوي جرح الروح ..
:: سامحيني ياست الكون ::
سامحيني ياست الكون ..
أنا المحقوق أنا الغلطان
أنا التايه ف بحر ظنون ..
أنا المعجون بترابك ..
وراضي بعذابك
أنا المصلوب على زنادك
ف ليل ملعون ..
وانا فلاحك المطحون ..
برغم الفقر والحاجة
غنايا يلف الكون ..
وانا الغله ف سنابل
عشقك المجنون ..
وانا الحاوي على بابك
بانام عريان لكن دفيان ..
مادام قلبك وفي وحنون ..
هانام واتغطى بعيونك
ياأحلى عيون ..
سامحيني ياست الكون ..
سامحيني ياست الكون ..
:: إلا ف هواكي ::
ف الغربة حبة شجن ..
وحلم اتسجن ..
إلا ف هواكي
واقف ورا الشباك
أحلم أشوفك ..
واشوف الحنه ف كفوفك ..
واشوف الكحل
بتعاجب على رموشك ..
ونسمة عصر
بتهفهف على توبك ..
ونسيت انك هناك ..
واقفه ورا الشباك ..
بتحلمي زيي ..
تشوفيني وانا معدي ..
والشامه على خدي ..
مين م البشر قدي ..
وحبيبتي واقفه هناك ..
واقفه ورا الشباك ..
ف خيالها رسماني ..
نسيت كمان زيي ..
إن انا مسافر
بعيد وبينا سور ..
وان الزمن بيدور ..
والعمر بيعدي
سنين وراها شهور ..
إمتى ياليل الأسى
تنزاح واشوف النور ..
ف الغربة حبة شجن ..
وحلم اتسجن ..
إلا ف هواكي ..
"" بعدت ليه ""
الغربه فيها نار ونور ...
نار بتبني الوهم سور ...
ونور بيطفي ألف نار
ويهد سور ...
نار تخلي قلبك
أرض بور ...
ونور يملاها خير
تطرح زهور ...
وانت الوحيد سيد قرارك ...
يتبقى نور يتعيش بنارك ...
البعد ليه كان اختيارك ...
خلاص نويت وابتديت
رحلة عذابك ...
حطيت سرجك على حصانك ...
نويت تفارق ضل بابك ...
وخدت إيه للرحله زادك ...
غير عنادك وابتعادك ...
عن قلوب صانت ودادك ...
رغم بعدك وارتحالك ...
حبتك حتى ف غيابك ...
طولت ياما البعد ليه ...
والبعد ليه كان اختيارك ...
كان نفسي تدي الود فرصه
يكون شفيعك ...
يوم رجوعك عن قرارك ...
زرعت بينا القسوه ليه ...
قسوتك طرحت مرارك ...
قسوتك طرحت مرارك ...
( أم الهنا )
مين اللي يقدر يكسرك
يام الهنا
يام الأصول والجدعنه
وفيكي صوت المآذنه
بينادي حي على الفلاح
وكنيسه تنده للصلا
حيوا أسباب الصلاح
والمسيحي ف حضن مسلم توأمه
بالمحبه احنا إتعاهدنا ع السماح
وبلدنا نعمه م السما
حضنها واسع براح
ف رباط جمعنا إنما
رايه عنوانها الكفاح
ولاجل يوم الملحمه
صاحيين وبإدينا السلاح
هانهد أوكار العدا
ونلملم الدم اللي ساح
" شهرزادي "
قومي يالا ياشهرزاد ..
مرت سنين كتير عجاف ..
والقلب شاب أصبح يخاف ..
لما نيجي ننام نخاف ..
ولما نصحى كمان نخاف ..
بعد اما كنا قلب واحد ..
ونبض واحد في الوريد ..
أصبحنا ميت مليون شريد ..
قومي يالا ياشهرزادي ..
قومي نادي
واحيي فينا الطيبه تاني ..
نادي علينا لملمينا
علمينا وأدبينا ..
دانتي ف عيون ربنا
وغاليه علينا ..
قومي يالا ياشهرزاد ..
وانتي أغلى م الدهب
ومن الماسات ..
وكتافي ليكي
كتف ميه وكتف زاد ..
قومي يالا اتذوقي
لفي البلاد وعطريها ..
إفردي شعرك
سحابة وضلليها ..
خلي نيلك يجري فيها ..
يحضن سنابل
القمح العفيه ..
ويصحي حلمي
الغافي فيا من سنين ..
قومي يالا ياشهرزاد ..
مشتاق ومليان بالحنين ..
مشتاق أزور السيده
وسيدنا الحسين ..
والف حبه ع المقام ..
واتوضا منه المغفره ..
واصلي عنده ركعتين ..
واصلي عنده ركعتين ..
:: أخويا و اخويا ::
أخويا
يابن امي وابويا ...
إحنا زمان
على عهد
الحب اتربينا ..
لو مات الأب ..
الأخ الأكبر
بيقوم بينا ...
ويكون الأب ...
وعشان مانتا
الأكبر فينا
وفيت بالعهد ..
وحنانك فاق الحد ..
ياأرق وأطيب قلب ..
فاوعى تصدق
إن أنا من
غيرك حاجه ...
دانا من غيرك
ولا حاجه بجد ...
دا الغربه اللي انا
حاسس بيها ف بعدك
بتشقني شق ...
وف عز الصيف
حاسس بالبرد ...
وشرود الروح ...
دا الأخ
الطيب حضن
بيداوي جروح ...
وجروحي تطيب
لو تفضل جانبي ...
ولو تبعد عني
ريحتها تفوح ...
وتهون الدنيا على
وغلاك أبدا مايهون ...
يابو قلب يساع الكون ...
ياملاك طيب وحنون ...
لو تسأل ميت مليون ...
عن معنى الأخ ...
هتلاقي اللي يقولك ...
أنا عزي أخويا ...
وانا جاهي أخويا ...
وانا سندي أخويا ...
لكن وصف
أخويا ف قلبي ...
زي الماس متخبي ...
كلمة حق
يابن امي وابويا ...
عمود الضهر
إللي ف ضهري
أخويا ... وأخويا ...
:: يارب عديها ::
العمر زي القطر ..
ناس راكبة
وناس نازلين ..
واحنا نقطه ف سطر ..
وبتعدي السنين ..
عدى بينا العمر ..
بقينا ناس تانين ..
عايشين ومش عايشين ..
لما زاد بينا الآسى
رجعنا نحلم بالحنين ..
لما كنا صغيرين ..
كانت أحلامنا بسيطة ..
وكنا طيبين ..
كنا على عهد
الوفا عايشين ..
نبدر مابينا الفرح
تطرح قلوبنا حنين ..
واللمه ف المغربيه ..
ولقمتنا الهنيه ..
كانت بتكفي ميه ..
وكبرنا يارحلتنا ..
توهنا ف غربتنا ..
ماعدتش أحلامنا بسيطه
ولاعدنا على عهد
الوفا عايشين ..
وكل إللي بينا
مالي قلوبنا آنين ..
ونسينا لمتنا
ولقمتنا الهنيه
معدتش تكفي اتنين ..
وماشيه رحلتنا
واحنا ضيوف فيها ..
راكبين مراكبها ..
وتاهت مراسيها ..
واحنا كمان توهنا ..
يارب عدلها
يارب عديها ..
يارب عدلها .. يارب عديها ..
لوحتي لإبنتي الدكتورة ساره
:: الموناساره ::
إوعى تقولي
إن أنا مش فاهمك ..
أو مش حافض
تقاطيع وشك ..
لما زمان ف اللفة
شالوكي ..
قوام وجابوكي ..
وقالولي دي بنتك ..
وشوفت عنيكي ..
جيبت الفرشه والألوان
وبسرعة رسمتك ..
واتخيلتك أجمل ورده
ف البستان ..
أصل أنا فنان ..
والرسم هوايتي ..
وبافهم لغة الألوان ..
مثلا يعني
أقدر اقولك
على لون فرحك ..
وكمان لون حزنك ..
ولونك وانتي عيونك
سارحة ف كونك ..
وكمان الحلم
الغافي ف حضنك ..
عارف لونه..
حتى جنونك ..
همسك شجنك ..
واجمل لون
بيليق على وشك ..
وبيرسم ضي النور
ف ملامحك ..
حتى القمر العالي ..
لو شاف
ألواني ف ضيك ..
هايغير منك ..
وينزل طوالي
ويقول وانا مالي
هات ألوانك
يالا ارسميني
شوفتي عيوني
إزاي شايفاكي ..
وبألواني رسمت هواكي ..
وقدري معاكي ..
إنك ف كياني ..
ساكنة كياني
زي الوشم ..
وانا من صغري
باحب الرسم ..
وحب الألوان
ف حياتي غريزه ..
آه لو شوفتي
بعينك لوحتك هتحبيها ..
دانتي وبس
ف عيني عزيزه ..
حتى دافنشي
لو شاف
تفاصيلك فيها ..
هايقول ياخسارة
الموناليزا ..
"" كنا زمان ""
كنا زمان ع الألحان ..
نحكي الحكايات ..
كنا ننام نحضن أحلامنا
كان الخير جوانا يبات ..
كنا زمان
في اللمه اخوات ..
واتفرقنا بقينا شتات ..
يالا ياعم نعيد الحلم ..
إيدي ف إيدك
إرمي حمولك ..
قوم علقها ع الشماعه ..
إنسى همومك
واكتب عنها بكل شجاعه ..
غمض عينك إفرح واسرح
واسرق من أحلامك ساعه ..
ساعه تنسيك الأحزان ..
كنا زمان ..
في زمان الخير ..
العصافير كانت بتبيض
والبيضه تفقس عصافير ..
ولما جيت يازمان الطيش ..
البيضه فقست خفافيش ..
والعصافير هاجرت أوطانها ..
والخفافيش سرقت أماكنها ..
نفسي العصافير
ترجع من تاني ..
ونرجع تاني زي زمان ..
حضنك دافي وحضني آمان ..
زمان المعنى اللي اتجمعنا ..
ف حبه وساعنا وساع أوجاعنا ..
ولا يوم باعنا للأحزان ..
كنا قلوب مليانه حنان ..
كنا ورود ماليا البستان ..
كنا ورود بتحب النور ..
كنا زهور وشذانا عطور
كنا زهور وشذانا عطور
:: مصر ساقيه ::
ياللي بتسألوا مصر فين ..؟
مصر نورها ف نن عيني
مصر لونها بلون حنيني
مصر فرض .. مصر شعب
بيدفي بعض ببعض ..
وبيحمي بعض بجد ..
شعب واحد مش شلل ..
وناس عويله بوش عيره
وفكر خايب ..
مصر شعب كله غيره
عايشين حبايب ..
ومصر بولادها
نسمه بتتعاجب
على خد ورد ..
مصر ساقيه بتروي شهد ..
مصر قارب
بيعدي بينا أي صعب ..
مصر قلب نبضه حب
مصر عهد
وضحكه ممكن تترسم
على أي خد ..
مصر وعد ونهر سعد ..
إسمه نيل سلسبيل ..
مايته تشفي العليل ..
والعويل لساه بيسأل
مصر فين ..؟
مصر صابرة بالأنين ..
على جور ولادها
الكدابين البايعين ..
مصر ساكته لكن قلبها
بيبكي ب حنين ..
وعشان على عقلك غباوه ..
وعلى عيونك غشاوه ..
لساك بتسأل مصر فين ..؟
مصر فين ..؟
مصر أم وطيبه ..
مصر وردة منوره ..
واقفه
على سجادة الصلا ..
بتصلي لينا ركعتين ..
بتصلي لينا ركعتين ..
:: غزاله مسحوره ::
خبر ايه يابنت الإيه
يامنصوره ..
ياساحره قلوب الناس
ياجميلة الصوره ..
ياسارحه مابين خضره
وبين ميه
ياعايقه بين المدن
ياغزاله مسحوره ..
مشهوره بين المدن
ياعروسة النيل يامصريه ..
ياحمامه طايره في السما
ياسليمة النيه ..
حطي على قلبي
دنا قلبي بنيه ..
بنيتها طوبه محبه
وطوبه حنيه ..
بنيتها على إسمك ..
بنيتها تكون عشك ..
ياكل تكويني
وتاخدني غربتي منك
تناديني ..
يسمعك قلبي
اللي حبك يخليني ..
أسيب الدنيا
بحالها واجيلك ..
أعيش على ضيك ..
واسهر على شطك ..
واغني مع الليل مواويلك ..
~~~~~~~
"" تعيشي يامصر ""
مين قاسي ..؟
ومين حساس ..؟
ومين يساوي
الحديد بالماس .. ؟
ومين يآآمن
إللي ملوهش أساس
قليل الأصل
العرق فيه دساس ..؟
ومين عاشق أراضيها ..
يزرعها ويرويها ..
ويعزقها بسن الفاس ..؟
ومين يبيع
الملايكه للنخاس ..؟
ومين م الناس ..
على بابها
حارس من الحراس ..؟
ومين اللي شايف
عشانها بعينه الموت ..؟
ومين رافع آدان ع المدنه
بعلو الصوت ..؟
ومين ع الحدود واقف
ومش خايف
مدام حالف يمين الله
تعيش هيه
وهو يموت ..؟
...................
( حلمك ل خضر )
لما تحس بروحك حايره
إمسك قلمك وارسم دايره
قوم خليها حدود مملكتك
وادخل فيها بمحض إرادتك
زور حواريها ولف براحتك
واوعى تعدي ف مره الخط
وابني لنفسك مينا وشط
تلقى مراكبك فيها تحط
فارده شراع صواريها وحادفه
ويا الريح واخداها الدفه
فاوعى تميل للنسمه الشارده
وازرع ورده
وخلى الدنيا ربيع حواليك
غمض حبه وشوف بعنيك
حلمك ل خضر مستنيك
بكره هايكبر يطرح ضي
فاحضن حلمك وازرع فكره
أكيد الفكره بيطرح خيرها
في بكره الجاي
( حبك مدينه )
النجمه سابت عشها
طب فيها إيه
كابوس وجالها
طلعت تنادي بأعلى صوت
صحت جيرانها
طلعت تدور ع القمر
وقالوا خانها
والسما فتحت بيبانها
والقمر حالف مايهدم عشها
حالف يصونها
واقف على بابها وفي
حارس حصونها
نادى عليها اطمني
تعالي نرسم في السما
أضواء وزينه
مدى إيدك سلمي
مالك حزينه
زعلانه ليه وانا قلبي فيه
حبك مدينه
حسادنا دايما سهرانين
بصين علينا
كتبوا الغناوي عننا
عن نور عينينا
( النجمه قالت للقمر)
( النجمه مالت ع القمر فوق في العلالي )
وانا قلبي من حبك بيلالي
وامد نوري في السما
تحلى الليالي
يحلى السهر للعاشقين
دا الحب غالي
طب ساكته ليه اتكلمي
عدي الظنون يالا وتعالي
والليله دي ليلتي أنا
فيها اكتمالي
وليه تعاني وتزعلي
وتبني السدود
والنور يزيد لو تلبسي
حلو المعاني
لو حتى ساكنه ف كون خفي
إوفي الوعود
وهلي زي نسيم عفي
جاي بالورود
يتعبى قلبي ويكتفي
عنك يزود
إيدي في إيدك نجمتي
قمرك ودود
يالا تعالي إطمني
مالك حزينه
زعلانه ليه وانا قلبي فيه
حبك مدينه
زعلانه ليه وانا قلبي فيه
حبك مدينه
( ألوان العلم )
لما عم الكون هرج
والدم سال
والفكر ل اسود عرج
على ناس هزال
شالوا الرايات السود علم ،
والظلم ساد
حتى نور الشمس
غطوه بالسواد
وعدوا الحدود قاصدين بلدنا
ينشروا فيها الفساد
قالوا مصر للأنين
قلت ناسها طيبين
قالوا فيها النيل حزين
قلت بكره النيل يوافي
ويجي صافي بالحنين
وانتوا ليه ناويين أذيه
ومصر بلدي أحلى غيه
لابسه توبها ومستحيه
شالها مغزول بالمحبه
حضن دافي للأحبه
هى دى مصر الأبيه
زي شمس ونور عفيه
وانتوا ليه بعقول غبيه
بعتوا فيها كل غالي
بعتوا حتى قوت عيالي
والنخيل معادشي عالي
طرحه معجون بالألم
خدتوا روحنا للعدم
حتى ألوان العلم
رافضه أدوار الغوايه
رفض القلم يكتب حكايه
بره مضمون الروايه
والتاريخ عارف بلدنا
ع السطور حاسب حسابنا
مصر دين والدين كتابنا
وانتوا ليه زايدين عذبنا
بالخيانه والفجور
والزمان عمال يدور
جاتنا ياما جيوش محاوله
تبني ليها ف مصر دوله
ومصر جيشها أسود عتاوله
رجعوهم مهزومين
مصر بلد الطيبين
مصر باقيه بالحنين
مصر باقيه بالحنين
( ريشة الفنان )
رميت الحبل ع الغارب
وسيبت القلب متوارب
واقول يمكن
تجيني حبيبتي وافتحلك
ولأني حبيبتي مشتاق لك
فتحت حدودي للنسمه
وشوفت ورودي تندهلك
وانا من صغري بارسملك
في قلبي كيان
وجبت الفرشه والألوان
وسلة ورد م البستان
وخليتهم على المرسم
مابين لوحتي وبين طيفك
والآقي القلب يتنسم
عبير طيفك وانا بارسم
واشوف ألواني تتقسم
على شعرك على رمشك
وشوفت اللوحه تشبهلك
وتوصفلي جمال قدك
وخدك علبة الألوان
وضاعت ريشة الفنان
عشان طيفك طلع حرنان
وسابلي اللوحه مش كامله
ناقصه عنيكي والبسمه
فقلت أكمل الرسمه
واجيب طيفك من الأحلام
واتظاهر بأني تمام
واسيب روحي للأوهام
لقيت الحلم بيعاني
شافك وانتي بايعاني
فضاعت مني ألواني
وضاع الورد م البستان
وانا الفنان ومشتاقلك
وعاشق ف الجمال سنك
ونسمة هوا منك
واسهر ليلى واندهلك
عشان تيجي واجمعلك
سلة ورد م البستان
واخليها على المرسم
واشوف عينك وانا بارسم
ف يرجع قلبي يتنسم
هوانا ............. زمان
وافتح دولاب خدك
واخد علبة الألوان
واكمل لوحتك الناقصه
واسيبها شويه للنسمه
واشوف ضحكتك راسمه
أجمل لوحه بالألوان
أجمل لوحه بالألون
( أنا إنسان )
أنا إنسان
جوايا الآآآهه تقسمني
لكن قلبي حجر صوان
كتمت الآآآآهه من همي
نزل دمع العيون حرنان
وكان نفسي أعود لامي
واشوف عمي ماهوش غضبان
لكن قدري ماأمهلنيش
وسأل دمي على القضبان
وداب لحمي كأني مفيش
ولموا الحلم في الأكفان
حتى أخويا ماعرفنيش
وضاع إسمي مع العنوان
وغطوني بحتة خيش
شافوني الناس
وقالوا حرام
دا كان طيب
دا كان غلبان
دا كان طيب
دا كان إنسان
دا كان إنسان
( السيناريو الجاي خطير )
________________
دنجا ............... دنجا
سيبنا بورما ع الروهينجا
دبحوهم ......... قطعوهم
كيسوهم ........ زي رنجه
دنجا .................. دنجا
سيبنا بورما ع الروهينجا
والدواعش شالوا سينجا
باعوا سوريا وباعوا ليبيا
حاره ، حاره وزنقه ، زنقه
دنجا .................. دنجا
سيبنا بورما ع الروهينجا
والعماله صاحبها واضح
في الخيانه تور وسارح
واليمن في الدم سايح
والسودان سودانين مافالح
والعراق عبوه ف سرنجه
دنجا ................. دنجا
سيبنا بورما ع الروهينجا
والعروبه حزمه وسايبه
معزه قايمه ومعزه نايمه
والوصايه ...... للفرنجه
دنجا .............. دنجا
سيبنا بورما ع الروهينجا
والنطاعه اللي ف شيوخنا
جوعونا ........ لما دوخنا
عشمونا ...... .. بالقطايف
راحوا هما ع المصايف
إما طنجه أو بورينجا
دنجا .............. دنجا
غرقونا في ...... التفاهه
الشباب ع الفيس بيشقى
والبنات للهندي عاشقه
والعيال بكار .......ونينجا
دنجا ............ دنجا
سيبنا بورما ع الروهينجا
شوفنا كل الكون موالس
قلنا يالا الرب حارس
العرب ماعادوش فوارس
دول نعاج والراعي سينجا
دنجا ............... دنجا
سيبنا بورما ع الروهينجا
والسيناريو الجاي خطير
ع المدرس ....... والوزير
واللي دارس يبقى زير
والعقول تفاح ... ومانجا
دنجا .............. دنجا
سيبنا بورما ع الروهينجا
دبحوهم ...... قطعوهم
كيسوهم ..... زي رنجه
دنجا ............ دنجا
سيبنا بورما ع الروهينجا
دنجا .............. دنجا
سيبنا بورما ع الروهينجا
( ضمير الفاس )
أنا فلاح وبالبلدي
هنا بلدي
في حضن الريف
بحور الشعر عشقاني
وفاكراني واد حريف
وانا واحد على قدي
بادوس على جرحي وباعدي
وارص حروفي من كدي
ماليش في الغش والتجريح
ولا في البحر ليا شراع
انا راكب بساط الريح
لاني صريح مانيش خداع
باوصف وطأة الايام
واجيب الكلمه م الأحلام
أوضيها ...... واصليها
واصفيها من الاوهام
عشان تمشي بين الناس
تنوب عني في غيابي
تكون نبراس
وابويا علمني أكون حساس
وانا ثابت على عهده
ومش ناسي عرق خده
ولا كده
ولا ناسي ضمير الفاس
أنا الفلاح
وريحة الأرض عشقاني
وعرفاني أنا الطيب
باداوي الجرح وباطيب
آهات الناس
وانا الباني
بتحناني
في ناسي أساس
أنا الفلاح ونبراسي
ضمير الفاس
وانا مسافر )
---------------
شيطان الشعر سهاني
نيمنى على وداني
عمل تعويذة علشاني
ومنعني أرد جواب
سقاني السحر مش بحساب
لأنه عارفني مش كداب
ولا واقف ورا ل ابواب
أتسمع وأتصنت
عشان أسرق أمان الناس
ولأني مخاوي من صغري
كشفته قوام
ف سابني أعوم على كيفي
خدتني الريح لبحر هيام
ودا بحري ومملكتي
وفيه أنغام وعزف نايات
لقيته مره بالصدفه
وانا مسافر
مابين الأرض والسموات
معايا تأشيرة بس مرور
لمحني بعينه حياني
صباح النور
وشوفت اللهفه ف عيونه
تلت لهفات
ف سيبت علامه من روحي
على حدوده
وانا باختم الجوازات
لقيت طيفه كده
سارح في وجداني
ولقيته زيي وحداني
مالوهش عزول
ولايعرف خطوط العرض
ولايعرف خطوط الطول
ولا فاتح على المحيطات
دا فاتح بس على قلبي
وشمسه الدافيه ترسمني
على وشه
وتيجي النسمه تحضني
أنا ورمشه
قابلني بضحكه وداده
وانا العاشق كما العاده
وشافني عيوني مكسوره
وضايعه ملامحي ف الصوره
كأني ف لحظه لخبطته
ونام مووجه على شطه
لقيته مفارق العافيه
سألني الدمعه ليه وافيه
وليه الضحكه مش صافيه
فقلت الدنيا مش ع الكيف
طعم الغدر مررها
وعايشينها رغم الزييف
فقلت أطير مع الأحلام
أجيلك حبه نتسامر
واحشني قلبك العامر
ف خليني هنا جنبك
ماانا زيك ماليني هيام
ماانا زيك ماليني هيام
---------------
( إزاي أطير )
لمين هواك
ياطير وطاير بالوما
مين علمك تملى السما
فرحة غناك
مين علمك ..؟
تبني عشك بالغنا
وان الأماني ممكنه
تيجي الوليفه بالهنا
وتحضن هواك
مين علمك ..؟
تنسى الألم
وتعيش ملاك
بجناح وريش
حزنك مفيش
مانتاش أفيش
زايد حلاك
صوتك بيعزف دندنه
والنسمه جايه حنينه
والدنيا عندك هينه
سعدك ملاك
وإنت الأمير
والإسم طير
عبر الأثير
وريني ضيك
علمني زيك
إزاي اطير
واسبح معاك
في بحور هواك
ياطير وطاير بالوما
مين علمك تملى السما
فرحة غناك
وتملي عشك بالغنا
وتملى عشك بالغنا
(صباح الورد يا سمره )
صباح الورد ياعمري
يامرويه بعرق ناسك
صباح الورد ياسمره
يافارده العزه نبراسك
صباح من قلبي وناسك
وانا ف محرابك الناسك
وانا فلاحك المصري
فصيح من اول التكوين
صباح الورد والياسمين
وهاسرق موجه م الطايرين
واذيعهالك ع الهوى حصري
صباح الورد ياعمري
صباح الورد ياعمر
( با طالب بحنانك )
م الأخر
أنا بتحمل قرص البرد
أنا واقف لاجل عيونك
حائط صد
وبرغم جنونك
سرقاني عيونك
وباشيل من كونك
برد وشرد
وانا كلي إراده
أنا أصلي بحبك
حب عباده
أنا قلبي
زي حصان طرواده
مخلوق بيعافر
متعبي جيوش جراره
والصدر سواتر
تمنع عنك أيها غاره
أنا واقف وبكل جساره
حارس على بابك
صاحي ومش هتاخر
وهامشي طريقك للآخر
أنا مؤمن بيكي وباتفاخر
وعشانك
هاكتب بإيديا بيان
وهاهدم أسوار سجانك
وهاعلن ثوره
في كل ميدان
لاجل مايوصل صوتي
لحد ودانك
وتشوفي بعينك أوضاعي
وتحسي شويه بأوجاعي
أنا إبنك ومانيش طماع
ولا طالب عز وجاه
ولا عايز اهد كيانك
أنا عايز أحس
إن انا إنسان
أنا بس باطالب بحنانك
أنا بس باطالب بحنانك
______________
( أزرع الإيمان )
قلت أبدأ بالسلام
لما قالوا إن السلام
يمحي الأسيه
وازرع الإيمان وتد
يشد خيمة
مصرنا الحره الأبيه
لاجل مصر ماتعلى بينا
وتبني فينا عقول عفيه
عقول وتبدأ م الأساس
مصر زارعه وطارحه ناس
وناي بيعزف سمسميه
وبندقيه حاضنه فاس
وضهر حمال الأسيه
( أنا العاشق )
كتب التاريخ عن العشاق
وعلى جبين الزمان سطر
وانا العاشق كما عنتر
وتمشي خطايا واتعثر
وأمد إيديا لترابك
ألآقي القلب متعطر
يامصر يام الجبين أزهر
نبضك وفا حضنك دفا واكتر
مين عنكي يتأخر مايتعطر
بريحة المسك والعنبر
ومين قال إن انا ناسي
يانبضي ووحي إحساسي
وانا من ناسك
قمرك ووناسك
أصد الصعب لو جالك
وانا الناسك ف محرابك
وانا أمامك ودجالك
وانا الواعظ كدا أوقات
وانا بتاع التلت ورقات
ولو ميت ألف تعلب فات
عمري مانسى أفضالك
وتوبي اللي اتغزل
من شالك
وانا الحرف اللي نظم
موالك صبا وحجاز
وانا الوتر اللي عزف
لحنك وقالوا نشاز
وانا النازل نزال قلبك
وعمره مافاز
وانا الصعب اللي مش
مفهوم كما الألغاز
لكني الماشي ف رحابك
وف ركابك بدون تفكير
لا ليا كوم فيكي
ولا عمري كنت أمير
وعدى العمر ع الفاضي
وانا راضي .. أنا راضي
أكون حارس على بابك
واموت لو أي شئ صابك
وانا المطحون ف الأزمة
وصفر شمال مالوش لازمة
لكن عاشق .. أنا عاشق
أنا صقر السما الباشق
على حدودك وتد راشق
أنا العاشق .. أنا العاشق
( سواقي وأراضي )
يابلدي ......... الأبيه
ياحره ........ وعفيه
رسمتك ..... قصادي
سواقي ... واراضي
يازرعي ... وحصادي
وخيري اللي زاد
يابلدي ........ الأبيه
ياحره ........ وعفيه
يابانيه ..... المصانع
كنايس ....... جوامع
صدرك ........ موانع
وعزمك ......... زناد
يابلدي ........ الأبيه
ياحره ....... وعفيه
يافن ...... ومسارح
وضل ...... المطارح
وحلمي اللي سارح
وطارح ......... ولاد
يابلدي ........ الأبيه
ياحره ....... وعفيه
يانبعي .... ومعيني
بعينك ...... راعيني
قومي .... إندهيني
كاويني ...... البعاد
يابلدي ....... الأبيه
ياحره ...... وعفيه
ياطارحه ..... وشال
وحضن ...... العيال
ياخفه ........ ودلال
وغاية ....... المراد
يابلدي ........ الأبيه
ياحره ....... وعفيه
ياغله ....... وسنابل
وصوت ...... البلابل
ياعزم ......المناضل
في عز ..... الجهاد
يابلدي ........ الأبيه
ياحره ...... وعفيه
ياحنة ....... كفوفي
وفاسي وشادوفي
ياعرقي اللي نازل
وراوي ....... العباد
يابلدي ....... الأبيه
ياحره ....... وعفيه
ياشمسي .. وضلي
ووردي ...... وفلي
وناسي اللي مني
وصالك ........ وداد
يابلدي ....... الأبيه
ياحره ....... وعفيه
ياراويه .. الشراقي
ياأرض ..... التلاقي
ياحبي اللي باقي
هدايه ...... ورشاد
ياحبي اللي باقي
هدايه ....... ورشاد
" مجدافك صفيح "
لما تبدأ رحلتك ..
حاسب على خطوتك ..
خطوتك مركبك ..
وبارك تباريح
شديد الريح ..
ومجدافك صفيح ..
وقلبك الغرقان وجع
مستني موت ..
أو بطن حوت
حتى الودع قال الجدع ..
محتاج شراع والشراع
ف النوا ضاع ..
سابك وراح مليان جراح ..
زي الصديق شافك غريق ..
لا بل ريقك ..
ولا مد إيده يشد إيدك ..
لو كان صديق إزاي يبيعك ..
دا الصديق ف الرحلة ضهر ..
يشيل همومك
وبعدي بيها ألف بحر ..
ويكون شراع
يصد عنك أعتى ريح ..
لو جريح يقاسمك
الجرح بصحيح ..
الصديق لو كان صديق ..
هيكون وفي ويكون جدع ..
ويداوي قلبك م الوجع ..
ويداوي قلبك م الوجع ..
( إنت مش نوح )
إنت مين ..؟
تايه وبتعد السنين ..
واقف طابور المخدوعين ..
مجروح وجرحك زاد أنين ..
خايف تفضفض بالكلام
والكلام أصبح سكوت ..
خايف تخطي خطوتك ..
سكتك مليانه موت ..
نفسك تفوت ..
ف سفينة تحضن لهفتك
أو بطن حوت ..
وتعدي بيك بر الأمان ..
بس انت مش نوح ..
ولا فيه طوفان ..
ويونس
اللي طلع غضبان ..
ماكانش طمعان ف جاه ..
ولا مرة تاه عن دعوته ..
ورب العباد وبرحمته عداه ..
ف ضلمة ف بطن ضلمة ..
ف بطن حوت
لشط فيه ناس طيبين ..
والأرض حضنت نسمته ..
دابت حنين ..
حست جراحه ولهفته ..
نبتت عشانه الياقطين ..
وعشان سلامة نيته ..
طابت جراحه وسكته ..
بأمر رب العالمين ..
وانت مين ..؟
ونيتك سكتها فين ..
تايه وبتعد السنين ..
واقف طابور المخدوعين ..
مستني السفين ..
والحوت الأمين ..
والأرض اللي كانت طيبه
راحوا ناسها الطيبيين ..
نشفت وماتت
ومات معاها الياقطين ..
ومات معاها الياقطين ..
( يالا يامصري )
مين اللي قال ان النجوم ...
اللي ف سماكي دول نجوم ...
دول ملايكه
بيحروسوكي م الهموم ...
لو تندهي يامصري قوم ...
من الشقوق تطلع أسود
وقت اللزوم ...
يالا يامصري
هم وقوم بالروح افديها ..
دا مفيش شيء أبدا
يغلى عليها ...
خلي الندل اللي بيكرهها
وواكل خيرها ...
زي ألسوسه ساكنه جسدها
بتنخر فيها
يرحل عنها
ويرمي حمولها
ع اللي شاريها ...
دا اللي شاريها
أكيد يحميها م التزييف ...
هو الأقوى عشان على حق
هو عفيف ...
عمره ماباع
ف ترابها وخانها
عمره ما كان
في الأزمة ضعيف ...
عمره مافارق بابها وسابها
هو الحارس هو شريف ...
يالا يامصري
إنت الطيب إنت المجدع ...
عزمك يحمي بلادك واسمع ...
عزمك يشبه دانة مدفع ...
عزمك حضن يلم ويجمع ...
عزمك درع يصد ويمنع ...
يمنع كل آيادي الغدر
تهدم ف المدنه وف المصنع ...
عزمك ساقيه تروي الأرض
عزمك همه تصون العرض ...
عزمك همه تصون العرض ...
( يابن بلدي )
يابن بلدي ..
ليه مصمم ع الخيانه ..
ليه تبيعها ..
ليه تخليني أعاني
كنت فاكرك زيي منها
كنت فاكرك طرح نيلها
فجأة شوفتك حد تاني
حد كاره لون سمارها
حد مستني الإشاره
وبمهاره يبيع ترابها
حد مفتحش الكتاب
حس بيها وعاش عذابها
والأمهات بدموع عنيها
وضت ولادها للجهاد
والنيل بيجري ف البلاد
شايل معاه حلم الولاد
يروي الأراضي والعباد
تطرح فرح تطرح غناوي
وجاي الولد بالفرح ناوي
يكتب كتاب ست البنات
والزرع دايما خيره وافي
جاي حصاده في الميعاد
واللي زاد حيرتي وناري
إنتوا ليه زايدين عناد
هتوصلونا لحد فين
قطعتوا ليه حبل الوداد
عايشين مابينا خوانين
كدابين والكدب زاد
كارهينها ليه ومفرقين
ورضعتوا الأسى
من صدر مين
ومصر دين طهر وعباده
ف قلوب ولادها الطيبيين
ومصر دين طهر وعباده
ف قلوب ولادها الطيبيين
:: غاويه وعشقاني ::
يامصر أمرك عجب ..
لو مره قولتي الآه
حسيتي يوم التعب ..
تلاقيني قايد نار ..
أعيش غريب الدار ..
وامشيلك الرحله ..
مشوار ورا مشوار ..
لو سكتك صعبه ..
الصعب يومها يهون ..
لو بتلاقيني عيون ..
في نهاية الرحله ..
غاويه وعشقاني ..
وتروق بقى وتحلى ..
ويجي نهر الشوق يوافي ..
تهدي ولاتخافي ..
ف عيونك الحلوه
تحلي أوصافي ..
ويجي فجر بنوره دافي ..
يصحى حلمك الغافي ..
وترجعي أجمل صبيه ..
وتستحمي ف نور عينيا ..
وتلبسي منديل ب أويه
وطرحتك والجلابيه ..
من جديد وتعيشي فيا ..
تندهي الحال ينصلح ..
العرق بالخير طرح ..
بساتين فرح ..
والقلوب ترجع تتوب ..
بالدموع تمحي الذنوب ..
والإيدين الشقيانين
تتوضا نورك ..
حضنك أمان الغلبانين
مش حد غيرك ..
واحنا دينك أسود عرينك ..
فداكي روحنا وتسلمي
ونعيش ف خيرك ..
فداكي روحنا وتسلمي ..
ونعيش .. ف خيرك ..
( تطرح سنابلها )
أنا نازل أعمل ثوره
ثوره من نوع فلاحي
هانزل بالليل ف القمره
والفاس ف إيديا سلاحي
أروى الأرض السمره
ع الساقيه بلف وصاحي
لاجل ماتصبح خضره
واعزقها بكل كفاحي
واحرسها لعند الغله
تكبر وحصادها يوافي
تطرح سنابلها الصفره
وتميل يهنالي صباحي
ويهل الخير ب حصادها
ويطير الطير صداحي
يغني معايا عشانها
وأطير وياه ف براحي
وأطير وياه ف براحي ..
( حلم عادي )
كنت باحلم حلم عادي
كان ودادي أبقى شاعر
وانظم قصايد ع الورق
واللي يقرا حروفي يقرا
بس يقرا بالمشاعر
حلم عادي مش كبير
لاجل يملا قلوبنا خير
ويصحى جوانا الضمير
عشان يجينا الحب طاير
من هواه نغزل ضفاير
راح نخاصم كل فاجر
واللي قلبه شديد وواعر
والأمان يسرح في لمه
واللي فاتح بابه سمى
قام لصوت الفجر صلى
واللي سارح كله همه
واللي تاجر واللي صانع
واللي رايح أرضه زارع
واللي سن فاسه قالع
كل خاين كل بايع
واللي قلبه كان حقود
واللي واقف ع الحدود
حالف يمين الله يزود
قام وقال بالروح هاجود
لما شاف الشر دايس
والمدرس واللي دارس
والفقير على بابها حارس
صوته بيلم النوارس
صوته عامر بالمشاعر
في الوريد دايما مسافر
جوا روح الروح بيعافر
صحى حلمي الغافي فيا
صحى فيا نبض شاعر
نزلت قصايدي ع الورق
وحروفي سالت بالمشاعر
للي يقرا حروفي يقرا
بس يقرا بقلب شاعر
للي يقرا حروفي يقرا
بس يقرا بقلب شاعر
:: تايه وقلبك هام ::
ع السكه سكة سفر
تايه وقلبك هام ..
قاعد بتحسب
فرحتك أوهام ..
والعمر بيعدي
وهم ملضوم بوهم ..
وعدت رحلتك أوهام ..
ع السكه تاهت سكتك
واتبعترت أيام ..
وحلمك المليان وجع ..
فيك إنخدع ..
لساك بتحسب
رحلتك أحلام ..
دا الحلم زي الزهور ..
من بعد عتمة ليل
محتاج يشوف النور ..
محتاج لحبة ندى
تخضر أرضه البور ..
ف يطرح قلوب خضرة ..
تفرد جناحاتها ..
تطير ف السما وتدور ..
كما الطيور سارحه ..
زي الصبايا الحور ..
وتغني للفرحه
زي الصبايا الحور ..
وتغني للفرحه ..
"" التوته ""
حلمت ان انا ف حدك ..
هاشوف حسنك ..
واشوف قدك ..
والآقي الشمس
متحنية من خدك ..
ومين يقدر يشوف خدك ..
ويقولك دا زي الورد ..
ولون الورد من خدك ..
وقلبك بيسقيه شهد ..
فيطرح نور
وتدور النجمه حواليكي ..
ياقمرايه ..
وسارحه ف سمايا ..
رسمتك فرحه جوايا ..
لعمري الجاي ..
ليه روحتي وخدتي الضي ..
وسيبتي منه حبة ذكريات ..
دا الزمان الباقي منك
ذكريات ..
والذكريات الباقيه منك
شيئ بديع ..
تملى تيجي بالفرح
زي الربيع ..
كل اما اروح للتوته وحدي ..
ألآقيها تحكي بصوت وديع ..
عن حكاوينا القديمه ..
وشاهده على لمسة إيدينا ..
والآقيها تسرح ف الخيال ..
زي ما تسرح عينينا ..
لساكي برضه ياتوته واقفه ..
تحكي عنا ..
فاكره تنهيدة قلوبنا ..
وقد إيه م العشق دوبنا ..
لساكي برضه ياتوته واقفه ..
تحلمي بلحظة رجوعنا ..
بعد ماتاهت دروبنا ..
وتعبت خطاوينا وضعنا ..
وتعبت خطاوينا وضعنا
( قلبي إمام )
أنا عديت حدود الخلق
وباكتب حق مش باطل
وقلبي ماهوش عاطل
لأنك فيه تساوي الخلق
وزرعته جناين ورد
ف يتمايل على عنيكي
ويرمي الشهد
وانا ع العهد حبيتك
وخبيتك من الحاسدين
وخوفت عليكي م النسمه
ف غطيتك برمش العين
حتى الحلم في غيابك
خاصمني سنين
وانا العاشق لأوصافك
وسهم الحب أهو صابني
وليه سابك
وليه مداريه أسبابك
وسيباني ماليني حنين
وانا الشاعر
وباكتب شعري بالإحساس
واغمض عيني على رسمك
ف تجري حروفي على
إسمك قصايد ماس
وانا الكلمه اللي داوت ناس
وليه وياكي بتألم
وبابني أساس من الأوهام
وباحلم حتى وانا صاحي
وجاني منام
لقيت طيفك مع طيغي
وعمري هيام
وقلبك صلى ورا قلبي
وقلبي إمام
وطال الحلم ف رحابك
وانا المرهون على بابك
وفيت بالندر أعتابك
وعدى العمر ف الأوهام
وليه شايف على حدودك
حرس واقف كما الددبان
وكل الكون حدود كونك
وإيه ذنبي أعيش دونك
ومين عباكي بالأوهام
ومين قال لك عليا كلام
فزاد الشك وظنونك
وزرعتي الطريق ألغام
لا انا عارف أخطيلك
ولا قادره خطايا تمد
وانا مادد حبال الود
ومش ناسي اللي كان بينا
سنين عشناها في الجنه
ف تطرح ضحكتك حنه
فتتحنى خدود الورد
وليه زاد البعاد والصد
وكلمة شر تصبح سد
ماتيجي نسد باب الريح
ونتعاهد على التصحيح
ونبني صرحنا العالي
ونحمي قلوبنا م التجريح
ونحمي قلوبنا م التجريح
( نازل بفاسي )
سألوني نازل
قلت طبعا
لازم انزل ..
بس مش
نازل ميدان ..
ولاناوي أعمل
هيلمان ..
ولا هاهدم
البلد
إللي كانت
يوم أمان ..
أنا نازل أعلن
إني مصري
ومصر ديني ..
نازل بفاسي
لاجل قوتي
ولاجل أمني
سارح لأرضي ..
حتى لو
زايد أنيني ..
هاصلي فرضي
واروي أرضي ..
من حنيني ..
"" أنا مش هاتوب ""
قالولي توب ..
وادعي ربك
يغفر ذنوبك ..
قلت المحبه
ف شرع ربي
مش ذنوب ..
لو تعرفوا
سر المحبة وسحرها
جوا القلوب ..
المحبة ف قلبي
طارحة ..
ورود وفرحة ..
ونسمة سارحة ..
إزاي اتوب ..
لو قالوا مرة
الشمس نسيت
وطلعت م الغروب ..
أنا مش هاتوب ..
لو حبي ليكي
سموه ذنوب ..
هاحبك اكتر
وأكيد هاكتر م الذنوب ..
ومش هاتوب
مهما يلوموني ..
وعن عيونك يبعدوني ..
ويسألوا عني يلاقوني ..
راسم تفاصيلك ف كوني ..
سهران عشانك
مانامت عيوني ..
مدى إيدك طمني
حيرتي وظنوني ..
لو تعشقي م البشر
مليون دوني ..
هاتلفي ياما وتتعبي
وهترجعي ..
مشتاقه لدفا قلبي
وشجوني ..
مشتاقه لدفا قلبي ..
وشجوني ..
{ إوصفلي شعورك }
لو تعبت خطاويك ع السكه
لو تاهت حيرتك وظنونك
لو حواليك الدنيا بحالها
وانت وحيد عايش بهمومك
أنا زيك عشت شعورك
ف ارسم على خدك ورده
لونها بألوان الطيف
وسيبها تداعب خد النسمه
ف البرد أو ليلة صيف
وساعتها اوصفلي شعورك
طب طلع من قلبك ضحكه
ترسم على وشك نورك
هاتدوب دمعة حزنك
قدام فرحك وسرورك
وساعتها اوصفلي شعورك
طب إرمي حمولك على بكره
وقول الكلمه اللي تزينك
وازرع من أحلامك فكره
هاتشوفها بتطرح خيرك
وساعتها اوصفلي شعورك
أنا أصلي مجرب ميت مره
وشعوري أنا باوصفهولك
قوم عيش الأيام الحلوه
سامح واتخطى ظنونك
هتلاقي الدنيا بتضحكلك
وساعتها اوصفلي شعورك
وساعتها اوصفلي شعورك
:: لسه فاكراني ::
سألوني عن مهنتي ..؟
قلت أنا شاعر
رص الحروف شغلتي ..
واعرف أنظم كلمتي
أستاذ مشاعر
سكتي مليانه خوف ..
ع الطريق دايما مسافر
خطوتي ف إيد الظروف ..
قبل اما تبدأ رحلتي ..
وجيت أسافر
كانت ف إيدي أجندتي ..
وفيها رصيت القصايد
والخواطر والحروف
وكتبت عنوان المهاجر
ع الأفيش ..
خرابيش حرفوش
من الحرافيش ..
وناديت لبنتي
خلي دي عندك أمانه
يمكن وشوشنا
ماتتلاقيش ..
ويبقى سيبتلكم أثر
هو إيه يعني البشر ..
غير حبة حروف
والذكريات
برضك حروف
والأسامي والكتب
حبة حروف
ومتخافيش ..
لو بيينا طال مر الغياب
ومتزعليش ..
لو قالوا عني
أبوكي مات
إياك دموعك تهزمك
متعيطيش ..
دا العمر محسوب
في الكتاب
كلنا لازم نموت
داري حزنك والعذاب ..
قولي ابويا لما عاش
عاش أسد
ولما مات مات جسد
لكنه عايش ف الكتاب ..
عايش بالمشاعر
والقصايد والخواطر ..
أبويا كان للخير
والحب شاطر ..
خليكي فاكره
إن انتي واخواتك
ساكنين كياني ..
لما تيجي روحي
مشتاقه لهواكم
وتزور مكاني ..
تلاقاكي فاكراني ..
سهرانه مع كتابي
وحضناني ..
وتيجي جنبك تحضنك
هتحسي بيها ..
دا انا أجمل قصيده
في الكتاب كتبتهالك
إبقى افتحيها ..
نفسي روحي
تحس إيدك
بين حروفها تعطريها ..
وتشوف عنيكي ع السطور
سرحانه فيها ..
لو دمعه
نزلت من عيونك
يوم عليها ..
والله هافرح
وأتباهى بيها ..
بين جيراني ..
وأقول دي بنتي
بنت ابوها
ساكنه كياني ..
حسيت حنانها
مشتاقه لحناني ..
نزلت دموعها
غصب عنها ..
ولسه فاكراني ..
ولسه فاكراني ...
( حلمك المستني نور )
الورد أنواع
كل ورد له شذاه ..
والدروب أطماع
كل درب له بدايته ومنتهاه ..
والقلب نفسه ينول مناه ..
والحلم كامش في الصدور
والكتاب مليان صور
صوره عتمه وصوره نور
والصور فيها العبر
لو هدمتك كبرت عليك
هتلاقيك ضحكه
في عيون البشر
والزمان عمال يدور
وحلمك المليان غرور
خلاك حجر
قاعد بتحلم بالقمر
وانت ساكن في القبور
دا الضلمه للكسلان فتور
وحلمك المستني نور
محتاج يعافر
يشق صدر الليل
ويعدي م المخاطر
ألف ميل
زي أسراب الطيور
لما تهاجر
وتعدي بالحلم الجميل
لغيطان بشاير
وتعدي بالحلم الجميل
لغيطان بشاير
:: حروف حبيبتي ::
أول مره أبعد عنك ..
توهتيني ف بحر ظنونك ..
أول مره أحس بغربه
لما فاتوني سحر عيونك ..
هاخدك
طول العمر حبيبتي
وطول العمر
هاعيش مجنونك ..
واحب ابتسامتك ..
وهمسك ولونك ..
واحب الصبح
اللي هل ف عيونك ..
واحب الندى
اللي فاض من شجونك ..
واحب صدك واعشق جنونك ..
واحب السهر يداعب جفونك ..
واحب الطيور
اللي سارحه ف كونك ..
واحب الورود
لما تلمس خدودك ..
واحب الأماني
تأخدني لحدودك ..
واحب همسك ..
لما تيجي وتقوليلي
انك حبيبتي ..
وابتدي من فرحتي ..
اكتب قصيدتي ..
وتبتدي كلماتي مني
غصب عني ..
تترسم بحروف حبيبتي ..
وعشان ماغيبتي ..
عرفت إيه معنى الأماني ..
وكتبت ف عيونك أغاني ..
تتغنى بس عشانك إنتي ..
دنا بارسمك
من صغر سني ..
وأطبع ملامحك جوا مني ..
لو زاد أنينك
بس شاوري ..
باهديكي روحي ..
عشان بحبك
تحيي نبضك وتفارقني ..
تحيي نبضك وتفارقني ..
" روحي حايرة "
العمر فات ...
والقلب مليان ذكريات
منها اللي مات ...
ومنها اللي
عايش من سكات ...
ومنها اللي مزروع
بالحنين يطرح أنين ...
ودمعتين ...
دمعه للعمر اللي فات ...
ودمعه بتعد السنين ...
وكلمتين
كلمة ندم وكلمة ياريت ...
ومابين حنيني وبين ياريت ...
انا اتهريت م الإنتظار ...
والصبر قايد جمر نار ...
بين البشر عايش أثر
عدى عليه مليون نهار ...
لو بإيدي الإختيار ...
هاختار أكمل رحلتي
واخد قرار ...
ياإما جنه ياإما نار ...
دانا روحي حايره ...
داير ف دايره ...
نهارها ويل وليلها ضلمه...
وغربه ضايع فيها الطريق ...
باحلم ببكره يكون جريئ ...
ويكون صديق ...
ويعدي بالحلم الغريق ...
ويلاقي مرسى ...
أو سفينه تساع مافينا ...
وتعدي بينا لأي مينا ...
مكان ماترسى ...
من غير صديق ...
ماشي الطريق ...
زي الغريق ...
مش لاقي شط
يشيل همومي ...
ويعدي أمسي زي يومي ...
ويعدي أمسي زي يومي ...
"" خليكي شاهده ""
عامله نفسك
يادنيا ناسيه ...
وانت طبعك
معايا أسيه ...
طب انصفيني
مره واحده ...
وخليكي شاهده ...
إني صابر وبصد عنها
م المخاطر أي غادر
يبيع ترابها لأي تاجر
خليكي شاهده
قلبي عمره
يوم ماخاف ...
رغم اني
عايش ع الكفاف ...
و بالمناهده ...
خليكي شاهده ...
حبيبتي برضه
معايا أسيه ...
ولأني واد
طبعي أصيل ...
حبيتها حب
مالوش مثيل ...
دا النهر فيها
سلسبيل ...
طارح ف قلبي
عشانها ورده ...
خليكي شاهده ...
لا ليا فيها شوال فلوس ...
ولا قصر عالي ...
هدمتي على قد حالي ...
ولقمتي بتكفي طقه ...
وطقه لأه ...
خليكي شاهده ...
ع الطريق دايما مسافر ...
والدمعه نشفت
ف المحاجر ...
والحنين خلى المشاعر ...
ليها قايده ...
خليكي شاهده ...
حبيبتي على
مر الزمان ...
ساكنه روحي
والكيان ...
ولا عمر قلبي
مره خان عهدها
ولا مره باعها ...
خليكي شاهده ...
خليكي شاهده ...
( اليتامى بتبكي بينا )
عايزين نتوب
والنيه باين فيها إنا ..
مستحيل ربنا يقبل توبتنا ..
واليتامى بتبكي بينا ..
إزاي نتوب والوش كالح ..
والحزن طارح ف المطارح ..
والحلم سارح للغروب ..
الشحوب
على وشي واضح ..
ضحكتي مسروقه مني ..
الألم نايم في جرحي ..
والأنين راسم ملامحي ..
نفسي أصرخ نفسي أحكي ..
ومهما نحكي ومهما نشكي ..
مش هانقدر يوم نعبر ..
عن ألامنا وعن همومنا ..
عن حلم طفل ..
نفسه يفرح ..
نفسه يلبس يوم جديد ..
نفسه يشعر مره إنه
كان ف عيد ..
نفسه يشعر إنه حي ..
إنه عايش
مش على الهامش ..
أو عايش رديف ..
لما ياكل لقمته ..
ويروح ينام ..
ينام على فرشته ..
مش ع الرصيف ..
نفسي أسعى ف ضل روحه ..
نفسي أطوف ف رحاب
جروحه ..
نفسي أمسح دمعته
واداوي خوفه ..
لا أم تحضن لهفته
ولا ضحكته
نامت بشوق على خدها ..
والصبح هل
والجراح على وسعها ..
والهم زاد
والكتاف ماعدتش شايله حملها ..
والخطوة من كتر الحمول
تعبت وتاهت ف السكك
سكة اللي يروح مالوش تمن ..
وسكة الحلم اللي اتسجن ..
ويجي ليل الشجن
توسع جراح الروح ..
نحلم يروح الألم
ف نوم الأسى والنوح
وعمر نوم الأسى
مايداوي جرح الروح ..
وعمر نوم الأسى
مايداوي جرح الروح ..
:: سامحيني ياست الكون ::
سامحيني ياست الكون ..
أنا المحقوق أنا الغلطان
أنا التايه ف بحر ظنون ..
أنا المعجون بترابك ..
وراضي بعذابك
أنا المصلوب على زنادك
ف ليل ملعون ..
وانا فلاحك المطحون ..
برغم الفقر والحاجة
غنايا يلف الكون ..
وانا الغله ف سنابل
عشقك المجنون ..
وانا الحاوي على بابك
بانام عريان لكن دفيان ..
مادام قلبك وفي وحنون ..
هانام واتغطى بعيونك
ياأحلى عيون ..
سامحيني ياست الكون ..
سامحيني ياست الكون ..
:: إلا ف هواكي ::
ف الغربة حبة شجن ..
وحلم اتسجن ..
إلا ف هواكي
واقف ورا الشباك
أحلم أشوفك ..
واشوف الحنه ف كفوفك ..
واشوف الكحل
بتعاجب على رموشك ..
ونسمة عصر
بتهفهف على توبك ..
ونسيت انك هناك ..
واقفه ورا الشباك ..
بتحلمي زيي ..
تشوفيني وانا معدي ..
والشامه على خدي ..
مين م البشر قدي ..
وحبيبتي واقفه هناك ..
واقفه ورا الشباك ..
ف خيالها رسماني ..
نسيت كمان زيي ..
إن انا مسافر
بعيد وبينا سور ..
وان الزمن بيدور ..
والعمر بيعدي
سنين وراها شهور ..
إمتى ياليل الأسى
تنزاح واشوف النور ..
ف الغربة حبة شجن ..
وحلم اتسجن ..
إلا ف هواكي ..
"" بعدت ليه ""
الغربه فيها نار ونور ...
نار بتبني الوهم سور ...
ونور بيطفي ألف نار
ويهد سور ...
نار تخلي قلبك
أرض بور ...
ونور يملاها خير
تطرح زهور ...
وانت الوحيد سيد قرارك ...
يتبقى نور يتعيش بنارك ...
البعد ليه كان اختيارك ...
خلاص نويت وابتديت
رحلة عذابك ...
حطيت سرجك على حصانك ...
نويت تفارق ضل بابك ...
وخدت إيه للرحله زادك ...
غير عنادك وابتعادك ...
عن قلوب صانت ودادك ...
رغم بعدك وارتحالك ...
حبتك حتى ف غيابك ...
طولت ياما البعد ليه ...
والبعد ليه كان اختيارك ...
كان نفسي تدي الود فرصه
يكون شفيعك ...
يوم رجوعك عن قرارك ...
زرعت بينا القسوه ليه ...
قسوتك طرحت مرارك ...
قسوتك طرحت مرارك ...
( أم الهنا )
مين اللي يقدر يكسرك
يام الهنا
يام الأصول والجدعنه
وفيكي صوت المآذنه
بينادي حي على الفلاح
وكنيسه تنده للصلا
حيوا أسباب الصلاح
والمسيحي ف حضن مسلم توأمه
بالمحبه احنا إتعاهدنا ع السماح
وبلدنا نعمه م السما
حضنها واسع براح
ف رباط جمعنا إنما
رايه عنوانها الكفاح
ولاجل يوم الملحمه
صاحيين وبإدينا السلاح
هانهد أوكار العدا
ونلملم الدم اللي ساح
" شهرزادي "
قومي يالا ياشهرزاد ..
مرت سنين كتير عجاف ..
والقلب شاب أصبح يخاف ..
لما نيجي ننام نخاف ..
ولما نصحى كمان نخاف ..
بعد اما كنا قلب واحد ..
ونبض واحد في الوريد ..
أصبحنا ميت مليون شريد ..
قومي يالا ياشهرزادي ..
قومي نادي
واحيي فينا الطيبه تاني ..
نادي علينا لملمينا
علمينا وأدبينا ..
دانتي ف عيون ربنا
وغاليه علينا ..
قومي يالا ياشهرزاد ..
وانتي أغلى م الدهب
ومن الماسات ..
وكتافي ليكي
كتف ميه وكتف زاد ..
قومي يالا اتذوقي
لفي البلاد وعطريها ..
إفردي شعرك
سحابة وضلليها ..
خلي نيلك يجري فيها ..
يحضن سنابل
القمح العفيه ..
ويصحي حلمي
الغافي فيا من سنين ..
قومي يالا ياشهرزاد ..
مشتاق ومليان بالحنين ..
مشتاق أزور السيده
وسيدنا الحسين ..
والف حبه ع المقام ..
واتوضا منه المغفره ..
واصلي عنده ركعتين ..
واصلي عنده ركعتين ..
:: أخويا و اخويا ::
أخويا
يابن امي وابويا ...
إحنا زمان
على عهد
الحب اتربينا ..
لو مات الأب ..
الأخ الأكبر
بيقوم بينا ...
ويكون الأب ...
وعشان مانتا
الأكبر فينا
وفيت بالعهد ..
وحنانك فاق الحد ..
ياأرق وأطيب قلب ..
فاوعى تصدق
إن أنا من
غيرك حاجه ...
دانا من غيرك
ولا حاجه بجد ...
دا الغربه اللي انا
حاسس بيها ف بعدك
بتشقني شق ...
وف عز الصيف
حاسس بالبرد ...
وشرود الروح ...
دا الأخ
الطيب حضن
بيداوي جروح ...
وجروحي تطيب
لو تفضل جانبي ...
ولو تبعد عني
ريحتها تفوح ...
وتهون الدنيا على
وغلاك أبدا مايهون ...
يابو قلب يساع الكون ...
ياملاك طيب وحنون ...
لو تسأل ميت مليون ...
عن معنى الأخ ...
هتلاقي اللي يقولك ...
أنا عزي أخويا ...
وانا جاهي أخويا ...
وانا سندي أخويا ...
لكن وصف
أخويا ف قلبي ...
زي الماس متخبي ...
كلمة حق
يابن امي وابويا ...
عمود الضهر
إللي ف ضهري
أخويا ... وأخويا ...
:: يارب عديها ::
العمر زي القطر ..
ناس راكبة
وناس نازلين ..
واحنا نقطه ف سطر ..
وبتعدي السنين ..
عدى بينا العمر ..
بقينا ناس تانين ..
عايشين ومش عايشين ..
لما زاد بينا الآسى
رجعنا نحلم بالحنين ..
لما كنا صغيرين ..
كانت أحلامنا بسيطة ..
وكنا طيبين ..
كنا على عهد
الوفا عايشين ..
نبدر مابينا الفرح
تطرح قلوبنا حنين ..
واللمه ف المغربيه ..
ولقمتنا الهنيه ..
كانت بتكفي ميه ..
وكبرنا يارحلتنا ..
توهنا ف غربتنا ..
ماعدتش أحلامنا بسيطه
ولاعدنا على عهد
الوفا عايشين ..
وكل إللي بينا
مالي قلوبنا آنين ..
ونسينا لمتنا
ولقمتنا الهنيه
معدتش تكفي اتنين ..
وماشيه رحلتنا
واحنا ضيوف فيها ..
راكبين مراكبها ..
وتاهت مراسيها ..
واحنا كمان توهنا ..
يارب عدلها
يارب عديها ..
يارب عدلها .. يارب عديها ..
لوحتي لإبنتي الدكتورة ساره
:: الموناساره ::
إوعى تقولي
إن أنا مش فاهمك ..
أو مش حافض
تقاطيع وشك ..
لما زمان ف اللفة
شالوكي ..
قوام وجابوكي ..
وقالولي دي بنتك ..
وشوفت عنيكي ..
جيبت الفرشه والألوان
وبسرعة رسمتك ..
واتخيلتك أجمل ورده
ف البستان ..
أصل أنا فنان ..
والرسم هوايتي ..
وبافهم لغة الألوان ..
مثلا يعني
أقدر اقولك
على لون فرحك ..
وكمان لون حزنك ..
ولونك وانتي عيونك
سارحة ف كونك ..
وكمان الحلم
الغافي ف حضنك ..
عارف لونه..
حتى جنونك ..
همسك شجنك ..
واجمل لون
بيليق على وشك ..
وبيرسم ضي النور
ف ملامحك ..
حتى القمر العالي ..
لو شاف
ألواني ف ضيك ..
هايغير منك ..
وينزل طوالي
ويقول وانا مالي
هات ألوانك
يالا ارسميني
شوفتي عيوني
إزاي شايفاكي ..
وبألواني رسمت هواكي ..
وقدري معاكي ..
إنك ف كياني ..
ساكنة كياني
زي الوشم ..
وانا من صغري
باحب الرسم ..
وحب الألوان
ف حياتي غريزه ..
آه لو شوفتي
بعينك لوحتك هتحبيها ..
دانتي وبس
ف عيني عزيزه ..
حتى دافنشي
لو شاف
تفاصيلك فيها ..
هايقول ياخسارة
الموناليزا ..
"" كنا زمان ""
كنا زمان ع الألحان ..
نحكي الحكايات ..
كنا ننام نحضن أحلامنا
كان الخير جوانا يبات ..
كنا زمان
في اللمه اخوات ..
واتفرقنا بقينا شتات ..
يالا ياعم نعيد الحلم ..
إيدي ف إيدك
إرمي حمولك ..
قوم علقها ع الشماعه ..
إنسى همومك
واكتب عنها بكل شجاعه ..
غمض عينك إفرح واسرح
واسرق من أحلامك ساعه ..
ساعه تنسيك الأحزان ..
كنا زمان ..
في زمان الخير ..
العصافير كانت بتبيض
والبيضه تفقس عصافير ..
ولما جيت يازمان الطيش ..
البيضه فقست خفافيش ..
والعصافير هاجرت أوطانها ..
والخفافيش سرقت أماكنها ..
نفسي العصافير
ترجع من تاني ..
ونرجع تاني زي زمان ..
حضنك دافي وحضني آمان ..
زمان المعنى اللي اتجمعنا ..
ف حبه وساعنا وساع أوجاعنا ..
ولا يوم باعنا للأحزان ..
كنا قلوب مليانه حنان ..
كنا ورود ماليا البستان ..
كنا ورود بتحب النور ..
كنا زهور وشذانا عطور
كنا زهور وشذانا عطور
:: مصر ساقيه ::
ياللي بتسألوا مصر فين ..؟
مصر نورها ف نن عيني
مصر لونها بلون حنيني
مصر فرض .. مصر شعب
بيدفي بعض ببعض ..
وبيحمي بعض بجد ..
شعب واحد مش شلل ..
وناس عويله بوش عيره
وفكر خايب ..
مصر شعب كله غيره
عايشين حبايب ..
ومصر بولادها
نسمه بتتعاجب
على خد ورد ..
مصر ساقيه بتروي شهد ..
مصر قارب
بيعدي بينا أي صعب ..
مصر قلب نبضه حب
مصر عهد
وضحكه ممكن تترسم
على أي خد ..
مصر وعد ونهر سعد ..
إسمه نيل سلسبيل ..
مايته تشفي العليل ..
والعويل لساه بيسأل
مصر فين ..؟
مصر صابرة بالأنين ..
على جور ولادها
الكدابين البايعين ..
مصر ساكته لكن قلبها
بيبكي ب حنين ..
وعشان على عقلك غباوه ..
وعلى عيونك غشاوه ..
لساك بتسأل مصر فين ..؟
مصر فين ..؟
مصر أم وطيبه ..
مصر وردة منوره ..
واقفه
على سجادة الصلا ..
بتصلي لينا ركعتين ..
بتصلي لينا ركعتين ..
:: غزاله مسحوره ::
خبر ايه يابنت الإيه
يامنصوره ..
ياساحره قلوب الناس
ياجميلة الصوره ..
ياسارحه مابين خضره
وبين ميه
ياعايقه بين المدن
ياغزاله مسحوره ..
مشهوره بين المدن
ياعروسة النيل يامصريه ..
ياحمامه طايره في السما
ياسليمة النيه ..
حطي على قلبي
دنا قلبي بنيه ..
بنيتها طوبه محبه
وطوبه حنيه ..
بنيتها على إسمك ..
بنيتها تكون عشك ..
ياكل تكويني
وتاخدني غربتي منك
تناديني ..
يسمعك قلبي
اللي حبك يخليني ..
أسيب الدنيا
بحالها واجيلك ..
أعيش على ضيك ..
واسهر على شطك ..
واغني مع الليل مواويلك ..
~~~~~~~
"" تعيشي يامصر ""
مين قاسي ..؟
ومين حساس ..؟
ومين يساوي
الحديد بالماس .. ؟
ومين يآآمن
إللي ملوهش أساس
قليل الأصل
العرق فيه دساس ..؟
ومين عاشق أراضيها ..
يزرعها ويرويها ..
ويعزقها بسن الفاس ..؟
ومين يبيع
الملايكه للنخاس ..؟
ومين م الناس ..
على بابها
حارس من الحراس ..؟
ومين اللي شايف
عشانها بعينه الموت ..؟
ومين رافع آدان ع المدنه
بعلو الصوت ..؟
ومين ع الحدود واقف
ومش خايف
مدام حالف يمين الله
تعيش هيه
وهو يموت ..؟
...................
( حلمك ل خضر )
لما تحس بروحك حايره
إمسك قلمك وارسم دايره
قوم خليها حدود مملكتك
وادخل فيها بمحض إرادتك
زور حواريها ولف براحتك
واوعى تعدي ف مره الخط
وابني لنفسك مينا وشط
تلقى مراكبك فيها تحط
فارده شراع صواريها وحادفه
ويا الريح واخداها الدفه
فاوعى تميل للنسمه الشارده
وازرع ورده
وخلى الدنيا ربيع حواليك
غمض حبه وشوف بعنيك
حلمك ل خضر مستنيك
بكره هايكبر يطرح ضي
فاحضن حلمك وازرع فكره
أكيد الفكره بيطرح خيرها
في بكره الجاي
( حبك مدينه )
النجمه سابت عشها
طب فيها إيه
كابوس وجالها
طلعت تنادي بأعلى صوت
صحت جيرانها
طلعت تدور ع القمر
وقالوا خانها
والسما فتحت بيبانها
والقمر حالف مايهدم عشها
حالف يصونها
واقف على بابها وفي
حارس حصونها
نادى عليها اطمني
تعالي نرسم في السما
أضواء وزينه
مدى إيدك سلمي
مالك حزينه
زعلانه ليه وانا قلبي فيه
حبك مدينه
حسادنا دايما سهرانين
بصين علينا
كتبوا الغناوي عننا
عن نور عينينا
( النجمه قالت للقمر)
( النجمه مالت ع القمر فوق في العلالي )
وانا قلبي من حبك بيلالي
وامد نوري في السما
تحلى الليالي
يحلى السهر للعاشقين
دا الحب غالي
طب ساكته ليه اتكلمي
عدي الظنون يالا وتعالي
والليله دي ليلتي أنا
فيها اكتمالي
وليه تعاني وتزعلي
وتبني السدود
والنور يزيد لو تلبسي
حلو المعاني
لو حتى ساكنه ف كون خفي
إوفي الوعود
وهلي زي نسيم عفي
جاي بالورود
يتعبى قلبي ويكتفي
عنك يزود
إيدي في إيدك نجمتي
قمرك ودود
يالا تعالي إطمني
مالك حزينه
زعلانه ليه وانا قلبي فيه
حبك مدينه
زعلانه ليه وانا قلبي فيه
حبك مدينه
( ألوان العلم )
لما عم الكون هرج
والدم سال
والفكر ل اسود عرج
على ناس هزال
شالوا الرايات السود علم ،
والظلم ساد
حتى نور الشمس
غطوه بالسواد
وعدوا الحدود قاصدين بلدنا
ينشروا فيها الفساد
قالوا مصر للأنين
قلت ناسها طيبين
قالوا فيها النيل حزين
قلت بكره النيل يوافي
ويجي صافي بالحنين
وانتوا ليه ناويين أذيه
ومصر بلدي أحلى غيه
لابسه توبها ومستحيه
شالها مغزول بالمحبه
حضن دافي للأحبه
هى دى مصر الأبيه
زي شمس ونور عفيه
وانتوا ليه بعقول غبيه
بعتوا فيها كل غالي
بعتوا حتى قوت عيالي
والنخيل معادشي عالي
طرحه معجون بالألم
خدتوا روحنا للعدم
حتى ألوان العلم
رافضه أدوار الغوايه
رفض القلم يكتب حكايه
بره مضمون الروايه
والتاريخ عارف بلدنا
ع السطور حاسب حسابنا
مصر دين والدين كتابنا
وانتوا ليه زايدين عذبنا
بالخيانه والفجور
والزمان عمال يدور
جاتنا ياما جيوش محاوله
تبني ليها ف مصر دوله
ومصر جيشها أسود عتاوله
رجعوهم مهزومين
مصر بلد الطيبين
مصر باقيه بالحنين
مصر باقيه بالحنين
( ريشة الفنان )
رميت الحبل ع الغارب
وسيبت القلب متوارب
واقول يمكن
تجيني حبيبتي وافتحلك
ولأني حبيبتي مشتاق لك
فتحت حدودي للنسمه
وشوفت ورودي تندهلك
وانا من صغري بارسملك
في قلبي كيان
وجبت الفرشه والألوان
وسلة ورد م البستان
وخليتهم على المرسم
مابين لوحتي وبين طيفك
والآقي القلب يتنسم
عبير طيفك وانا بارسم
واشوف ألواني تتقسم
على شعرك على رمشك
وشوفت اللوحه تشبهلك
وتوصفلي جمال قدك
وخدك علبة الألوان
وضاعت ريشة الفنان
عشان طيفك طلع حرنان
وسابلي اللوحه مش كامله
ناقصه عنيكي والبسمه
فقلت أكمل الرسمه
واجيب طيفك من الأحلام
واتظاهر بأني تمام
واسيب روحي للأوهام
لقيت الحلم بيعاني
شافك وانتي بايعاني
فضاعت مني ألواني
وضاع الورد م البستان
وانا الفنان ومشتاقلك
وعاشق ف الجمال سنك
ونسمة هوا منك
واسهر ليلى واندهلك
عشان تيجي واجمعلك
سلة ورد م البستان
واخليها على المرسم
واشوف عينك وانا بارسم
ف يرجع قلبي يتنسم
هوانا ............. زمان
وافتح دولاب خدك
واخد علبة الألوان
واكمل لوحتك الناقصه
واسيبها شويه للنسمه
واشوف ضحكتك راسمه
أجمل لوحه بالألوان
أجمل لوحه بالألون
( أنا إنسان )
أنا إنسان
جوايا الآآآهه تقسمني
لكن قلبي حجر صوان
كتمت الآآآآهه من همي
نزل دمع العيون حرنان
وكان نفسي أعود لامي
واشوف عمي ماهوش غضبان
لكن قدري ماأمهلنيش
وسأل دمي على القضبان
وداب لحمي كأني مفيش
ولموا الحلم في الأكفان
حتى أخويا ماعرفنيش
وضاع إسمي مع العنوان
وغطوني بحتة خيش
شافوني الناس
وقالوا حرام
دا كان طيب
دا كان غلبان
دا كان طيب
دا كان إنسان
دا كان إنسان
( السيناريو الجاي خطير )
________________
دنجا ............... دنجا
سيبنا بورما ع الروهينجا
دبحوهم ......... قطعوهم
كيسوهم ........ زي رنجه
دنجا .................. دنجا
سيبنا بورما ع الروهينجا
والدواعش شالوا سينجا
باعوا سوريا وباعوا ليبيا
حاره ، حاره وزنقه ، زنقه
دنجا .................. دنجا
سيبنا بورما ع الروهينجا
والعماله صاحبها واضح
في الخيانه تور وسارح
واليمن في الدم سايح
والسودان سودانين مافالح
والعراق عبوه ف سرنجه
دنجا ................. دنجا
سيبنا بورما ع الروهينجا
والعروبه حزمه وسايبه
معزه قايمه ومعزه نايمه
والوصايه ...... للفرنجه
دنجا .............. دنجا
سيبنا بورما ع الروهينجا
والنطاعه اللي ف شيوخنا
جوعونا ........ لما دوخنا
عشمونا ...... .. بالقطايف
راحوا هما ع المصايف
إما طنجه أو بورينجا
دنجا .............. دنجا
غرقونا في ...... التفاهه
الشباب ع الفيس بيشقى
والبنات للهندي عاشقه
والعيال بكار .......ونينجا
دنجا ............ دنجا
سيبنا بورما ع الروهينجا
شوفنا كل الكون موالس
قلنا يالا الرب حارس
العرب ماعادوش فوارس
دول نعاج والراعي سينجا
دنجا ............... دنجا
سيبنا بورما ع الروهينجا
والسيناريو الجاي خطير
ع المدرس ....... والوزير
واللي دارس يبقى زير
والعقول تفاح ... ومانجا
دنجا .............. دنجا
سيبنا بورما ع الروهينجا
دبحوهم ...... قطعوهم
كيسوهم ..... زي رنجه
دنجا ............ دنجا
سيبنا بورما ع الروهينجا
دنجا .............. دنجا
سيبنا بورما ع الروهينجا
( ضمير الفاس )
أنا فلاح وبالبلدي
هنا بلدي
في حضن الريف
بحور الشعر عشقاني
وفاكراني واد حريف
وانا واحد على قدي
بادوس على جرحي وباعدي
وارص حروفي من كدي
ماليش في الغش والتجريح
ولا في البحر ليا شراع
انا راكب بساط الريح
لاني صريح مانيش خداع
باوصف وطأة الايام
واجيب الكلمه م الأحلام
أوضيها ...... واصليها
واصفيها من الاوهام
عشان تمشي بين الناس
تنوب عني في غيابي
تكون نبراس
وابويا علمني أكون حساس
وانا ثابت على عهده
ومش ناسي عرق خده
ولا كده
ولا ناسي ضمير الفاس
أنا الفلاح
وريحة الأرض عشقاني
وعرفاني أنا الطيب
باداوي الجرح وباطيب
آهات الناس
وانا الباني
بتحناني
في ناسي أساس
أنا الفلاح ونبراسي
ضمير الفاس
